Exxon, Chevron және Total компаниясы BP-ға қызығушылық танытты – акциялар 5% өсті
Британдық BP мұнай-газ компаниясының акциялары 9 мамыр күні Лондон мен Нью-Йоркте өсім көрсетті. Chevron мен ExxonMobil бастаған бірнеше ірі мұнай компаниясы BP-ны сатып алу мүмкіндігін қарастырып жатыр, деп хабарлайды Financial Times. Бұған дейін Shell-дің де қызығушылық танытқанын Bloomberg жазған. Сарапшылардың айтуынша, британдық компанияны сатып алу процесі монополияға қарсы және саяси тәуекелдерге байланысты күрделі болуы мүмкін, бірақ мұндай мәміленің әлеуетті пайдасы өте жоғары.
Егжей-тегжейлі
Лондондағы сауда қорытындысы бойынша BP акциялары 4,7% өсіп, 372,3 пенсқа жетті. Бұл — 3 сәуірден бергі ең жоғары жабылу бағасы. Ал Нью-Йорктегі саудада компанияның америкалық депозитарлық жазбалары соңғы бір айдағы максимум көрсеткіш көрсетті — 4% қымбаттап, $29,77-ге жетті.
MarketWatch басылымының жазуынша, BP акцияларының қымбаттауына жұма күні оны сатып алуға мүдделі компаниялар туралы жаңалық себеп болды. Financial Times дереккөздерге сілтеме жасай отырып, BP-ны сатып алуға ниеттілер қатарында Shell, Chevron, ExxonMobil, TotalEnergies және Біріккен Араб Әмірліктерінің ұлттық мұнай-газ компаниясы Adnoc бар екенін жазды. Бұдан бөлек, BP-нің жекелеген активтеріне Vitol мұнай трейдері де қызығушылық танытып отыр. Газет дерегінше, бұл компаниялар мәміле мүмкіндігін алдын ала есептеп үлгерген.
Бұл нені білдіреді?
BP-ны сатып алу мәмілесі монополияға қарсы және саяси тәуекелдерге байланысты аса күрделі болмақ, дегенмен мұндай келісімнен түсетін әлеуетті пайда өте жоғары, деп жазады FT басылымы. UBS-тің сарапшысы Джошуа Стоунның есептеуінше, BP-нің мұнай-газ активтері, соның ішінде Мексика шығанағындағы кен орындары мен АҚШ-тағы тақтатас бизнесі $82 млрд-қа бағаланады — бұл компанияның қазіргі нарықтық капитализациясынан асып түседі. Сонымен қатар, BP қазіргі кезде $77 млрд көлеміндегі қарыз және ұзақмерзімді міндеттемелер қысымында тұр.
Аптаның басында Bloomberg дереккөздері BP-ны сатып алу мүмкіндігін Shell компаниясы да қарастырғанын хабарлады. Басылымдардың пікірінше, бұл екі компания арасындағы мәміле Еуропа тарихындағы ең ірі келісімдердің бірі болып, Shell үшін трансформациялық өзгеріске айналар еді. Бірігу нәтижесінде пайда болатын компания тәулігіне шамамен 5 млн баррель мұнай өндіре алатын еді — бұл қазіргі Shell өндіретін көлемнен 85% көп. Жаңа компания биржадағы ең ірі жария мұнай-газ өндірушіге айналар еді. Салыстыру үшін: бірінші тоқсанда Exxon орта есеппен тәулігіне 4,6 млн баррель, ал Chevron — 3,4 млн баррель мұнай өндірген.
BP мен Shell бірігетін болса, олар әлемдік сұйытылған табиғи газ (СТГ) нарығының төрттен бір бөлігіне дейін бақылау орната алар еді және АҚШ-тағы қатысуын едәуір күшейтетін мүмкіндікке ие болады. Қазірдің өзінде Shell — әлемдегі ең ірі СТГ жеткізушісі, ал RBC сарапшыларының айтуынша, BP-ны сатып алу бұл бизнесті мүлде жаңа деңгейге көтереді.
Уолл-стриттегілер не дейді?
BP акцияларының құлдырауы бұл британдық энергетикалық алыпты жұтып қою үшін әлсіз жағдайға түсірді, дейді FT басылымына BP акцияларының 5%-дан астамына иелік ететін Elliott Management инвестициялық қорының өкілі. Егер BP бизнесінің жекелеген бағыттарын бағаласақ, компания активтерінің жиынтық құны £120 млрд фунт стерлингтен ($159,8 млрд) асады — бұл қарыздар мен міндеттемелерді есепке алмағанда. Ал бұл сома қазіргі нарықтық капитализациядан (£57 млрд) екі еседен көп.
Алайда RBC Capital Markets сарапшыларының пікірінше, Shell компаниясына BP-ны сатып алу үшін оның қазіргі нарықтық бағасынан шамамен 20% ғана жоғары сома төлеу жеткілікті болуы мүмкін. BP-нің қарыздары, міндеттемелері және 2010 жылы Мексика шығанағында орын алған мұнай төгілуіне байланысты шығындары Shell үшін «улы тостаған» іспетті, дейді сарапшылар. RBC-тің айтуынша, Shell дәстүрлі түрде қаржылық мәселелерге сақтықпен қарайды.
Алайда, бұл шығындардың бір бөлігі синергия есебінен өтелуі мүмкін: RBC сарапшыларының есептеуінше, бірігу нәтижесінде қаржылық тиімділік алғашқы жылы салық жеңілдіктерінің арқасында $1 млрд, ал екінші жылдан бастап $2 млрд көлемінде болады. Бұған қоса, капитальдық шығындар бойынша үнемдеу бірінші жылы $1 млрд, ал екінші жылы $1,5 млрд деңгейінде болуы мүмкін, дейді сарапшылар.
Сарапшылар кеңесі
Сарапшылардың басым бөлігі BP акцияларын портфельде ұстауға кеңес береді: олардың 17-сі Hold рейтингін берген. Қағаздарды сатып алуға (Buy және Overweight) ұсыныс білдірген — 11, деп жазады WSJ. Тек бір ғана сарапшы компания акцияларын сатуға (Underweight) кеңес берген.
BP-нің америкалық депозитарлық жазбаларына қатысты орташа мақсатты баға бір акция үшін $37,29-ды құрайды — бұл 8 мамырдағы Нью-Йорктегі сауда сессиясының жабылу бағасынан 23% жоғары.
