АҚШ акциялары өсті: Трамп сауда баждары енгізілгеннен кейінгі алғашқы келісімге келді
АҚШ президенті Дональд Трамп пен Ұлыбритания премьер-министрі Кир Стармер жаңа сауда келісімі жасалғанын жариялады. Бұл — Трамп сәуір айының басында Америка «айна баждарын» енгізетінін хабарлағаннан кейінгі алғашқы келісім.
Келісімге әлі ресми түрде қол қойылған жоқ, ал оның нақты шарттары алдағы апталарда талқылануы тиіс. Соған қарамастан, инвесторлар бұл жаңалықты оң қабылдап, АҚШ акцияларының бағасы жаңа сауда келісімдері жасалады деген үмітпен тез өсе бастады.
Трамптың мәлімдемесіне дейін Ұлыбританияның FTSE қор индексі төмендеп, сауда сессиясы соңына дейін теріс аймақта қалды. Бірақ Rolls-Royce компаниясының акциялары күрт қымбаттады.
Егжей-тегжейі
Дональд Трамп 8 наурыз, бейсенбі күні таңертең Ақ үйдің Овал кабинетінен Ұлыбританиямен жасалған сауда келісімі туралы жариялады. Іс-шараның бейнетрансляциясын Ақ үйдің YouTube арнасы жүргізді.
Ұлыбритания премьер-министрі Кир Стармер Вашингтонда болмағанымен, келісім жарияланған рәсімге телефон арқылы қатысқан. Келісім туралы хабарламалар Ақ үй мен Ұлыбритания үкіметінің ресми сайттарында жарияланды.
АҚШ пен Ұлыбритания не туралы келісімге келді?
— Ұлыбританиядан АҚШ-қа импортталатын тауарларға салынатын сауда бажы бұрынғы деңгейде — 10% болып қалады. «Біз келіссөздерді 10%-дан бастадық, 10%-бен аяқтадық», — деді АҚШ-тың сауда министрі Говард Латник.
Трамп бастапқыда британдық тауарларға баж салығын дәл осы деңгейде белгілеген болатын, бұл көрсеткіш АҚШ-тың кейбір өзге сауда серіктестерімен салыстырғанда — мысалы, Еуропалық Одақ пен Қытаймен — әлдеқайда төмен болып шықты.
— Ұлыбритания АҚШ-қа жыл сайын 100 мың автокөлік жеткізе алады, оған 10% мөлшеріндегі баж салығы салынады. Бұл сан АҚШ-қа импортталатын британдық көліктердің дерлік толық көлемін қамтиды: Bloomberg жазғандай, 2024 жылы АҚШ Ұлыбританиядан 96 451 жаңа автокөлік импорттаған (АҚШ-тың Сауда министрлігінің дерегі бойынша).
Қазіргі уақытта АҚШ-тың шетелден әкелінетін көліктерге қолданатын базалық баж салығы 25% құрайды. Ал егер бұл келісім болмағанда, британдық автокөліктер үшін бұл көрсеткіш 27,5%-ға дейін өсетін еді.
— АҚШ-тың сауда министрі Говард Латниктің айтуынша, британдық Rolls-Royce компаниясы өндірген ұшақ қозғалтқыштары мен олардың құрамдас бөлшектері АҚШ-қа баж салығынсыз әкелінетін болады.
Ол сондай-ақ бір британдық әуе компаниясы Boeing компаниясынан жалпы құны 10 миллиард $ болатын ұшақтар сатып алатынын айтты, бірақ нақты қай компания екенін атаған жоқ.
— Ұлыбритания үкіметінің мәліметінше, АҚШ британдық болат пен алюминийге қатысты баж салығын квота шеңберінде нөлге дейін төмендетті.
Алайда Ақ үй бұл мәселеге байланысты тараптар «металл өнімдеріне қатысты балама келісімді» талқылап жатқанын хабарлады.
— Бұл келісім АҚШ-тың сиыр еті мен этанолын Ұлыбритания нарығына таратуға жол ашатын болады, — деді Трамп. Оның айтуынша, британ фермерлеріне сиыр еті бойынша баж салығынан босатылған 13 мың тонна көлемінде квота беріледі.
Трамптың айтуынша, АҚШ пен Ұлыбритания соңғы төрт апта бойы келіссөз жүргізген. Ол келісімнің толық шарттары алдағы апталарда талқыланатынын атап өтті. Дегенмен, Bloomberg хабарлағандай, Ұлыбритания америкалық тауарлардың кедендік рәсімдерін жылдамдатуға және ауыл шаруашылығы, химия, энергетика мен өнеркәсіп экспортына қатысты кедергілерді азайтуға келіскен.
Агенттік атап өткендей, Ұлыбритания АҚШ-қа экспорттайтын тауар көлемі импорттайтын көлемнен көп.
Нарық қалай қабылдады?
8 мамыр күні АҚШ-тың негізгі қор индекстері Трамптың мәлімдемесін күтіп, өсу траекториясын ұстанып ашылды және Ақ үйдегі баспасөз мәслихаты кезінде әрі кейін де өсуді жалғастырды.
АҚШ-тың басты қор индексі S&P 500 және Dow Jones индексі шамамен 1,4%-ға өсті, ал технологиялық сектор индексі Nasdaq Composite 1,8%-ға артты.
Boeing компаниясының акциялары бір сәтте 5%-ға дейін қымбаттады, ал Rolls-Royce акциялары Лондондағы сауда қорытындысы бойынша 3,7% өсті.
Ұлыбритания экономикасына келісімнің оң әсері болатынына деген үміт акциялар мен фунт стерлингтің өсуіне себеп болды, деп хабарлайды Bloomberg. Фунт еуроға қатысты күшейіп, 10 елдің валюталарынан тек доллардан ғана артта қалды, ал FTSE индексі 0,3%-ға өсті. Алайда Трамптың сөздері басталар алдында британдық индекс төмендеп, сауданың соңына дейін теріс болып қалды.
Контекст
Ұлыбританиямен жасалған келісім Дональд Трамптың АҚШ-қа импортталатын тауарларға жоғары сауда баждарын енгізгеннен кейін, кейінірек оларды уақытша тоқтатқаннан кейінгі алғашқы келісім болды. Бұл баж салығы 180-нен астам елдер мен аймақтарды, оның ішінде Ұлыбритания мен Еуроодақ елдерін қамтыды. Трамп Ұлыбританиямен жасалған келісімді «тарихи» деп атады және ол басқа елдермен жасалатын сауда келісімдері сериясындағы алғашқы келісім болатынын айтты.
«Келіссөздер жүріп жатқан басқа да көптеген келісімдер болады!» — деп жазды ол Truth Social әлеуметтік желісінде, Ұлыбританиямен жасалған келісімді хабарлай отырып. Трамп сонымен қатар Қытайдың да АҚШ-пен келісім жасауға «өте қатты қызығушылық танытып отырғанын» айтты, өйткені АҚШ Қытайға қарсы 145% көлемінде баж салығын енгізген болатын.
«Біз бәріміз түрлі ойындар ойнай аламыз: кім бірінші қоңырау шалды, кім шалмады? Бұл маңызды емес. Маңыздысы — осы бөлмеде болып жатқан нәрсенің нәтижесі», — деді Трамп, АҚШ пен Қытай ресмилерінің Швейцарияда өтетін алдағы келіссөздерін хабарлай отырып.
