АҚШ Novavax компаниясынан COVID-19 вакцинасын қайта сынауды талап етуде
25 сәуір жұма күні сауда кезінде Novavax фармацевтикалық компаниясының акциялары 13%-дан астамға төмендеді. Бұған The Wall Street Journal-дың хабары себеп болды: АҚШ-тың азық-түлік және дәрі-дәрмек сапасын бақылау басқармасы (FDA) компаниядан COVID-19 вакцинасын жаңа клиникалық сынақтан өткізуді талап еткен. Бұл вакцина қазірдің өзінде арнайы лицензия арқылы нарықта сатылып жатыр. Инвесторлар бұл жаңалықты вакцинаның толық мақұлдану мүмкіндігіне теріс белгі ретінде қабылдады. Бұған дейін АҚШ денсаулық сақтау министрі Роберт Ф. Кеннеди кіші препаратты сынға алған болатын.
Толығырақ
Жұма күні сауда кезінде Novavax акциялары 13,5%-ға төмендеп, $6,12 деңгейіне түсті. Алайда сауда сессиясын $6,67 деңгейінде аяқтады — бұл алдыңғы күннің жабылу бағасынан 5,7%-ға төмен.
Инвесторлар акцияларды жаппай сата бастады, себебі WSJ өзінің дереккөздеріне сілтеме жасай отырып, FDA Novavax-тен вакцинаның тиімділігін дәлелдейтін жаңа рандомизацияланған клиникалық зерттеулер нәтижелерін сұратқанын хабарлады.
WSJ мәліметінше бұл талап вакцинаны мақұлдау процесіне Роберт Кеннеди кіші тағайындаған шенеуніктердің араласуынан кейін қойылды. Мұндай талаптар COVID-19 вакциналарын мақұлдаған басқа өндірушілерге қойылған талаптардан едәуір қатаң және болашақта дәрі-дәрмектерді мақұлдау саясатының күшеюіне жол ашуы мүмкін.
Сарапшылардың айтуынша, жаңа толыққанды рандомизацияланған зерттеу жүргізу ондаған миллион долларды талап етеді. Ал нарықтық капитализациясы небәрі $1 млрд-тан сәл асатын Novavax үшін мұндай шығын үлкен салмақ түсіруі мүмкін, деп жазады WSJ.
Контекст
Бұған дейін Novavax вакцинасы 30 мың адам қатысқан зерттеуде плацебомен салыстырғанда 90% тиімділік көрсеткен болатын. Бұл препарат АҚШ-та FDA тарапынан шұғыл қолдануға рұқсат алған және Австралия, Еуропа мен Жапонияда толық мақұлданған.
23 сәуір күні Novavax FDA агенттігінің post-marketing commitment (нарықтағы қолданудан кейінгі бақылау) аясында қосымша клиникалық деректер сұратқанын хабарлады. Ол кезде инвесторлар бұл сұранысты вакцинаның толық мақұлдануына жол ашатын оң белгі ретінде қабылдаған.
10 сәуірде CBS News арнасына берген сұхбатында Роберт Кеннеди кіші Novavax вакцинасын сынға алды. Оның айтуынша, вакцина вирустың тек бір бөлігіне бағытталған және мұндай тәсіл тыныс жолдары инфекциялары үшін бұрын-соңды жұмыс істемеген. Бұл пікірлерден кейін вакцина өндірушілердің акциялары күрт төмендеді: Novavax акциялары 26%-ға, Moderna — 11%-ға, Pfizer — 6,2%-ға арзандады. Айта кету керек, Pfizer мен Moderna вакциналары да вирустың бір фрагментіне бағытталғанымен, олардың әсер ету механизмі Novavax технологиясынан ерекшеленеді.
Сарапшылардың ұстанымы
Жыл басынан бері Novavax акциялары 17%-ға арзандады. MarketWatch мәліметінше компанияның акцияларын бақылап отырған жеті сарапшының төртеуі сатып алуды (Buy), екеуі ұстауды (Hold) ұсынады, ал біреуі сатуды (Sell) ұсынады. Уолл-стриттің орташа мақсатты бағасы $15,17 деңгейінде тұр — бұл қазіргі бағаға қарағанда 127%-ға жоғары.
