AppLovin және Robinhood S&P 500 индексіне кіреді. Акциялары қымбаттады
S&P Global агенттігі S&P 500-ге жарнамаға арналған қосымша жасаушы AppLovin мен сауда платформасы Robinhood Markets акцияларын қосу туралы шешім қабылдады. Олар 22 қыркүйектен бастап индекске енеді. Жұма күні қосымша саудада екі компанияның да акциялары қымбаттады.
Егжей-тегжейі
Жарнамаға арналған қосымша жасаушы AppLovin, сауда платформасы Robinhood Markets және инженерлік компания Emcor Group акциялары S&P 500 индексіне қосылады. Бұл туралы индекс операторы S&P Dow Jones Indices тоқсан сайынғы қайта теңгерімдеуде хабарлады.
Жаңалық шыққан соң AppLovin акциялары қосымша саудада 7,5%-ға, Robinhood — 6,3%-ға, Emcor — 2,3%-ға өсті.
Ал индекстен MarketAxess Holdings (облигациялар саудасы), Caesars Entertainment (казино және курорттар операторы), Enphase Energy (күн инверторлары мен энергия сақтау жүйелерін өндіруші) акциялары шығады. Бұл компаниялардың қағаздары 5 қыркүйектегі кешкі саудада тиісінше 1,6%, 0,6% және 2,3%-ға арзандады.
Өзгерістер 22 қыркүйек, дүйсенбіден бастап күшіне енеді.
Контекст
Bloomberg жазғандай, бұрын қор нарығындағы алыпсатарлықтың символы саналған Robinhood қазір S&P 500 талаптарына сәйкес келеді: тұрақты пайда көрсетіп, нарықтық капитализация мен өтімділік бойынша негізгі межелерге жетті. Индекске қосылуы оның қағаздары зейнетақы және индекстік қорлардың портфельдеріне енеді деген сөз.
Robinhood 2021 жылы IPO өткізді. Ол кезде пандемия кезіндегі «мем-акция» бумының ортасы болатын. Ыңғайлы мобильді қосымшасының арқасында брокер GameStop пен AMC секілді жоғары тәуекелді активтерді саудалайтын жеке трейдерлердің сүйікті құралына айналды. 2025 жылдың бірінші тоқсанында Robinhood транзакциялардан түскен табыстың жылдық өсімі 77%-ға жеткенін хабарлады, оның басым бөлігі криптовалюталардың арқасында болды.
AppLovin де 2021 жылы IPO өткізді. Компанияның акциялары нарықтағы ең көзге түскендердің бірі болды: 2023 жылы 278%-ға, 2024 жылы 700%-дан астам өсті. 2025 жылдың басынан бері AppLovin қағаздары жұмадағы сауда жабылуына қарай 51%-ға қымбаттады.
AppLovin мобильді қосымшалар мен ойындарға бағытталған жарнаманы біріктірумен айналысады, жарнама берушілерге смартфондар арқылы кең аудиторияға қол жеткізуге мүмкіндік береді. Биылғы жылдың басында компания қытайлық ByteDance-тан TikTok-тың америкалық сегментін сатып алуды да ұсынған болатын.
