Coinbase $400 млн шығынға ұшырауы мүмкін: клиенттердің жеке деректері ұрланды
АҚШ-тағы ең ірі криптовалюта биржасы Coinbase Global клиенттерінің деректеріне жасалған хакерлік шабуыл туралы хабарлады. Компанияның мәлімдеуінше, хакер компания қызметкерлерін сатып алып, олардың көмегімен ақпаратты ұрлап, бұл мәліметтерді жария етпеу үшін $20 млн талап еткен. Coinbase бағалауынша, бұл кибершабуылдан келген шығын $400 млн-ға дейін жетуі мүмкін. Осы жаңалықтан кейін криптобиржаның акциялары 8%-дан аса төмендеді.
Егжей-тегжейлі
Coinbase АҚШ-тың Бағалы қағаздар және биржалар жөніндегі комиссиясына (SEC) жолдаған ресми мәлімдемесінде кибершабуыл фактісін растады. Құжатта 11 мамырда компаниямен өзін хакермін деп таныстырған адам байланысқа шыққаны жазылған. Ол өзінде ішкі корпоративтік құжаттар мен клиенттердің шоттарына қатысты ақпарат бар екенін айтып сендірген.
Алдын ала мәлімет бойынша, хакер клиенттердің есімдері мен байланыс деректерін, әлеуметтік сақтандыру және банк шоттарының бөлігін, жеке куәліктерінің суреттерін және басқа да бірқатар ақпаратты алған. Компанияның айтуынша, хакер бұл деректерге қол жеткізу үшін Coinbase-тің шетелдегі кейбір қызметкерлеріне пара беруі мүмкін. Ол алынған мәліметтерді жарияламау үшін $20 млн талап еткен.
Coinbase шабуыл салдарын жою және клиенттерге өтемақы төлеу үшін жұмсалуы мүмкін шығынды алдын ала $180 млн-нан $400 млн-ға дейін бағалап отыр. Компанияның ескертуінше, тергеу нәтижесіне байланысты бұл сома артуы да, кемуі де мүмкін.
«Тергеу жалғасуда, сондықтан залалдың толық көлемі әзірге белгісіз», — делінген компания мәлімдемесінде. Coinbase қанша клиенттің зардап шеккенін ашып айтпады, бірақ бұл іске қатысы бар қызметкерлердің жұмыстан шығарылғанын және хакерге төлем жасалмағанын хабарлады.
Контекст
Coinbase хакерлік шабуыл туралы мәліметті жарияламас бұрын оның акциялары АҚШ-тың негізгі қор нарығы индексі — S&P 500 құрамына енетіні хабарланған еді. Reuters агенттігіне пікір білдірген Zumo криптокомпаниясының негізін қалаушы Ник Джонстың айтуынша, криптоиндустрия мойындалған сайын «қаскөйлердің» жиі нысанасына айналып келеді.
Мысалы, ақпан айында Bybit криптобиржасынан шамамен $1,5 млрд ұрланған — бұл криптовалюта тарихындағы ең ауқымды ұрлық. Ал өткен жылы жалпы алғанда криптоплатформаларға жасалған хакерлік шабуылдар нәтижесінде $2,2 млрд көлемінде қаражат қолды болған, деп жазады Reuters (Chainalysis дерегі).
U.S. Tiger Securities компаниясының сарапшысы Бо Пейд: «бұл оқиға индустрияда қызметкерлерді қабылдау мен бақылауға қойылатын талаптардың қатаңдауына себеп болып, компаниялардың беделіне теріс әсер етуі мүмкін».
Акциялардың жай-күйі
Coinbase акциялары 15 мамырдағы сауда-саттықта бір сәтте 8,5% арзандап, осы аптада жинаған табысының бір бөлігін жоғалтты. Биыл криптобиржаның қағаздары жалпы 16% құнсызданды. MarketWatch деректеріне сүйенсек, сарапшылардың тек 40%-ы ғана инвесторларға бұл акцияларды сатып алуға кеңес береді. Уолл-стриттегі ең жиі ұсыныс — «ұстап тұру»: оны 55%-дан аса сарапшы ұстанады.
