Безос Волождың ЖИ жобасына қаржы салды. Nebius акциялары күрт өсті
Amazon негізін қалаушы Джефф Безостың қоры Toloka сервисіне инвестиция құйды. Сервис бұрын Yandex N.V. атауымен белгілі болған, қазір Nebius Group-қа тиесілі, компания жетекшісі — Аркадий Волож. Инвестицияның қаржылық мәліметтері ашық айтылмаған, дегенмен Nebius енді Toloka-дағы дауыс беру құқығына ие емес. Бұл жаңалықтан кейін 7 мамырда компания акциялары 11%-ға дейін өсті.
Егжей-тегжейлі
Джефф Безостың Bezos Expeditions қоры Nebius Group-қа қарасты Toloka жобасына стратегиялық инвестиция кезеңін жетекшілік етті Бұл туралы ақпарат Nebius компаниясының сайтында жарияланды. Toloka ЖИ дамуын жеделдету үшін деректердің сапасы мен дәлдігін тексерумен айналысады.
Инвестиция көлемі мен шарттары жарияланған жоқ. Алайда Nebius компаниясы мәміледен кейін «маңызды қаржылық үлесті» сақтап қалатынын мәлімдеді. Соған қарамастан, Nebius Group Toloka сервисіндегі дауыс беру бақылауын жоғалтады, бірақ акционер ретінде қала береді, деп мәлімдеді Toloka бас директоры Ольга Мегорская сервис сайтындағы жазбасында.
Келісім туралы қосымша ақпарат
Инвестициялар нәтижесінде Михаил Парахин басқаратын Toloka-да директорлар кеңесі құрылады. Ол бұрын «Яндекс» компаниясының техникалық директоры болған, сондай-ақ ұзақ жылдар бойы Microsoft-та жұмыс істеген, ал 2024 жылғы қыркүйектен бастап Shopify-дың техникалық директоры қызметін атқарады. Toloka-ға жасалған инвестициялық кезеңін Парахиннің қатысуымен өткен, деп мәлімдеді компания бас директоры Ольга Мегорская, ол да директорлар кеңесіне кіреді. Nebius бас директоры Аркадий Волож пен Чарльз Райан Toloka-да атқарушы емес директор ретінде қызмет етеді (Райан Nebius-те де осындай лауазымда).
«Джефф Безос пен Михаил Парахин секілді әлемдік деңгейдегі стратегиялық инвесторлардың тартылуы — Toloka бизнесі мен басқару сапасының жоғары деңгейін дәлелдейтін маңызды көрсеткіш», — деді Nebius Group бас директоры Аркадий Волож, деп хабарлады компания.
Nebius хабарламасында инвестициялар Toloka-ның дамуы үшін маңызды қадам екені айтылған. Бұл қадам компанияға жылдам ауқымдануға және стратегиялық бағытын нақтылауға мүмкіндік береді. Әлемде ЖИ негізінде деректерді өңдеуге арналған сенімді әрі сапалы шешімдерге сұраныс артып келе жатқан жағдайда бұл ерекше маңызды болмақ. Ольга Мегорскаяның айтуынша, инвестициялар адам мен ЖИ мүмкіндіктерін біріктіретін және автоматтандыру мен адами тәжірибенің бірегей үйлесіміне негізделген аралас шешімдерді әзірлеуге жол ашады.
Nebius тобы енді Toloka-дағы дауыс беру бақылауынан айырылғандықтан, бұл сервистің нәтижелерін қаржылық есебіне қоспайтынын ескертті. Оның орнына, компания Toloka-дағы инвестициялық үлесі туралы жеке есеп беретінін мәлімдеді. 2024 жылы Toloka-ның табысы 140%-ға өсті, деп хабарлады Nebius, бірақ нақты сандар келтірілмеген. Ал бүкіл Nebius компаниясының табысы бір жылда 5,6 есе өсіп, $117,5 млн-ға жеткен.
Акциялардың жай-күйі
Сәрсенбі күні Nasdaq биржасындағы сауда барысында Nebius Group N.V. акциялары 11,3%-ға қымбаттап, күн ішінде $27,87 көрсеткішке дейін жетті. Бұл — 25 наурыздан бергі ең жоғары көрсеткіш. 2025 жылдың басымен салыстырғанда қағаздар 2,2%-ға арзандаған, алайда өткен жылғы өрсеткішпен салыстырғанда 43%-ға өскен.
MarketWatch деректеріне сәйкес, Nebius акцияларына тек төрт сарапшылық баға берілген, және барлығы да сатып алуға кеңес береді: екеуі — Buy, екеуі — Overweight («нарықтан жоғары»). Орташа мақсатты баға — $44, бұл акциялардың соңғы жабылу құнымен салыстырғанда 76%-ға өсуі мүмкін екенін көрсетеді.
Контекст
Nebius компаниясының негізін қалаушы әрі басшысы Аркадий Волож — Ресейдегі ең ірі технологиялық компаниялардың бірі саналатын «Яндекс» компаниясының да тең құрылтайшысы. 2024 жылдың тамызына дейін Nebius Yandex N.V. деп аталып келді. 2024 жылы Ресеймен байланысын толық үзгеннен кейін, компания Nasdaq биржасында акцияларын қайта саудалауға рұқсат алды. Сауда 2022 жылдың ақпанынан бері тоқтап тұрған еді.
Nebius генеративті ЖИ саласына қажетті есептеу қуатын жалға беру қызметін ұсынады және бұл бағытта Amazon, Google және Microsoft секілді алыптармен бәсекелес, деп хабарлайды Bloomberg. 2024 жылдың соңында компания АҚШ пен басқа да негізгі нарықтарда қосымша қуат көздерін дамыту үшін Nvidia және өзге инвесторлардан 700 млн доллар инвестиция тартқан.
