Аналитиктер «жас Tesla» деп атанған компанияның акцияларын сатып алуға кеңес беруде
Уолл-стриттің кемінде жеті аналитигі бір мезетте электрлі ұшақ өндірушісі Beta Technologies акцияларын сатып алуды ұсынды. Bloomberg жазғандай, сарапшылар Beta-ны өңірлік авиация нарығында болашағы зор ойыншы деп санайды. Компания IPO-ны бір ай бұрын өткізген, ал аналитиктер алғаш рет өз бағаларын жариялап отыр. Олардың пікірінше Beta бәсекелестерінен озып келеді және тауарлық, жолаушылар, медициналық тасымалдау мен қорғаныс технологиялары нарықтарында орнығып үлгерді.
Аналитиктер не дейді
— Morgan Stanley: «Beta — жас Tesla сияқты, бірақ түпкілікті аэрокосмикалық нарығы одан да тартымды, әрі кіру кедергілері автоөнеркәсіптен жоғары». Банк акцияларға Overweight рейтингін қойып, мақсатты бағасын $34 деп белгіледі. Бұл — 1 желтоқсандағы жабылу бағасынан ( $26,22, күн ішінде –3,9%) шамамен 30% жоғары.
— Needham: өңірлік мобильдік нарығын $1 трлн деп бағалайды. Компания осы кезеңде төмен шығарындылы авиацияға өтудің алғашқы сатысында Beta елеулі нарық үлесін ала алады деп есептейді. Needham рейтинг — Buy, мақсатты баға — $34.
— Cantor Fitzgerald (Андрес Шеппард): Оның айтуынша, Beta таңдаған жол компанияға АҚШ-тың Азаматтық авиация федералдық басқармасынан (FAA) рұқсат алуға «жылдам әрі түсінікті маршрутпен» жылжуға мүмкіндік береді. Өндіруші алдымен eCTOL-ұшақтарды (электр тартқышпен дәстүрлі ұшу-қонуы бар) сертификаттаудан бастап, жолаушылар тасымалына дейінгі аралықта жүк және медициналық тасымалдауды коммерцияландыруға назар аударды. Шеппард компания 2026 жылдың соңы — 2027 жылы сертификат алады деп болжайды. Бұл Beta-ға «алғашқы ойыншы артықшылығын» береді. «Сонымен қатар, Beta қазірдің өзінде табыс тауып жатыр, бұл сектордағы көп бәсекелестерде жоқ артықшылық», — деді ол. Рейтинг — Overweight, таргет — $42.
— Citigroup (Джон Годин): Beta қозғалтқыштарды, аккумуляторларды, софтты, заряд инфрақұрылымын және жоғары кернеулі электрониканы біртұтас өндірістік циклге біріктіру арқылы процесті жеңілдетіп жатыр. Бұл тәсіл бастапқыда көп инвестиция талап етсе де, Citi мұны Beta-ның ғылыми-зерттеу және конструкторлық жұмыстарын тиімдірек ететін және жеткізушілерге тәуелділікті азайтатын қадам деп санайды. Банк қосымша артықшылық ретінде Beta-ның ел бойынша 84 станциядан тұратын заряд желісін атап өтті. Ал электрұшақтарға сервистік қызмет, әсіресе аккумуляторларға қызмет көрсету, ұзақ мерзімді табыстың негізгі көзіне айналуы мүмкін. Рейтинг — Buy, баға — $41.
— Goldman Sachs: «Beta ең қолайлы позицияда тұр, ал акциялардың жуырдағы арзандауы — тиімді кіру нүктесі», — делінген 30 қарашадағы жазбада. Рейтинг — Buy.
— Bank of America: «Beta — жай ғана ұшақ өндіруші емес, біз оны электр авиациясын дамытудағы негізгі қатысушы деп санаймыз». Рейтинг — Buy, мақсатты баға — $35.
— BTIG: Компания Beta-ның жолаушылар нарығына шықпай тұрып, жүк, медициналық және әскери тасымалдаудағы қысқамерзімді сұранысты тиімді пайдаланғанын оң бағалайды. Рейтинг — Buy, таргет — $40.
— Jefferies (Шейла Кахьяоглу): Жалғыз өзі Beta акцияларына Hold рейтингін қойды. Ол соңғы айда IPO-дан кейін акциялардың 23% арзандағанын атап өтті. Бірақ оның пікірінше, бұл шағын капитализациялы және аэрокосмикалық компаниялар секторындағы жалпы әлсіздікке байланысты. «Біз өсім әлеуетін көріп отырмыз және Beta бұл сегменттің жеңімпазы болады деп санаймыз», — дейді аналитик.
Контекст
Компания 4 қарашада IPO өткізіп, $1,01 млрд тартты. 29,9 млн акцияны $34 бағамен сатқан — бұл бастапқы диапазоннан жоғары. Reuters есебіне сәйкес компанияның нарықтық бағасы шамамен $7,44 млрд болды.
FactSet мәліметінше Beta-ны бақылап отырған сегіз аналитиктің жетеуі – «сатып алу», біреуі – «ұстау» деп бағалайды. Уолл-стриттің консенсус таргеті — $37,9, бұл 1 желтоқсандағы жабылу бағасынан 44,5% жоғары.
