Small-cap фармацевтика компаниясының акциялары Novo-мен келісімнен кейін 10% өсті
Ісік ауруларын емдеуге арналған терапияны әзірлеумен айналысатын Lisata Therapeutics компаниясының акциялары 15 сәуір күні 10%-дан астам өсті. Компания әлемдегі ірі фармацевтикалық өндірушілердің бірі болып табылатын Catalent-пен серіктестік туралы келісім жасады. Catalent компаниясы Lisata-ның перспективті әзірлемесінің тиімділігін бағалауды өз мойнына алады. Catalent 2024 жылдың желтоқсан айынан бері салмақ азайтуға арналған препараттардың жаһандық көшбасшысы даттық Novo Nordisk-тің ірі акционері болып табылатын Novo Holdings құрамына кіреді.
Толығырақ
Lisata акциялары Nasdaq биржасында 15 сәуір күні 10,7%-ға қымбаттап, $2,17 деңгейіне жетті. Бұл – 31 наурыздан бергі ең жоғары баға. Алайда сауда жабылғаннан кейін акция бағасы 6,45%-ға төмендеп, күн ішінде жинаған өсімінің бір бөлігін жоғалтты.
Сейсенбі күні фармацевтикалық компания Catalent-пен лицензиялық зерттеу келісімін жасағанын хабарлады. Catalent – басқа компаниялар үшін дәрілік препараттарды әзірлеу мен өндіруге арналған технологияларды жеткізуші ірі ұйым. Серіктестік аясында Lisata және Catalent компаниялары Lisata әзірлеген цертипептид (certepetide) заты мен Catalent-тің SMARTag технологиялық платформасының комбинациясы ісіктерге қарсы күрестің тиімділігін арттыра алатынын анықтамақ.
Осы екі технологияны біріктіру арқылы «прецизионды онкологияда революция жасауға» және емдеудің тиімділігін арттыруға болады, деп мәлімдеді Lisata компаниясының зерттеулер мен әзірлемелер жөніндегі атқарушы вице-президенті және медицина директоры Кристен К. Бак.
Келісім шарттары бойынша Catalent зерттеу мен әзірлеу жұмыстарының барлық шығындарын толық өз мойнына алады, ал Lisata кеңес беру арқылы қолдау көрсетеді. Сонымен қатар, Lisata бастапқы төлем алады және зерттеулердің нәтижесіне қарай қосымша төлемдер алуы мүмкін.
Инвестор нені білуі керек
Жыл басынан бері Lisata акцияларының құны 30%-ға төмендеді. Қаңтар айында компанияның акциялары бірден үштен бірге арзандап кетті, себебі компания цертепептид препаратының ұйқы безі қатерлі ісігін емдеуге арналған екінші фазалық сынақтары пациенттердің өмір сүру ұзақтығын айтарлықтай арттырмағанын хабарлады. Соған қарамастан компания сынақтың үшінші, соңғы фазасын 2026 жылы бастауды жоспарлап отыр.
Lisata акцияларына тек екі сарапшы қана рейтинг берген, екеуі де компания акцияларын сатып алуға кеңес береді. MarketWatch дерегі бойынша орташа мақсатты баға – 18 доллар, бұл қазіргі бағадан сегіз есе жоғары.
Компаниялар жайлы
Lisata Therapeutics – қатерлі ісікті емдеуге арналған инновациялық әдістерді әзірлеп, өндірумен айналысатын фармацевтикалық компания. Компанияның негізгі технологиясы – CendR платформасы, ол препараттардың ісікке тереңірек еніп, жақсы әсер етуіне көмектеседі. Цертепептид – осы платформадан жасалған негізгі препарат.
Catalent компаниясы 2024 жылдың желтоқсанында Novo Holdings тарапынан сатып алынды. Catalent-тің құны шамамен 16,5 млрд долларға бағаланған еді. Novo Holdings – Novo Nordisk дат фармацевтикалық компаниясының бақылаушы акционері. Novo Nordisk қант диабеті мен артық салмағы бар адамдарға арналған Ozempic және Wegovy препараттарын шығарады. Бұл келісім нәтижесінде Novo Nordisk АҚШ-тағы үш өндіріс орнын алды.
