Citi 17 жылдан кейін алғаш рет Burberry акцияларын сатып алуға кеңес берді
Citigroup сарапшысы 2008 жылғы дағдарыстан кейін алғаш рет әйгілі тренчтер өндірушісі Burberry компаниясына қатысты бағалауын қайта қарап, енді оның акцияларын сатып алуға кеңес беріп отыр. Сарапшының пікірінше, компанияның жаңа стратегиясы брендтің танымалдылығы мен тартымдылығын арттыруға көмектеседі. Осы жаңалықтан кейін Burberry акциялары Лондон биржасында өсті.
Толығырақ
Citigroup сарапшысы Тома Шове 1 мамыр күні Burberry Group акцияларына қатысты рейтингін «Neutral» деңгейінен «Buy» деңгейіне көтеріп, яғни акцияларды сатып алуға кеңес берді, деп хабарлайды Bloomberg.
Burberry акцияларын көп жылдан бері бақылап келе жатқан Шове 2008 жылдан бері алғаш рет өз бағасын оң бағытта өзгертті. Әлемдік қаржы дағдарысынан кейін сарапшы бұл қиындықтарға тап болған люкс брендке қатысты бейтарап көзқарасты ұстанып келген, деп атап өтті Bloomberg.
«Иә, біраз шыдам қажет болуы мүмкін, бірақ алдағы үш жыл ішінде компанияны жаңғырту әлеуеті жоғары екенін ескерсек, инвестиция салу белгілі бір тәуекелмен байланысты болғанымен, болашақ табыс мүмкіндігі жоғары бағалануда», — деп жазды Шове өз аналитикалық жазбасында. Бұл жазбамен Bloomberg-те таныса өтті. Citi сарапшысы жаңа бас директор Джошуа Шульман жүзеге асырып жатқан Burberry Forward стратегиясы брендтің танымалдылығы мен тартымдылығын арттырады деп күтеді.
Акциялардың жай-күйі
Burberry акциялары бейсенбі күні Лондондағы сауда барысында бір сәтте 4%-ға өсті. Алайда жыл басынан бері компанияның қағаздары шамамен 25%-ға арзандаса, соңғы 12 айда олардың бағасы 35%-ға төмендеген.
Соңғы екі жылда компанияның акциялары күрт құлдырап, тарихи ең жоғары деңгейден кейін шамамен 70%-ға төмендеді. Бұл жағдай брендтің премиум сегментке тиімді ене алмауымен байланысты, деп жазады Bloomberg. Сонымен қатар, қымбат тауарларға деген жалпы сұраныстың азаюы компания акцияларына қосымша қысым түсірді. Осы факторлардың әсерінен былтыр Burberry Ұлыбританияның жетекші FTSE 100 индексінен шығып қалды.
Goldman Sachs сарапшысы Луиза Синглхерст 29 сәуір күні Burberry акцияларына қатысты «ұстап тұру рейтингін сақтап қалды. Оның мақсатты бағасы 30 сәуірдегі жабылу бағасымен салыстырғанда акциялардың 45%-ға дейін өсу әлеуетін болжайды.
FactSet деректеріне сәйкес, қазіргі уақытта Burberry акцияларын сатып алуға тек алты сарапшы кеңес беріп отыр (Buy және Overweight рейтингтері). Ал 20 сарапшының бесеуі акцияларды сатуға кеңес берсе, қалған тоғызы — портфельде ұстап тұруды жөн көреді.
Контекст
Қаңтар айының соңында британдық люкс тауар өндірушісі үшінші тоқсанда салыстырмалы бөлшек сауда сатылымының 4%-ға төмендегенін хабарлады (28 желтоқсанда аяқталған). Дегенмен, бұл нәтиже сарапшылардың күткенінен әлдеқайда жақсы болды — олар сатылым 12%-ға төмендейді деп болжаған еді. Burberry сатылымы барлық өңірлерде болжамнан жақсы шыққанымен, жалпы кіріс шамамен 7%-ға қысқарды.
Сарапшылар бұл есепті бренд үшін үміт ұялататын белгі ретінде бағалады. «Біз бұл нәтижелерді компания үшін дұрыс бағытта жасалған алғашқы, әрі бастапқы кезеңдегі қадам ретінде бағалаймыз», — деп жазды RBC сарапшылары. Олардың айтуынша, нәтижелердің жақсаруына бірнеше қарапайым қадам әсер еткен: дүкендердің көрінісін жаңарту, өнімдерді ұсыну тәсілін жақсарту, негізгі өнім санаттарына басымдық беру және, әрине, жеңілдіктердің оң ықпалы. Мерекелік маусымда кейбір Burberry өнімдеріне 50%-ға дейін жеңілдіктер жасалған. Алайда Barclays сарапшыларының пікірінше, мұндай ауқымды жеңілдіктер брендтің беделіне кері әсерін тигізуі мүмкін.
Burberry келесі қаржылық есебін 14 мамырда жариялайды деп күтілуде.
