Apple 2026 жылы АҚШ-қа арналған iPhone өндірісін Қытайдан толық шығармақ — FT
Apple Қытай өндірісіне тәуелділікті азайтудың жолдарын бұрыннан іздеп келген. Енді бұл процесті жеделдетуді көздеп отыр: Financial Times деректеріне сүйенсек, компания 2026 жылдың соңына дейін АҚШ нарығына арналған барлық iPhone үлгілерін Қытайдан Үндістанға көшіруді жоспарлап отыр. Бұл шешім АҚШ пен Қытай арасындағы сауда соғысының ықтимал салдарларынан қорғану мақсатында қабылданған.
Толығырақ
FT дереккөздері Apple компаниясы АҚШ нарығына арналған iPhone құрылғыларын енді тек Үндістанда құрастыруды жоспарлап отырғанын айтады. Мақсат — жылына 60 миллионнан астам смартфонды осы елде жинау. Apple бұл туралы пікір білдіруден бас тартты.
Неліктен өзгеріс қажет болды
Apple ондаған жыл бойы өндіріс тізбегін Қытайда құрып келген, ал негізгі серіктесі — Foxconn. Бірақ Дональд Трамп Қытайдан импортқа 100%-дан асатын айна баж салықтарын енгізгеннен кейін, компания iPhone-ды шұғыл түрде Үндістаннан жеткізе бастады. Қытайда жиналған құрылғыларға 20% баж салығы салынды.
Сарапшылар не дейді
Futurum Group компаниясының басшысы Дэниэл Ньюман: «Бұл Apple үшін маңызды қадам. Компания сауда тәуекелдерінен дер кезінде қорғана білді және өсу қарқынын сақтап қалу үшін жылдам әрекет етіп жатыр», — деді.
Алда не күтіп тұр
Apple Үндістандағы өндірісті екі есе ұлғайтуы керек. Бірақ iPhone құрастыру — бұл тек соңғы сатыдағыы процесс. Apple әлі де Қытайдан жеткізілетін жүздеген бөлшектерге тәуелді. Сондықтан Foxconn мен Tata 2024 жылы Қытайдан алдын ала жиналған модульдерді әкеле бастады — бұл өндіріс қарқынын арттыру үшін қажет болды.
Үндістанға да АҚШ тарапынан 26% баж салығының салыну қаупі болған. Бірақ Ақ үй Нью-Делимен екіжақты сауда келісімі туралы келіссөздер жүргізіп жатқандықтан, оларды уақытша тоқтатты. АҚШ вице-президенті Джей Ди Вэнс келіссөздер сәтті жүріп жатқанын айтты.
Apple акциялары не болып жатыр
Бірқатар ірі қаржы институттары Apple акцияларының мақсатты бағасын төмендетті: BofA — $250-ден $240-қа; UBS — $236-дан $210-ға; Goldman Sachs — $259-дан $256-ға; Wells Fargo — $275-тен $245-ке; MoffettNathanson — $184-тен $141-ге.
FactSet мәліметі бойынша қазіргі орташа мақсатты баға — $238,8, бұл келесі 12 айда акциялардың 15% өсуін білдіреді. Инвесторларға берілген жалпы ұсыныс — «нарықтан жоғары» (Overweight), яғни акцияны сатып алу ұсынылады.
Контекст
Apple келесі аптада тоқсандық табысы туралы есеп береді. Инвесторлар баж салықтарының әсерін бағалауға тырысуда, бірақ FT айтпақшы, Apple дәстүрлі түрде бұл мәселелерге қатысты нақты түсініктеме бермейді.
