Microsoft Sony-ден кейін Xbox ойын консолін 20%-дан астам бағаға қымбаттатты
Microsoft 1 мамырдан бастап Xbox ойын консолінің бағасын көтеріп, кейбір видеойындардың да қымбаттайтынын хабарлады. Компания бұл шешімді «нарық жағдайы» мен өндіріс шығындарының өсуімен түсіндірді. Бұған дейін, сәуір айында, PlayStation консолінің бағасын Sony да көтерген болатын. Microsoft импорттық баж салығына қатысты пікір білдірмесе де, сарапшылардың айтуынша, Xbox пен Surface компьютерлерін өндіретін бөлім сауда алымдарынан зардап шегуі мүмкін, ал компанияның негізгі бизнесі бұл тәуекелдерден жалпы алғанда қорғалған.
Толығырақ
Microsoft 1 мамырдан бастап Xbox консолінің барлық нұсқаларына ұсынылған бөлшек сауда бағасы кемінде 20%-ға өсетінін хабарлады. Ең арзан модель — 512 ГБ жадты Xbox Series S — АҚШ-та бірден 26%-ға қымбаттайды (300 доллардан 380 долларға дейін). Ал ең қымбат нұсқа — Xbox Series X 2TB Galaxy Special Edition — 21%-дан астамға өсіп, 600 доллардан 730 долларға дейін қымбаттайды. Сонымен қатар, Microsoft биыл жылдың соңындағы мерекелік маусымнан бастап кейбір видеойындардың бастапқы бағасы 80 долларға дейін көтеріледі деп мәлімдеді.
Бағаның көтерілетіні туралы хабарлама Microsoft-тың тоқсандық есебі жарияланғаннан кейінгі күні шықты. Есепте компанияның жалпы геймингтен түсетін табысы бір жылда 5%-ға артқаны көрсетілген, алайда құрылғылар (ең алдымен ойын консолі) сатылымынан түскен табыс 6%-ға азайған.
Xbox бағасының қымбаттауы туралы хабарламада АҚШ президенті Дональд Трамп енгізген импорттық баж салығы тікелей айтылмағанымен, онда «нарықтық жағдай» және «өнім әзірлеу шығындарының өсуі» себеп ретінде көрсетілген. Сәуір айында Трамп смартфондар мен компьютерлерге салынатын баж салығын алып тастаған еді, яғни бұл құрылғылар енді кедендік төлемдерден босатылды. Алайда ойын консолдері бұл жеңілдіктер тізіміне кірмей, бұрынғыдай салыққа жататын болды.
Microsoft АҚШ-тың импорттық баж салығының әсерінен жалпы алғанда қорғалған, өйткені ол негізінен бағдарламалық қамтамасыз етуді әзірлеумен айналысады, деп атап өтті Synovus Trust компаниясының аға портфельдік басқарушысы Дэн Морган. Оның айтуынша, компанияға тікелей баж салығының әсері тиюі мүмкін жалғыз бизнес бағыты — бұл Xbox ойын консолі мен Surface компьютерлері.
Контекст
Xbox бағасының қымбаттауы Трамп енгізген баж салығынан кейінгі видеоойын индустриясындағы кезекті ірі баға өсімі болды, деп хабарлайды Forbes. Forbes-тің мәліметінше, Xbox бағасының қымбаттауы Трамп енгізген баж салығынан кейінгі видеойын индустриясындағы кезекті ірі баға өсімі болды. Сәуір айының ортасында Sony Еуропа, Таяу Шығыс, Африка, сондай-ақ Аустралия мен Жаңа Зеландияда PlayStation 5 ойын консолінің бағасы көтерілетінін хабарлады. Мысалы, Еуропа мен Ұлыбританияда баға 25%-ға өседі. Дегенмен, PS5 Pro-ның ең қымбат және жетілдірілген нұсқасының бағасы өзгеріссіз қалды.
Сәуір айында жапондық Nintendo да көпшілікті таңғалдырды — компания жаңа Switch 2 консолінің бағасын 450 долларға бағалады, деп жазады Forbes. Бұл 2017 жылы алғашқы Switch сатылған 300 доллармен салыстырғанда әлдеқайда жоғары. Nintendo приставкаларының көпшілігі Қытай мен Вьетнамда шығарылады. Forbes келтірген NYU бизнес мектебінің профессоры Джуст ван Дрененнің айтуынша, баж салығы Nintendo-ға «осал сәтте» соққы берді. Компания тіпті алдын ала тапсырыстарды уақытша тоқтатып «сауда алымдарының әсері мен нарықтағы жағдайды нақты бағалау» үшін кідіріс жасады, деп толықтырды Forbes.
Жалпы алғанда, Трамп енгізген импорттық баж салығы ойын индустриясына ауыр соққы болуы мүмкін, себебі бұл саладағы жетекші компаниялар негізінен физикалық құрылғылар (hardware) өндіреді және тауарларын бір елден екінші елге тасымалдауға мәжбүр. АҚШ — Sony мен Nintendo үшін аса маңызды нарықтардың бірі. Мысалы, Sony-дің кірісінің 29%-ы, ал Nintendo-ның 37%-ы осы елден түседі. PlayStation 5, Xbox және Nintendo Switch консольдерінің барлығы негізінен Қытайда өндіріледі. Мәселен, 2024 жылы Nintendo-ның АҚШ-тағы жеткізілімдерінің 60%-ы Қытайдан келген, деп мәлімдеді The Wall Street Journal.
