Цукерберг пен өзге басшылар нарық құлдырамай тұрып миллиардтаған акция сатып жіберген
Bloomberg дерегінше Meta Platforms компаниясының басшысы Марк Цукерберг, Oracle-дың жетекшісі Сафра Кац және JPMorgan Chase басшысы Джейми Даймон сияқты ірі батыс компанияларының басшылары акцияларын миллиардтаған долларға сатып үлгерді. Бұл АҚШ президенті Дональд Трамптың импорттық тарифтер енгізетіні туралы мәлімдемелерінен сәл бұрын болған. Сол кезде технологиялық компаниялардың акциялары қымбаттап тұрған еді. Алайда 2 сәуірге дейін, яғни «Азаттық күні» деп аталатын күн қарсаңында тарифтерге қатысты белгісіздік күшейіп, нарықта жаппай сату басталды. Бұл жағдай әлемдік қор нарықтарының құнын триллиондаған долларға қысқартты.
Washington Service ұйымының инсайдерлік сауда-саттық мәліметтеріне сүйене отырып Bloomberg 2025 жылдың алғашқы тоқсанындағы ең ірі 10 инсайдерлік акция сату келісімін анықтады. Агенттіктің мәліметінше кейбір миллиардер-инсайдерлер акцияларды арзандаған бағада қайта сатып ала бастаған.
Марк Цукерберг, Meta Platforms басшысы және негізін қалаушысы ($733 млн)
2025 жылдың алғашқы тоқсанында Цукерберг өзінің Chan Zuckerberg Initiative қоры мен соған қатысы бар басқа қор арқылы 1,1 миллион акцияны $733 млн-ға сатты. Барлық сату операциялары қаңтар мен ақпанда жүргізілді, сол кезде Meta акцияларының бағасы $600-ден жоғары болды. Содан бері Meta акцияларының бағасы жалпы нарықтық құлдыраудың салдарынан 32%-ға төмендеді.
Сафра Кац, Oracle бас директоры ($705 млн)
Oracle басшысы Кац үнемі өзінің топ-менеджерлік қызметіне байланысты иеленетін опциондарды жүзеге асырып, акцияларды сатып алып, оларды нарықтық бағамен қайта сатады. 2025 жылдың басында ол бұл стратегияны жалғастырды. Қаңтар айында $180-нан жоғары бағада 3,8 миллион акцияны $705 млн-ға сатты. Қазіргі таңда олардың құны 30%-дан аса төмендеді. Кацтың Oracle-дағы үлесі салыстырмалы түрде аз, өйткені оның байлығы негізінен басқа активтерде шоғырланған.
Никеш Арора, Palo Alto Networks басшысы ($432 млн)
Бұрынғы SoftBank топ-менеджері 2024 жылдың наурызынан бастап әр айдың басында Palo Alto Networks акцияларын опцион арқылы сата бастады. Сәуір айында да сатуды жалғастырды. 2025 жылы ол $100 млн шығынмен $565 млн-нан астам акцияны сатты.
Макс де Гроен, Nutanix директорлар кеңесінің мүшесі және Bain Capital серіктесі ($410 млн)
Bain Capital 2024 жылдың шілдесінде Nutanix-тен 16,9 млн акцияны займды конвертациялау арқылы алды. Ол кезде де Гроен бұл акцияларды сатпау жоспары бар екенін айтты. Бірақ сегіз айдан кейін бұл пакеттің үштен бірі сатылды. Осы кезеңде Nutanix нарықтық бағасы 56%-ға өскен еді, бірақ наурызда технологиялық сектордағы қысымнан кейін 20%-ға төмендеді.
Чак Дэвис, Axis Capital Holdings директорлар кеңесінің мүшесі және Stone Point Capital теңбасшысы ($400 млн)
Ақпан және наурыз айларында Axis Capital сақтандыру компаниясы өз акцияларын $400 млн-ға сатып алды. Бұл акциялар Stone Point басқаратын қордан алынған, онда Дэвис жетекші қызметте.
Стивен Коэн, Palantir президенті ($337 млн)
Palantir инсайдерлері өткен жылы $4 млрд-қа акция сатты және 2025 жылы да сатуды жалғастырып жатыр. Коэн $337 млн көлемінде акция сатты. Оның байлығының негізгі бөлігі — $3,3 млрд — опцион пакетімен байланысты. Palantir акциялары қаңтардың ортасынан ақпанның ортасына дейін екі есеге жуық қымбаттап, 2025 жылы қорғаныс саласына деген инвесторлар қызығушылығының арқасында 24% өсім көрсетті.
Джейми Даймон, JPMorgan басшысы ($234 млн)
Даймон 20 ақпанда $233 млн көлемінде акция сатты — бұл банктің акцияларының 2025 жылғы ең жоғарғы деңгейге жеткенінен кейін екі күн өткен соң болды. Бұл оның бір жыл ішіндегі алғашқы сатылымы. 14 сәуірде ол тағы $31,5 млн көлемінде акция сатты. Осылайша, оның 2025 жылғы сатылымдарының жалпы көлемі $250 млн-нан асты.
Эрик Лефкофски, Tempus AI басшысы, Groupon теңқұрушысы ($231 млн)
Google инвестиция жасаған Tempus AI биотехнологиялық стартапы 2024 жылдың маусымында IPO-ға шықты. Содан бері оның акциялары 9%-ға өсті. Лефкофски өзінің акцияларының 1%-ын әр тоқсан сайын сатуда. Стартаптың айтуынша бұл сатудан түскен қаржы IPO шығындарын өтеуге бағытталады.
Тед Сарандос, Netflix басшысы ($195 млн)
30 қаңтарда Сарандос шамамен 200 мың акцияны сатып, $173 млн таза пайда тапты. Бұл сома $21 млн опцион іске асыру шығындарын шегергеннен кейінгі табыс. Netflix бұл жөнінде түсініктеме бермеді.
Трэвис Боэрсма, Dutch Bros теңқұрушысы және директорлар кеңесінің төрағасы ($190 млн)
Бұрынғы сүт өндіруші фермер Боэрсма ақпан айында бес күн ішінде Dutch Bros кофехана желісінің акцияларын $190 млн-ға сатты. Бұл акциялар оның бақылауындағы сенімгерлік қорларда сақталған болатын. 2021 жылғы IPO оны миллиардер етті.
