Ағылшын банкі негізгі мөлшерлемені төмендетті
Бұл — соңғы екі жылдағы ең төменгі деңгейге дейінгі төмендеу. Реттеуші инфляция мен Британия экономикасының өсуіне қатысты болжамдарын да жақсартты.
Ағылшын банкі негізгі мөлшерлемені 25 базистік пунктке — 4,25%-ға дейін төмендетті. Экономистер мұндай шешімді күткен, алайда ақша-несие саясаты комитетінің мүшелері тосыннан түрлі көзқарас білдірді. Олар мөлшерлемеге қатысты үш түрлі шешімге дауыс берген. Бұған дейін АҚШ-тың Федералды резерв жүйесі өз базалық мөлшерлемесін өзгеріссіз қалдырған еді.
Егжей-тегжейі
Ағылшын банкі 8 мамырда негізгі мөлшерлемені 25 базистік пунктке — 4,25%-ға дейін төмендетті. Бұл шешім Bloomberg сауалнамасына қатысқан экономистердің күткен болжамымен сәйкес келді. Алайда ақша-несие саясаты комитетінің тоғыз мүшесінің бесеуі ғана мөлшерлемені төмендетуді қолдаған. «Пікірлер үш түрлі нұсқаға бөлінді. Бұл әдеттен тыс жағдай», деп атап өтті MarketWatch. Комитеттің екі мүшесі мөлшерлемені бірден 0,5 пайыздық пунктке төмендетуді ұсынса, қалғандары оны өзгеріссіз қалдыруды жақтады.
Бұл төмендету мөлшерлеме 5,25%-дық шегіне жеткеннен кейін төртінші рет болып отыр. Қазір оның деңгейі Ұлыбританияда шамамен АҚШ-пен теңесті. Онда Федералды резерв жүйесі сәрсенбі күні негізгі мөлшерлемені 4,25–4,5% аралығында қалдырған. Ағылшын банкі бұл шешімді АҚШ президенті Дональд Трамптың Ұлыбританиямен сауда келісіміне қол жеткізілгені туралы мәлімдемесінің аясында жариялады.
Ағылшын банкі 2025 жылдың бірінші тоқсанында Ұлыбританиядағы инфляция орта есеппен 2,8% болғанын хабарлады. Реттеуші баға өсімінің шарықтау шегі бойынша болжамын да жақсартты: Енді үшінші тоқсанда инфляция 3,75%-тің орнына 3,5% болады деп күтілуде. Ал төртінші тоқсанда бұл көрсеткіш 2%-дық мақсатты деңгейге жақындайды. Ал бұл межеге 2027 жылдың бірінші тоқсанында жетуі мүмкін. Яғни, ақпандағы болжамнан тоғыз ай ерте орындалуы ықтимал. Дегенмен, реттеуші бұл болжамға АҚШ енгізіп отырған баж салығына байланысты макроэкономикалық тұрақсыздық қауіп төндіруі мүмкін екенін атап өтті.
Ағылшын банкі 2025 жылға арналған ЖІӨ өсімі жөніндегі болжамын да жақсартты. Енді 0,75%-тің орнына 1% өсім күтіп отыр.
Reuters хабарлауынша, шешім жарияланғаннан кейін фунт стерлинг бағамы 1,326 доллардан 1,332-ге долларға дейін нығайды. Ал британдық FTSE 100 қор индексі 0,25%-ға өсті.
Сарапшылар не айтты?
«Бұл шешім ешкім үшін тосынсый болмады. Алайда алдағы уақытта Ағылшын банкінің мөлшерлемені төмендету мүмкіндігі қазіргі нарық күткен деңгейден әлдеқайда шектеулі болады. Ұлыбританияның негізгі мәселесі — өндірістік қуаттардың әлі де айтарлықтай шектеулі болуы», — деді Schroders компаниясының аға экономисі Джордж Браун Reuters басылымына берген түсіндірмесінде. Оның пікірінше, қазіргі цикл аясында Ағылшын банкі мөлшерлемені тек 4%-ға дейін ғана түсіре алады.
«Ақша-несие саясаты комитетінің мүшелері экономикаға әсер етіп жатқан көп күйзеліске қалай жауап беру керектігі жөнінде айтарлықтай ұйғарым жасай алмай отыр. Бұл өте сирек кездесетін жағдай және Ағылшын банкінің нарыққа саясаттың ықтимал бағыты туралы нақты белгі беруін қиындатады. Дегенмен банк мөлшерлемені әрі қарай төмендету «біртіндеп және сақтықпен» жүргізіледі деген ұстанымын сақтап отырғандықтан, келесі төмендету маусым айында болады деген ықтималдық едәуір азайған», — деді Aberdeen компаниясының бас экономисінің орынбасары Люк Бартломью. Ол сондай-ақ реттеуші биыл кемінде тағы екі рет мөлшерлемені төмендетеді деп санайтынын айтты. Бірақ бұған дейін экономика баж салығы мен салық өзгерістеріне қалай бейімделетінін көрсететін қосымша деректерді күтеді.
«Дауыс беру нәтижесі күткендегіден әлдеқайда қатаң болды. Мөлшерлемені сақтауды жақтаған екі комитет мүшесі, ең алдымен, нарықтың мөлшерлеме төмендеуін тым белсенді түрде бағаларға енгізіп қойғанына және базалық инфляция жоғары деңгейде қалуы мүмкін деген белгілерге алаңдаулы. Бұл инфляцияның жоғары қалуы компаниялардың сәуірде еңбекақы мен салықтардың өсуінен туындаған шығындарды тұтынушыларға артып жіберуімен байланысты болуы мүмкін», — деп толықтырды Berenberg компаниясының аға экономисі Эндрю Уишарт. Ол маусым айында Ағылшын банкі мөлшерлемені өзгеріссіз қалдырып, тамыз айына қарай өз ұстанымын қайта қарайды деп болжайды.
