McDonald’s-тың АҚШ-тағы сатылымы 2020 жылдан бері алғаш рет қатты төмендеді
McDonald’s жыл басынан бері АҚШ-та соңғы бес жылдағы сатылымның ең үлкен деңгейдегі төмендеуіне тап болды. Дональд Трамптың сауда саясаты тудырған экономикалық белгісіздік тұтынушыларды фастфудқа жұмсайтын қаражатын азайтуға мәжбүр етуде. Соған қарамастан, Уолл-стрит сарапшылары McDonald’s-тың промонауқандар арқылы келушілерді қайта тарту әрекеттері өз нәтижесін береді деп сенеді — биыл компания акциялары нарықтағы құлдырауға қарамастан 10%-ға өсті.
Толығырақ
McDonald’s АҚШ-тағы салыстырмалы сатылымы (кемі 13 ай жұмыс істеп тұрған мейрамханалардағы көрсеткіш) бір жыл ішінде 3,6%-ға төмендеді. Компания мәліметінше негізгі себеп — келушілер санының азаюы.
Бұл — 2020 жылдың екінші тоқсанынан бергі ең нашар нәтиже, сол кезде пандемияға байланысты мейрамханалар жабылып, сатылым 8,7%-ға құлдыраған еді, деп жазады Financial Times. Аналитиктер сатылымның азаюын болжағанымен, мұндай ауқымда болады деп күтпеген: Visible Alpha деректеріне сәйкес, консенсус-прогноз тек 1,4% төмендеуді болжаған.
Нью-Йорктегі премаркетте есеп жарияланғаннан кейін McDonald’s акциялары 1,6%-ға арзандады.
McDonald’s не тағы хабарлады
— Жаһандық салыстырмалы сатылымдар 1%-ға қысқарды. Компания өткен жылдың кібісе болғанын еске салып отыр — қосымша күнді есептемегенде, 2025 жылдың басындағы сатылымдар өзгеріссіз қалар еді.
— Консолидирленген табыс 3%-ға төмендеп, шамамен 6 млрд долларға жетті. Бұл сарапшылар күткен деңгейден төмен. McDonald’s мұны Ұлыбританиядағы сатылымдардың төмендеуімен байланыстырды.
— Таза табыс 3%-ға азайып, 1,9 млрд долларға түсті. Бұл да нарық болжамынан төмен болғанын FT атап өтті.
— Компания жыл соңына дейінгі болжамын өзгертпеді. McDonald’s 3–3,2 млрд доллар көлемінде капиталдық шығындар жоспарлап отыр. Сондай-ақ операциялық маржа орташа немесе жоғары 40%-дар деңгейінде болады деп күтуде.
Инвесторлар үшін маңызды не?
UBS, HSBC және Morgan Stanley аналитиктері McDonald’s акцияларын “қорғаныс активі” деп сипаттап отыр, деп жазады Yahoo Finance. Биыл компанияның акциялары 10% өсіп, ал жалпы нарық шамамен 5%-ға құлдыраған.
Инвесторлар арзан әрі қолжетімді тамақ экономикалық тұрақсыз кезеңде тұтынушыларды McDonald’s-қа қайта тартатынына сенеді, деп жазады FT. Биыл да компания алдыңғы жылдардағы жарнамалық ұсыныстарды жалғастырып, 5 долларлық түскі ас, Minecraft-қа арналған фигуралары бар комбо-жинақтар сияқты кампаниялар өткізді.
Контекст
The New York Times хабарлауынша McDonald’s көрсеткіштері төмен табысты тұтынушылардың көңіл-күйі мен шығындарына қатысты барометр саналады. Жыл басындағы сатылымның құлдырауы сауда соғысының тұтынушыларды алаңдата бастағанын білдіреді, дейді Bloomberg. Бұл кейбір тауарлардың қымбаттауына әкелуде.
«Бүгінде тұтынушылар белгісіздікпен бетпе-бет келуде», — деп мойындады McDonald’s бас директоры Крис Кемпчински, АҚШ-тағы сатылымдар жайлы пікір білдіре отырып. Дегенмен ол McDonald’s кез келген қиын жағдайда нарық үлесін сақтап, тіпті арттыра алатынына сенімді екенін жеткізді.
Сонымен қатар, McDonald’s — Трамптың сауда саясаты аясында антиамерикалық көңіл-күй күшейген тұста сарапшылар назарындағы америкалық ең танымал брендтердің бірі. Компания табысының жартысынан астамы шетелдерден түседі, ал Қытай — McDonald’s үшін екінші ірі әрі ең жылдам өсіп жатқан нарық.
Бірінші тоқсанда McDonald’s Канада мен Еуропаны қамтитын халықаралық нарықтардағы сатылымның 1%-ға төмендегенін хабарлады (өткен жылы бұл өсім 2,7% болған). Ал Жапония, Қытай және Таяу Шығысты қамтитын сегментте сатылым 3,5%-ға өсті. Айта кетейік, бұл аймақ 2024 жылы Израиль мен ХАМАС соғысынан кейін америкалық брендтерге қарсы бойкоттың салдарынан сатылым төмендеген орындардың бірі болған.
