Small caps: әлсіз маусым, рецессиядан үрей жоқ
Шағын капитализациялы компаниялардың негізгі индексі Russell 2000 өсуін жалғастырып келеді. Есеп беру маусымының алдын-ала қорытындылары инвесторлардың көңілін су сепкендей басты. 5–9 мамыр аралығында small caps секторында не болды және жаңа аптадан не күтуге болады — шолудан оқи отырыңыз.
Индекс динамикасы
5–9 мамыр аптасында шағын капитализациялы компаниялардың Russell 2000 индексі небәрі 0,12 % қосып, бесінші апта қатарынан өсімді тіркеді. Салыстыратын болсақ: S&P 500 индексі бір аптада 0,47 % төмендеді. Freedom Broker аналитиктерінің апталық есебінде көрсетілгендей, өсім көшбасшылары қатарында шикізат пен материалдар, ІТ, өнеркәсіп, энергетика және ұзақ мерзімді тұтыну тауарлары секторларындағы шағын капитализациялы компаниялар болды. Бұлар — экономикамен қатар қозғалатын проциклдік бағыттар. Инвесторлар өткен аптада жарияланған деректерге осылай жауап берді, олар алдағы рецессияға қатысты алаңдаушылықты азайтты, делінген Freedom материалдарында.
Есеп беру маусымы аяқталып келеді
Қазіргі сәтте S&P 600 Small Cap индексіндегі эмитенттердің 87 % жуығы есептерін жариялады. Freedom Broker аналитиктері жазғандай енді қорытынды шығаруға болады: есеп беру маусымы инвесторларды көңіл көншітпеді.
Есеп берген компаниялардың бір акцияға шаққандағы жиынтық пайдасы (EPS) 9,2 %-ға төмендеді, ал консенсус-болжам 2,4 % өсімді күткен еді. Биылғы есеп маусымының аутсайдері байланыс секторы болды — мұнда EPS жалпы көрсеткіші жылдық мәнде 142 %-ға қысқарды. Жағымды ерекшелік — күнделікті тұтыну тауарлары секторы: мұнда EPS 45,2 %-ға өсіп, ең жоғары өсімді Cal-Maine Foods, Fresh Del Monte Produce және Simply Good Foods компаниялары көрсетті.
Аптаның көшбасшылары мен аутсайдері
Тұрғын үй сақтандыру нарығына арналған бағдарламалық жасақтама әзірлейтін Porch Group акциялары апта ішінде 61,6 % өсті: 9 мамыр, жұма күні сауда $10,31 бағасында жабылды. Өсімнің себебі — бірінші тоқсанның мықты есебі: Porch түсімі аналитиктердің консенсус болжамынан ширекке артып, $104,7 млн болды. Сондай-ақ сақтандырушы 2025 жылдың толық қорытындысы бойынша болжамын көтерді: компания енді $400–420 млн түсім (бұрынғы бағалау — $390–410 млн) және түзетілген EBITDA-ны $60–70 млн деңгейінде (бұрын — $55–65 млн) күтеді.
Аптаның ең нашар динамикасын инвестициялық компания Compass Diversified көрсетті. Ол 2024 жылға арналған қаржылық есебінің нақтылығына күмән келтіріп, еншілес Lugano Holding компаниясына қатысты ішкі тексеру бастағанын хабарлады. Тәртіп бұзушылықтар тауарлық қорларды есепке алу мен сыртқы қаржыландыру тартуына қатысты. Тексеру мен тәртіп бұзушылықтар Compass Diversified-ке тікелей қатысы болмаса да, оның аудит комитеті 2024 жылға арналған есепті қайта қарау қажет деп шешті. Сонымен қатар, Compass бірінші тоқсан есебін тапсыруды кейінге қалдырды.
Бұл хабарламадан кейін, 8 мамырда, оның котировкалары 62 %-ға құлдырады; апта қорытындысында 60,6 % жоғалтты. Жұма күні сауда жабыларда акциялар $6,96 тұрды.
Бұл аптада не күтеміз
Freedom Broker аналитиктері 13 мамыр, АҚШ-тағы инфляция деректері жарияланған күні, small caps секторында құбылмалылықтың артуы мүмкін деп болжайды. Бұл нарық сегменті үшін инфляция деректері маңызды.
Апта есеп беру маусымындағы соңғысы болады: S&P 600 Small Cap индексіндегі 14 компания және Russell 2000 құрамындағы 149 компания есеп тапсырады.
Freedom Broker шағын капитализациялы сектордағы келесі компанияларға назар аударуды ұсынады:
— Archer Aviation (қаржылық нәтижелерін 12 мамырда жариялайды);
— Gilat Satellite Networks (13 мамыр);
— Millrose Properties (14 мамыр).
