Sidus ғарыш компаниясының акциялары әлсіз есептен кейін құлдырады
Micro-cap санатындағы Sidus Space ғарыш компаниясының акциялары 15 мамырдағы кеңейтілген саудада 12%-дан астамға арзандап, $1,59 деңгейіне дейін түсті. Ал 16 мамырдағы ерте саудада тағы 9%-ға жуық төмендеді. Инвесторларды компанияның 2025 жылдың алғашқы тоқсанындағы әлсіз қаржылық нәтижелері алаңдатты.
Егжей-тегжейлі
15 мамырда Sidus Space акциялары кеңейтілген саудада 12%-дан астамға төмендеп, $1,59-ға түсті. 16 мамыр таңертеңгі саудада құлдырау жалғасты — алғашқы минуттарда 9%-ға жуық арзандады.
Компания сауда сессиясы аяқталған соң жариялаған есебінде 2025 жылдың бірінші тоқсанында табысы жылдық есеппен 77%-ға азайып, $238 мыңды, ал таза шығын 68%-ға өсіп, $6,4 млн-ды құрағанын хабарлады.
Sidus бұл төмендеуді ескі қызметтерден жаңа коммерциялық модельдерге көшуімен байланыстырды, бірақ нақты қандай жаңашылдықтар енгізіліп жатқанына тоқталмады. Шығындардың өсуіне стратегиялық инвестициялар мен амортизациялық шығындар себеп болған.
Компанияның негізін қалаушы әрі бас директоры Кэрол Крэйг келешекте табыс қайта өседі деп сенімді. Ол бірінші тоқсанды серпіліс кезеңі деп атап, LizzieSat шоқжұлдызындағы үшінші спутниктің ұшырылғанын және жаңа технологияларды енгізудегі прогресті ерекше атады. Сонымен қатар, қорғаныс және коммерциялық секторлар тарапынан қызығушылық барын айтты.
Атап айтқанда, Sidus Lonestar Holdings стартабымен $120 млн потенциалды құны бар келісімшартты ұзартты. Бұл жоба Айда дата-орталықтар орнатуды көздейді.
Sidus жайлы не белгілі
2021 жылы құрылған бұл компания жүздеген LizzieSat шағын спутниктер тобын дамытып жатыр. Тапсырыс берушілер өз құрылғыларын осы спутниктерге орналастырып, ғарыштан деректер алады. Бұл модель Sidus-қа тұрақты табыс әкеледі. Үш спутниктің әрқайсысы алдыңғысынан арзан әрі тиімді болды.
Акциялардың жағдайы не болды
Sidus акциялары жыл басынан бері 63%-ға, соңғы 12 айда 46%-ға құлдыраған.
MarketWatch дерегінше Уолл-стриттен бір ғана сарапшы Sidus акциясын бағалап отыр. Ол акцияны сатып алуға кеңес береді, мақсатты бағасы — $10, бұл қазіргі деңгейден 5,5 есе өсу әлеуетін көрсетеді.
