Арманидің өсиеті: модельер бренді сатылады немесе IPO-ға шығады
4 қыркүйекте өмірден өткен италиялық модельер әрі дизайнер, Armani сән үйінің негізін қалаушы Джорджо Арманидің өсиетінде ол құрған компанияны кезең-кезеңімен сату немесе биржада жария түрде орналастыру жөнінде нұсқау бар, деп хабарлайды The Wall Street Journal. Бұл нағыз тәуелсіз болып қалған соңғы сән үйлерінің бірінің иелік құрылымын түбегейлі өзгертуі мүмкін, дейді басылым.
Егжей-тегжейлі
Италиялық модельер әрі дизайнер Джорджо Армани наурызда жазған өсиеті 12 қыркүйекте жарияланды, деп хабарлайды The Wall Street Journal. Құжатта оның компаниясының 15%-ын алдағы 18 ай ішінде сату көзделген. Кейінгі үш-бес жыл ішінде тағы 30%-дан 54,9%-ға дейінгі үлес сатылуы тиіс. Егер екінші кезең жүзеге аспаса, мұрагерлер Armani акциясын биржада алғашқы орналастыруға дайындықты бастауға міндетті.
Өсиетте Армани Armani компаниясындағы үлестердің басым әлеуетті сатып алушылары ретінде LVMH, L’Oréal және EssilorLuxottica компанияларын атады. Сондай-ақ ол ауқымы жағынан ұқсас сән мен люкс саласындағы басқа компаниямен немесе брендтің қазіргі серіктестерімен мәміле мүмкіндігін де қарастырды. Бұл оның Armani-ді жаһандық салалық топтың бөлігі ретінде көргісі келетінін білдіреді, деп жазады WSJ. 91 жасында дизайнердің қазасы оның сән империясының болашағына қатысты көптеген сұрақ туғызды.
Armani атқарушы комитеті өсиет дизайнердің брендтің ұзақ мерзімді перспективада тұрақтылығы мен бірлігін қамтамасыз етуге ұмтылысын анық көрсететінін атап өтті. Оның шарттарына сәйкес, Giorgio Armani Foundation қоры компанияның кемінде 30%-ын сақтап қалуы тиіс, бұл брендтің негізгі құндылықтарының сабақтастығын қамтамасыз етеді.
2016 жылы Armani-дің бірегейлігі, стилі мен қағидаларын қорғау үшін құрылған қор өтпелі кезеңде компанияны толық бақылауына алады. 2024 жылы компанияның табысы шамамен $2,7 млрд болды, алайда люкс нарығының суытуы аясында операциялық пайда төрттен біріне жуық қысқарды.
LVMH, L’Oréal және EssilorLuxottica қандай жауап берді?
Әлі 1990-жылдардың соңында Dior мен Fendi брендтеріне иелік ететін LVMH Арманимен компанияның 20%-ын сатып алу туралы келіссөздер жүргізген еді, сол кезде дизайнер креативті бақылауды өзінде сақтап қалар еді. Алайда мәміле жүзеге аспады. 1988 жылдан бастап Armani L’Oréal компаниясымен парфюмерия өндіруге лицензиялық негізде серіктес болып келеді, оған Acqua di Giò сияқты танымал хош иістер кіреді. Ал EssilorLuxottica компаниясы Armani көзілдіріктерін шығару және дистрибуциялаумен айналысады.
LVMH пен L’Oréal WSJ-ға модельердің өсиесіне қатысты пікір білдіруден бас тартты.
«Біздің топтар арасындағы берік байланысты ескерсек, бұл сценарий ең мұқият қарастыруға лайық. Біз оны директорлар кеңесімен бірге мұқият талқылаймыз», — деді WSJ-ға EssilorLuxottica өкілі.
Контекст
Джорджо Арманидің балалары болмаған, ол бизнесті басқаруды жақын туыстары мен негізгі серіктестеріне сеніп тапсырды. Ерлер киіміне жауапты, оның көпжылдық орынбасары Панталео Делл’Орко Armani Group-тағы дауыс беру құқықтарының 40%-ын алады. Компанияда жұмыс істейтін жиені Сильвана Армани мен жиені Андреа Камеранаға дауыс беру құқықтарының 15%-ы тиесілі болады.
2024 жылы Джорджо Армани Armani Group сән үйі ұзақ жылдар бойы тәуелсіздігін сақтап қалу үшін күрескеннен кейін, ірі бәсекелеспен бірігуге немесе IPO өткізуге баратынын жоққа шығармады. Бұл туралы сол кезде компанияның негізін қалаушы Bloomberg-ке берген сұхбатында айтқан еді. Өткен жылдың көктемінде сарапшылар компания бизнесінің құнын 8–10 млрд еуро деп болжаған.
Бренд тағдыры
Сәуірде жасалған бөлек құжатта Армани өзінің жеке мүлкін бөлу жөнінде нұсқаулар қалдырды. Активтердің ішінде Санкт-Мориц, Нью-Йорк, Париж, Сен-Тропе және Антигуадағы үйлер бар. Сондай-ақ яхтаны пайдалану тәртібі көрсетілген: жекелеген мұрагерлер оны жылына белгілі бір аптада ғана қолдана алады. Миландағы резиденциясының ішкі жабдықтары — кітап шкафтары мен үстелдерден бастап сәндік бұйымдарға дейін — егжей-тегжейлі сипатталып, әр зат нақты адамға өсиет етілген.
Арманидің қазасы дизайнерлер өз брендін толық бақылауда ұстаған дәуірдің аяқталғанын білдіреді, деп жазады WSJ. Олар тек суретші ғана емес, компания бағыты мен оның жаһандық өсімін айқындаған иелер де болды. Мұндай модель бүгінде дерлік жойылды. 1975 жылы құрылғаннан бері Armani бренді жаһандық экспансияға, флагмандық орындарды жалға алуға және ауқымды маркетингтік науқандар жүргізуге жеткілікті ресурсы бар люкс конгломераттарының өсіп келе жатқан қысымына төтеп беріп келді, деп атап өтеді басылым.
