Rolls-Royce баж салығына қарамастан, пайда болжамын өзгеріссіз қалдырды
Ұлыбританиялық Rolls-Royce компаниясы — Boeing пен Airbus ұшақтарына қозғалтқыш жеткізуші — 2025 жылға арналған бұрынғы пайда болжамын өзгеріссіз қалдырды және барлық бөлімшелерінің тұрақты жұмыс істеп жатқанын мәлімдеді. Компания жаһандық кедендік баж салығының өсуі саланы белгісіздікке душар еткенімен, бұл әсерді өтеу үшін қажетті шаралар қабылданып жатқанын айтты.
Толығырақ
1 мамыр күні Rolls-Royce 2025 жылға арналған қаржылық болжамын растады. Компания бас директоры Туфан Эргинбильгич акционерлер жиналысы алдында жарияланған мәлімдемесінде: «Жаһандық баж салығының көтерілуі бүкіл саланың болашағына қатысты белгісіздік туғызды. Бірақ біз бұл әсерді азайту үшін нақты шаралар қабылдап жатырмыз», – деді.
Компания бұл шаралардың нақты қандай екенін жария етпеді, бірақ қазіргі кезде бизнес маржиналдылығын, тұрақтылығын және икемділігін арттыруға бағытталған өзгерістер жүріп жатқанын айтты. Сондай-ақ, Rolls-Royce баж салығының жанама түрде экономикалық өсім мен инфляцияға әсерін мұқият қадағалап отырғанын мәлімдеді.
2025 жыл бойынша компания операциялық табыстың 2,7–2,9 млрд фунт стерлинг (3,6–3,87 млрд доллар) деңгейінде болатынын және еркін ақша ағыны да осы диапазонда болатынын күтуде.
Акциялардың жағдайы не болды
1 мамыр күні Лондон қор биржасында Rolls-Royce акциялары 3,8%-ға қымбаттап, соңғы үш аптадағы ең жоғары деңгейге жетті. Жыл басынан бері акциялар 36%-ға, ал соңғы 12 айда 90%-дан астам өскен. 2023 жылы компания FTSE 100 индексіндегі ең табысты компаниялардың бірі болды. MarketWatch деректеріне сүйенсек, соңғы екі жылда Rolls-Royce акциялары жыл сайын орта есеппен 124%-ға өскен — бұл көрсеткіш Palantir мен Nvidia-дан кейінгі үшінші орын.
UBS аналитигі Ян Дуглас 1 мамырда компания акцияларын сатып алуға кеңес беретін «Buy» рейтингін растады, ал мақсатты бағасы — 10 фунт. Бұл қазіргі бағамен салыстырғанда шамамен 33%-ға жоғары.
The Wall Street Journal деректеріне сәйкес Уолл-стрит сарапшыларының басым бөлігі де акцияны сатып алуға кеңес береді: 18 сарапшының ішінде 14-і — «Buy» және «Overweight», екеуі — «Hold», тағы екеуі — «Sell».
Контекст
Rolls-Royce — Airbus кең фюзеляжды ұшақтарының жалғыз қозғалтқыш жеткізушісі және Boeing 787 үшін де жеткізуші. Компанияның АҚШ-та ірі өндірістік қуаттары, Англияда негізгі базаcы, Германияда энергетикалық жүйелер шығаратын бөлімшесі және Қытайда қызмет көрсету орталығы бар.
2024 жылдың қорытындысы бойынша, компания операциялық табысты 57%-ға, ал табысты 16%-ға арттырып, сарапшылардың болжамдарынан асып түсті. Осы нәтижелерден кейін Rolls-Royce бес жылдық үзілістен кейін дивиденд төлеуді қайта бастайтынын және 1 млрд фунт көлемінде акцияларды кері сатып алу бағдарламасын іске қосатынын мәлімдеді. Бағдарлама 2025 жылдың соңына дейін жүзеге асады.
