Алтын 9%-ға құлдырады, Еуропалық акциялар төмендеді, ал Brent маркалы мұнай 114 доллардан жоғары саудаланып жатыр: нарықтарда не болып жатыр?

23 наурыздағы сауда сессиясында алтын бағасы 9%-ға құлдырады. Дүйсенбі күні нарықтар ашылғаннан кейін АҚШ пен Иран арасындағы шиеленістің күшеюі мұнай мен табиғи газ бағасының өсуіне әкеліп, негізгі еуропалық акция индекстері күрт төмендеді. Еуропалық акциялардың құлдырауы Азия нарықтарындағы құлдыраудан кейін болды. АҚШ акция индекстерінің фьючерстері де айтарлықтай төмендеп барады.

— Спут алтын бағасы бір сәтте шамамен 9%-ға төмендеп, бір трой аунциясы 4 099,18 АҚШ долларына дейін түсті. Кейін төмендеу қарқыны шамамен 6%-ға дейін бәсеңдеді. Бұл бағалы металл биылғы жылдың басындағы барлық өсімін жоғалтты.

— 23 наурыздағы сауданың алғашқы минуттарында пан-Еуропалық Stoxx 600 индексі 1,7%-ға төмендеді. Bloomberg атап өткендей, ол ақпандағы ең жоғары деңгейінен 10%-дан астамға құлдырап, түзету аймағына енді.

— Францияның CAC 40 индексі шамамен 1,6%-ға төмендеді.

— Германияның DAX индексі 2%-ға төмендеді

— Ұлыбританияның FTSE 100 индексі 1,5%-ға төмендеді.

— АҚШ-та S&P 500 фьючерстері 0,8%-ға, Nasdaq 100 фьючерстері 0,9%-ға, ал Dow Jones өнеркәсіптік орташа индексінің фьючерстері 0,6%-ға төмендеді.

— Brent маркалы шикі мұнай барреліне 114 доллардан сәл асатын бағаға дейін қымбаттап, шамамен 1%-ға өсті. Бағалар 20 наурыздағы жұма күні 2022 жылдың ортасынан бергі ең жоғары жабылу деңгейінен кейін бес күн қатарынан өсіп келеді. Алайда тауар АҚШ-Иран соғысы кезінде бір баррельге 119 долларға дейін жеткен рекордтық деңгейден әлі төмен.

Еуропада табиғи газ бағасы шамамен 4%-ға өсіп, МВт·сағ үшін 61,6 еуроға жетті. Өткен аптада Таяу Шығыстағы газ инфрақұрылымына жасалған шабуылдар, соның ішінде Катардағы ең ірі сұйытылған табиғи газ зауыттарының біріне бағытталған шабуылдар салдарынан бағалар 18%-дан астамға өсті.

— Дүйсенбі күні ірі азиялық нарықтар төмендеп жабылды. Жапонияның Nikkei 225 және Гонконгтың Hang Seng индекстері 3,5%-ға, Шанхай қор биржасының CSI 300 индексі 3,3%-ға, ал Оңтүстік Кореяның Kospi индексі 6,5%-ға төмендеді.

22 наурызда АҚШ президенті Дональд Трамп Ираннан 48 сағат ішінде Хормуз бұғазын кеме қатынасына толық ашуды талап етіп, егер бұл орындалмаса, Иранның электр станцияларына соққы берумен қорқытты. Оған жауап ретінде Тегеран өңірдегі АҚШ пен Израильге тиесілі «барлық энергетикалық, ақпараттық технологиялар және тұзсыздандыру инфрақұрылымына» шабуыл жасайтынын мәлімдеді.

«Трамптың ультиматумы жағдайды ушықтырып отыр, және бұл акция нарықтарында айқын көрініс табуда. Нарық белгісіздіктен осы қақтығыстың ұзаққа созылатынына деген сенімділікке қарай ауысуда», – деді WisdomTree макроэкономикалық зерттеулер директоры Аника Гупта Bloomberg есебінде.

Дүйсенбі күні Financial Times- тың хабарлауынша, Иран өзінің жағалау сызығы немесе аралдары шабуылға ұшыраса, Парсы шығанағына теңіз миналары орналастыратынын ескертті.