WSJ хабарлауынша АҚШ қытайлық тауарларға салған баждарды 50-65%-ға төмендетуі мүмкін
Америка нарығындағы негізгі индекстер 23 сәуірдегі сауда-саттықтың басында күрт өсіп, кейіннен тұрақталды. Бұл өсуге The Wall Street Journal басылымының мәліметі түрткі болды. Басылым АҚШ билігі Қытайдан импортталатын тауарларға салынған тарифтерді айтарлықтай төмендетуді жоспарлап отырғанын хабарлады.
Мәселенің мәні
• S&P 500 индексі алғашқы сағаттарда 3%-ға өсіп, кейіннен 2%-ға дейін азайды. Dow Jones 2,5%-ға жетіп, сәл бәсеңдеді. Технологиялық Nasdaq 4%-ға жоғарылап, кейін 2,8%-ға дейін төмендеді. Russell 2000 индексі 3,2%-дан астамға өсті.
Осы уақытқа дейін Қытаймен сауда қатынастарына тәуелді компаниялар акциялары құлдыраса, бұл жаңалықтың аясында олардың бағасы қайтадан көтерілді. Айталық, Apple 2,4%-ға, ал Nvidia 4,4%-ға қымбаттады.
The Wall Street Journal-дың хабарлауынша АҚШ әкімшілігі Қытайдан келетін тауарларға тарифтерді көпсатылы жүйемен төмендетуді көздейді. Біріншіден, ұлттық қауіпсіздікке қауіп төндірмейтін тауарларға 35% деңгейінде, ал қауіп-қатер төндіретін тауарларға кем дегенде 100% тариф енгізу жоспарлануда. Белгілі бір кезеңде жалпы тарифтер деңгейі шамамен 50-65% аралығында болады деп күтілуде.
Президент Трамп бұл тарифтердің тек келіссөздер аясында ғана төмендетілетінін атап өтті. Оның пікірінше мұндай қадам Қытаймен сауда қарым-қатынасын реттеуге көмектеседі.
АҚШ қаржы министрі Скотт Бессенттің айтуынша АҚШ-тың экономикалық саясаты өндіріс пен экспортты арттыруға бағытталуы керек, ал Қытай керісінше, ішкі тұтынуға назар аударуы қажет. Екі жақ осы бағытта бірге жұмыс істеуге дайын. Алайда толыққанды келісімге қол жеткізу үшін кемінде екі-үш жыл қажет болуы мүмкін.
Бұл оқиғалар инвесторлардың көңілін біршама тыныштандырып, нарықтағы сенімді арттырды.
Сарапшылар пікірі
«Трамп паникаға түсіп жатыр, өйткені нарықтар құлдырап, АҚШ-тың қазынашылық облигацияларының табыстылығы әлі де жоғары деңгейде. Оған шұғыл түрде келісім қажет. Осындай жағдайда Қытайға маңызды ештеңе ұсынудың қажеті жоқ», - деп мәлімдеді Natixis-тің Азия-Тынық мұхиты аймағы бойынша бас экономисі Алисия Гарсия Эрреро.
«Пауэллдің қызметінен босатылу ықтималдығы өте төмен болды, бірақ Қытайға қатысты риториканың жұмсаруы нарықта жеңілдік ретінде қабылданды», - деді La Francaise AM париждік стратегияшысы Франсуа Римо.
«Мәселе мынада, қытайлық және американдық импортқа әлі де үлкен баж салынады, ал келіссөздер әлі басталған жоқ. Халықаралық валюта қоры сейсенбі күні ескерткендей, әлемдік экономиканың өсу қарқынының баяулау қаупін болдырмау үшін келісімді тезірек жасасу қажет», - деп еске салды XTB сарапшысы Кэтлин Брукс.
