Миллиардер Экман Howard Hughes арқылы жаңа инвестициялық алып құруды жоспарлап отыр
Pershing Square Capital Management хедж-қоры 900 млн доллар инвестиция жасап, Howard Hughes девелопер компаниясының жаңадан шығарылған 9 млн акциясын 100 доллардан сатып алады. Сөйтіп, қор 46,9% үлеске ие болады. Бұл келісім 6 мамырда жарияланды.
Егжей-тегжейлі
Pershing бұл акциялар үшін 2 мамырдағы бағасынан 48% артық төлейді. Сонымен қатар Howard Hughes хедж-қорға тоқсан сайын 3,75 млн доллар базалық комиссия мен инфляциядан жоғары нарықтық өсімнен 0,375% басқару төлемін береді.
Экман Howard Hughes-ті әртараптандырылған инвестициялық холдингке айналдыруды көздейді. Бұл — Уоррен Баффеттің жолы: ол бір кездері тоқыраудағы Berkshire Hathaway тоқыма компаниясын ең ірі инвестициялық алпауытқа айналдырған еді. Қазір Berkshire 1 трлн доллардан аса бағаланады және портфелінде сақтандыру, энергетика, теміржол, бөлшек сауда және 300 млрд доллардан асатын қолма-қол қаржы бар.
Экман: «Баффет үлкен бизнесті «пілді аулау» деп атаса, мен алдымен «кіші жануарлардан» бастаймын», — дейді.
Контекст
Бұл мәміле бірнеше айға созылған келіссөздерден кейін жүзеге асты. Экман Howard Hughes-ті сатып алу жоспарын алғаш рет 2024 жылдың тамызында жариялады, сол кезде оның қоры девелопердің 37,6% акциясына иелік ететін. 2025 жылдың қаңтарында Экман бір акцияға 85 доллар ұсынып, кейін ақпанда бұл соманы 90 долларға дейін өсірді.
Наурызда Howard Hughes директорлар кеңесі бұл ұсынысты «қазіргі нұсқада қолайсыз» деп бағалап, тараптар мәмілені уақытша тоқтатты. Бірақ мамырда келісімге қол қойылды.
Нарық реакциясы
Howard Hughes акциялары 2,9%-ға қымбаттап, 69,4 долларға жетті. MarketWatch дерегінше сарапшылар бұл қағаздарды сатып алуға кеңес береді. Орташа мақсатты баға — 90,67 доллар, бұл соңғы жабылу бағасынан 30% жоғары.
