АҚШ-пен келісімге үміт артқан жапон нарығы үш айдағы ең жақсы апталық өсімді көрсетті
Соңғы үш айда жапон акциялары үшін бұл апта ең табыстысы болды. Елдің негізгі индексі Nikkei 225 АҚШ президенті Дональд Трамп инаугурациясынан бері бес күн ішіндегі ең жоғары өсімді көрсетті. Инвесторлар Трамп негізгі сауда серіктестерімен, соның ішінде Жапониямен де келісімдерге келеді деп үміттенуде.
Толығырақ
18 сәуір, жұма күні сауда барысында Nikkei 225 соңғы екі аптадағы ең жоғары деңгейіне жетіп, сессияны 1,03% өсіммен аяқтады. Сауда көлемі Пасха мерекесіне байланысты төмен болғанына қарамастан, бұл оң нәтиже тіркелді, деп хабарлайды Reuters. Ал кең ауқымды Topix индексі 1,14%-ға өсті.
Апта қорытындысы бойынша Nikkei 225 3,41%-ға көтерілді — бұл 20 қаңтардан бергі ең күшті апталық өсім. Ол бұған дейін үш апта қатарынан төмендеу көрсеткен болатын.
Токио қор биржасында аптаның басты жеңімпазы — фармацевтикалық сектор, ол 5%-ға жуық өсті. Бұл өсімге Chugai Pharmaceutical компаниясының акциялары 17,5%-ға қымбаттауы себеп болды. Компания салмақты азайтуға арналған дәрі жасап шығарды және оны қолдану құқығын америкалық фармалық алыбы Eli Lilly-ге берді. Eli Lilly 17 сәуір күні бұл семіздікке қарсы препараттың клиникалық сынақтарының сәтті аяқталғанын жариялады, нәтижесінде компания акциялары соңғы 25 жылдағы ең жақсы күнін өткізді.
Екінші орында — кеме қатынасы секторы, ол 3%-ға өсті.
Трамп тарифтер бойынша келісімге келуге ниетті
Трейдерлер қазіргі уақытта АҚШ пен оның сауда серіктестері арасындағы екіжақты келіссөздердің қалай өрбіп жатқанын жіті бақылауда. Олар баж салығы төңірегіндегі оқиғалар қалай дамитынын болжауға тырысуда, деп жазады Bloomberg.
16 сәуір күні Жапония экономика министрі Ресей Аказава Вашингтонда келіссөздердің жаңа кезеңін бастады, оған Дональд Трамп та қатысты. Reuters хабарлауынша, Аказава журналистерге АҚШ президенті Жапониямен келісімді «ең жоғары басымдық» деп атағанын айтты.
«Жапон сауда делегациясымен жаңа ғана кездескенім — мен үшін үлкен құрмет. Үлкен ілгерілеу!» — деп жазды Трамп Truth Social әлеуметтік желісінде.
Teneo консалтинг компаниясының вице-президенті Джеймс Брэди Reuters агенттігіне: «Жалпы көңіл-күй өте жағымды көрінді, әсіресе Трамптың әлеуметтік желідегі Аказавамен Ақ үйдегі күлімсіреген суретімен жарияланған жазбасы осыны айқын көрсетті. Келіссөздер сәтті басталғаны сезілді», деді.
17 сәуір, бейсенбі күні Трамп АҚШ пен Еуропалық Одақ арасындағы сауда қайшылықтарын шешуге қатысты да оптимистік көзқарасын білдірді. Бұл пікірді ол Италия премьер-министрі Джорджия Мелонимен кездесуінен кейін айтты. Reuters жазуынша Трамп Еуропамен сауда келісімінің 100% жүзеге асатынына сенімді екенін жеткізді. Сонымен қатар ол Қытаймен өзара баж салығын арттыру кезеңі аяқталуы мүмкін екенін де меңзеді.
Bloomberg келтірген мәлімет бойынша Sumitomo Mitsui DS Asset Management компаниясының бас нарық стратегы Масахиро Итикава:
«Трамп ЕО-мен жүргізіліп жатқан сауда келіссөздеріне қатысты ешқандай теріс пікір білдірген жоқ. Ал Жапониямен келіссөздер де өте тыныш өтті, себебі валюталық курс мәселесі қозғалмады», — дейді.
Сонымен қатар, Bloomberg атап өткендей АҚШ әкімшілігі Қытайда жасалған кемелерге баж енгізу қадамын жасады. Олар америкалық порттарға кіретін осы кемелерге жаңа алымдар салмақ. Бұл шешім әлемдік кеме қатынасы жолдарын бұзып, екі ірі экономиканың арасындағы сауда соғысын ушықтыруы мүмкін. Осы жаңалық Жапония мен Оңтүстік Кореядағы кемежай саласындағы компаниялар акцияларының өсуіне себеп болды, деп қосты агенттік.
