Британдық Deliveroo акциялары өсті — оны АҚШ-тың нарық көшбасшысы сатып алмақ
2025 жылғы 6 мамырда Лондон биржасында Ұлыбританияның шағын капиталы бар Deliveroo тағам жеткізу сервисінің акциялары 2,5%-ға қымбаттап, соңғы екі жылдан астам уақыт ішіндегі ең жоғары деңгейге жетті. Бұл компанияны АҚШ-тағы ең ірі ойыншы — нарық көшбасшысы DoorDash сатып алмақ. Оның Nasdaq-тағы нарықтық капитализациясы $87 млрд-тан асады. Сарапшылардың айтуынша бұл бірігу Uber-дің Ұлыбритания нарығындағы позицияларына қауіп төндіреді.
Егжей-тегжейлі
Deliveroo акциялары 6 мамыр, сейсенбі күні 2,5%-ға өсіп, 176,4 пенс немесе 1,76 фунтқа жетті. Бұл 2022 жылдың қаңтарынан бергі ең жоғары баға. Ал DoorDash акциялары Нью-Йорк премаркетінде шамамен 4%-ға арзандады.
Өсімнің себебі — DoorDash компаниясының Deliveroo-ны сатып алу туралы түпкілікті келісімге келгені. Deliveroo директорлар кеңесі мәмілені қолдауды ұсынды.
Келісім бойынша Deliveroo-ның барлық қолданыстағы және шығарылуы жоспарланған жай акциялары 2,9 млрд фунт стерлингке ($3,86 млрд) бағаланды — бұл бір акция үшін 180 пенс. Бұл 4 сәуірдегі жабылу бағасынан шамамен 44%-ға жоғары. Еске салсақ, бұл — DoorDash сатып алу ұсынысын жолдағанға дейінгі соңғы жұмыс күні. 5 мамырда Deliveroo акциялары 172,1 пенс бағасымен жабылған болатын.
Алайда, The Guardian басылымы Deliveroo IPO кезінде (2021 жылы) акциялар 390 пенспен ұсынылғанын, бірақ сол күні 26%-ға құлдырағанын еске салады.
Мәмілені 2025 жылдың төртінші тоқсанында аяқтау жоспарланған. Бірақ оны әлі Deliveroo акционерлері бекітуі тиіс.
DoorDash неге Deliveroo-ны сатып алғысы келеді
АҚШ-та мейрамханалық тағам жеткізу нарығының үштен екі бөлігін иеленетін DoorDash халықаралық ауқымын кеңейткісі келеді. Bloomberg дерегінше, қазір компания 30-дан астам елде жұмыс істейді, ал Deliveroo-ны сатып алумен бұл сан 40-тан асады. Біріккен компания ай сайын шамамен 50 миллион белсенді қолданушыға қызмет көрсетеді.
2024 жылы Deliveroo табысы 2 млрд фунтқа жетті, ал DoorDash табысы — $10,7 млрд.
Бұл сатып алу DoorDash-тың АҚШ-тан тыс нарықтағы бизнесін үш есеге арттырады. Сонымен қатар финдік еншілес Wolt бөлімшесімен қайталанбайды және монополияға қарсы заңнамаларды бұзбайды, деп жазады Bryan Garnier сарапшысы Клемент Женело (The Wall Street Journal келтірген).
BBC бұл жағдайды Лондон биржасында тіркелген тағы бір компанияның америкалық ойыншы тарапынан жұтылуы деп бағалайды. Бұл Ұлыбританиядағы инвестициялық ахуалға алаңдаушылық туғызады және биржаның рөлін қайта қарауға итермелейді.
Hargreaves Lansdown компаниясының аға акциялар аналитигі Мэтт Бритцман BBC-ге DoorDash Ұлыбританияда бәсекелестерін ығыстыруды көздеп отырғанын, ал бұл мәміле Uber үшін нақты қауіп екенін айтты. «Бұл келісім Ұлыбритания нарығын DoorDash пен Uber арасындағы қатаң бәсекелестікке айналдырады», — дейді ол.
