Алтын соңғы үш айдағы ең ірі құлдырауды көрсетуде. Бұған не түрткі болды?
11 тамызда алтын бағасы шамамен 2,5%-ға құлдырап, соңғы үш айдағы ең ірі төмендеуге ұшырады. Өткен аптада қымбат металл рекордтық деңгейге жеткен еді, бірақ Ақ үй алтын құймаларына баж салығын енгізу жоспарын жоққа шығарған соң және инвесторлар Украинадағы қақтығыстың реттелуін күткендіктен, алтынның «қауіпсіз айлақ» ретіндегі құндылығы әлсірей бастады.
Егжей-тегжейлі
Жеткізу мерзімі желтоқсанға белгіленген алтын фьючерстері 11 тамыз, дүйсенбі күні NYMEX биржасында 2,44%-ға төмендеп, бір унциясы $3406 болды. Абсолюттік мәнде бұл — $85,3-ке құлдырау, яғни 12 мамырдан бергі ең ірі төмендеу. Ол күні АҚШ пен Қытай баж салығын уақытша төмендетуге келіскен еді де, алтын келісімшарттары $116 жоғалтқан, деп еске салады MarketWatch.
Жалпы, жыл басынан бері АҚШ-тың экономикалық саясатындағы белгісіздік аясында алтын шамамен 30%-ға қымбаттады. Бұл орталық банктерді қымбат металды белсенді сатып алуға итермеледі.
Бағаға не әсер етті
Алтын өткен аптада бір унциясы $3500-ға жетіп, рекорд орнатқан соң арзандады. Бұған АҚШ-тың Кеден және шекаралық бақылау қызметі 1 кг және 100 унциялық құймаларды баж салығы салынатын тауарлар санатына енгізді деген хабар түрткі болған еді, деп жазды MarketWatch.
Алайда жұма күні кешке Ақ үй бұл ақпаратты жоққа шығарды. The Wall Street Journal-дың дерегінше Ақ үйдегі дереккөз АҚШ президенті Дональд Трамптың «алтын құймалары мен басқа да арнайы тауарларға баж салығына қатысты жалған ақпаратты түсіндіретін жарлықты жақын уақытта шығаратынын» мәлімдеді. Осыдан кейін фьючерстер құлдырай бастады және дүйсенбіде төмендеуін жалғастырды.
Дүйсенбі күні металл айтарлықтай арзандағаннан кейін Трамп Truth Social желісінде «Алтынға баж салығы салынбайды!», — деп растады.
Kitco Metals компаниясының аға талдаушысы Джим Уайкофф Reuters-ке берген түсініктемесінде: «Нарық бастапқыда баж салығына қатысты белгісіздіктің аясында өсті, бірақ қазір Ақ үйден қосымша түсініктеме күтушілердің жүйкесі сыр беріп, [лонг-позицияларды] жапқандықтан, төмендеуді бастан кешіп отыр», — деді.
Сарапшылардың пікірінше қосымша қысым факторына Украина мен Ресей арасындағы соғыстағы ықтимал бітімге қатысты күтулер де кірді. Бұл үміттер жұма күні Аляскада өтуі тиіс Трамп пен Путиннің кездесуіне байланысты туындап отыр.
Осы аптада алтынға тағы не әсер етуі мүмкін
Сейсенбіде АҚШ-тағы тұтынушылық бағалар жөніндегі деректер, ал бейсенбіде — өндіруші бағалар туралы статистика жарияланады, деп хабарлайды Reuters. Бұл мәліметтер трендті өзгертуі ықтимал.
Kitco Metals сарапшысы Джим Уайкофф: «Жұмысбастылық бойынша әлсіз есептен кейін инфляция деректері ерекше маңызды болмақ. Егер көрсеткіштер күткеннен жоғары болса, бұл ФРЖ-ға қыркүйекте мөлшерлемені төмендетпеуге себеп болуы мүмкін, ал бұл алтын бағасына теріс әсер етеді», — деді.
