АҚШ пен Қытай баж салығы мен металл жеткізу көлемі бойынша мәмілеге келді
АҚШ пен Қытай сауда келісімінің шарттарын алдын ала мақұлдады. Бірақ оны әлі Дональд Трамп пен Си Цзиньпин ресми түрде бекітуі керек.
Қазіргі уақытша баж салықтары тұрақты сипат алады: АҚШ Қытайдан келетін тауарларға 55% баж салығын салады, ал Қытай америкалық өнімдерге 10% салықпен шектеледі. Сонымен қатар, екі ел сирек кездесетін металдарды жеткізу бойынша да келісімге келді. АҚШ қор нарығындағы фьючерстер алдын ала саудада төмендегенімен, негізгі сауда кезінде индекстер аздап өсе бастады. Бұл тұтынушылық инфляцияның күткеннен төмен болғаны туралы мәліметпен байланысты.
Мәміленің мазмұны
«Біздің Қытаймен жасасқан келісіміміз дайын, тек төраға Си мен менің соңғы мақұлдауымды қажет етеді. Біз 55% баж салығын аламыз, ал Қытай 10% алады. Қарым-қатынасымыз тамаша», — деп жазды АҚШ президенті Дональд Трамп Truth Social желісінде.
Ол сондай-ақ Қытайдың АҚШ-қа «барлық қажетті» сирек кездесетін металдарды қайтадан жеткізе бастайтынын айтты. Өз кезегінде АҚШ Қытайға «келісілген» шарттарды ұсынады, оның ішінде қытайлық студенттердің америкалық колледждер мен университеттерге оқуға түсуіне рұқсат беру де бар. Алайда Трамп келісімнің басқа егжей-тегжейін ашпады.
Баж салықтары сәуір айындағы ең жоғарғы деңгейден төмен қалпында сақталады. Ол кезде Вашингтон Қытай тауарларына салынатын салықты 145%-ға дейін көтерген еді. Қазіргі 55% мөлшерлеме былай бөлінеді: 10% — негізгі «жауаптық» баж, 20% — фентанил есірткісіне байланысты енгізілген салық, 25% — бұрын енгізілген өзге де баж салықтары. Бұл ақпаратты Reuters агенттігі Ақ үйдегі дереккөзге сілтеме жасап хабарлады.
Келісім 9–10 маусымда Лондонда өткен АҚШ пен Қытай делегацияларының екі күндік келіссөздерінің нәтижесінде жасалған. 10 маусымда делегация өкілдері сауда қатынасын уақытша тұрақтандыру туралы келісімге келгенін айтқанымен, ұзақ мерзімді шешім жөнінде ешқандай белгі байқалмады.
Нарық қалай жауап қатты?
Bloomberg агенттігі Трамптың мәлімдемесінен кейін мәміле шарттарына қатысты жаңа сұрақтар туындағанын жазды. Бұл нарықтардың белгісіз реакциясын тудырды. АҚШ акцияларының фьючерстері бастапқыда біршама қалпына келгенімен, кейін қайтадан құлдырады.
Ал негізгі сауда сессиясы кезінде америкалық ірі индекстер сәл өсті. Бұған мамыр айындағы инфляция мәліметтері де ықпал етті. Тұтынушылық бағалар бар болғаны 0,1%-ға өскен — бұл сарапшылар күткен деңгейден төмен.
Контекст
АҚШ пен Қытай делегацияларының алғашқы келіссөзі мамыр айында Женевада өткен. Сол кезде қос тарап баж салықтарын өзара төмендетуге уағдаласқан болатын. Бұған дейін АҚШ Қытай тауарларына 145%, ал Қытай америкалық өнімдерге 125% баж салығын салатын.
Мұндай жоғары мөлшерлемелер екі ел арасындағы сауданың уақытша тоқтауына әкелді. Сауда соғысы Қытайдан тауар алатын және сол елде өндірісі орналасқан ірі де, шағын америкалық компанияларға ауыр соққы болды.
