АҚШ пен Израиль Газа соғысын тоқтату жоспарын келісті
АҚШ президенті Дональд Трамп Израиль премьер-министрі Биньямин Нетаньяхумен Газа секторында Израиль мен ХАМАС арасындағы соғысты тоқтату жоспарын келісіп алғанын мәлімдеді, деп жазады Bloomberg. Reuters дерегінше, Нетаньяху Израильдің «әскери мақсаттарына қол жеткізуге мүмкіндік беретін» бұл жоспарды қолдайтынын айтты.
Трамп пен Нетаньяху 29 қыркүйекте Ақ үйде кездесіп, келіссөздер жүргізді. Бірлескен баспасөз мәслихатында АҚШ президенті оның ұсынысын Таяу Шығыс пен мұсылман елдерінің бірқатар жетекшісі де қолдағанын жеткізді.
Трамптың айтуынша, келесі қадам — жоспарды ХАМАС-пен келісу. «Егер ХАМАС бұл мәміледен бас тартса, Нетаньяху топты жою үшін толық қолдау алады», — деді ол. ХАМАС өз кезегінде Трамп пен Нетаньяху кездесуінен бұрын жоспарды әлі көрмегенін, оны зерттеу қажет болатынын мәлімдеді.
Ақ үй жариялаған АҚШ жоспары 20 тармақтан тұрады. Ол 2023 жылғы 7 қазандағы шабуылдан кейін басталған соғысты дереу тоқтатуды, барлық тұтқындар мен қаза тапқандардың денелерін 72 сағат ішінде қайтаруды көздейді. Израиль шамамен 2000 тұтқынды босатып, Газаны аннексиялау немесе оккупациялау жоспарынан бас тартуға тиіс.
Өз кезегінде ХАМАС Газаны басқаруға тікелей де, жанама да араласпауға келісуі керек. Бақылау «саясаттан тыс палестиналық комитетке» беріледі, ол мемлекеттік қызметтердің жұмысын қамтамасыз етеді. Бұл органға Трамп төрағалық ететін «Бейбітшілік кеңесі» бақылау жасайды, оған Ұлыбританияның бұрынғы премьері Тони Блэрді қоса алғанда, өзге де әлемдік көшбасшылар қатысады. Құжатта сондай-ақ Газа секторын қалпына келтіру және дамыту үшін экономикалық жоспар әзірлеу қарастырылған.
АҚШ жоспарын Израильдің қолдағаны туралы жаңалық шыққан соң, израильдік шекель доллармен салыстырғанда нығайып, күндік максимумға жетті, деп хабарлайды Bloomberg.
