Автобаждар Mercedes пен Porsche-ке соққы болды

27 наурызда АҚШ президенті Дональд Трамп шетелдік автокөліктерге 25%-дық баж салығын енгізу туралы жарлыққа қол қойғаннан кейін еуропалық және америкалық автоконцерндердің акциялары күрт төмендеді. Bloomberg мәліметінше, бұл шектеуден ең көп зардап шегетіндер — Mercedes-Benz пен Porsche болуы мүмкін. Дегенмен соққы тек осы екі брендке емес, АҚШ-қа экспортқа тәуелді бүкіл еуропалық автоөнеркәсіпке тиді.

Акциялардың жағдайы  

Франкфурттегі саудада Porsche мен Mercedes акциялары 5,7%-ға, BMW – 4,9%-ға төмендеді. Volkswagen (Audi мен Lamborghini иесі) 4,3%-ға арзандады. Aston Martin акциялары Лондон биржасында таңертең 9%-ға құлады.

Stellantis акциялары Миланда 6,7%-ға, Нью-Йоркте 4,1%-ға төмендеді. Бұл концернде АҚШ-та өндіріс көбірек болғанымен, ол Jeep Compass моделін Мексикада шығарады. Renault акциялары Парижде бастапқыда 2,1%-ға арзандады, бірақ кейін қалпына келді.

АҚШ-та General Motors акциялары 9%-ға дейін құлдырады, Ford – 3,4%-ға.

Еуропалық қор индекстері де бұл жаңалыққа теріс реакция танытты. Stoxx 600 0,5%-ға, ал FTSE 100, DAX, CAC 40 және FTSE MIB 0,6–1% аралығында төмендеді. S&P 500 аздап – 0,1% шегінде ғана төмендеді.

Жапония мен Оңтүстік Кореяда Toyota және Hyundai Motors акциялары да арзандады. Ал Қытай автоөнеркәсібіне әсер шектеулі болды — АҚШ пен Қытай арасында бұрыннан кедендік салықтар бар, сондықтан қытайлық өндірушілер АҚШ нарығына көп жұмыс істемейді.

Қай компанияларға қауіп төнуде

Bloomberg мәліметінше, Mercedes-Benz пен Porsche жаңа баж салығынан ең көп зардап шегетін брендтер болады. 3 сәуірден бастап күшіне енетін 25%-дық салық бұл екі компанияға 3,4 млрд еуро шығын әкеліп, 2026 жылдағы операциялық пайдасын 25%-ға қысқартады.

Porsche ерекше қауіпке тап. Қытайда сатылымы азайғанымен, соңғы 15 жылда АҚШ-та бизнесін үздіксіз дамытып келді. 2024 жылы АҚШ алғаш рет Қытайдан озып, Porsche-тың ең ірі нарығына айналды. Бірақ компанияның АҚШ-та зауыты жоқ — сатылатын көліктердің бәрі импортталады. Электромобильдерге сұраныс Қытайда бәсеңдеп, Porsche сатылымы 28%-ға төмендеген. Ал АҚШ-та керісінше — электрлі көліктерге сұраныс аз, бұл брендке тиімді болған.

Контекст

26 наурызда Трамп шетелдік жеңіл көліктер, пикаптар мен автокомпоненттерге 25% баж салығын енгізетін жарлыққа қол қойды. Бұл салықтар қазіргі базалық салықтарға қосымша енгізіледі (жеңіл көліктер үшін 2,5%, пикаптар үшін бұрыннан 25%).

Жаңа баж салығы 3 сәуірден бастап күшіне енеді. Қосалқы бөлшектерге (қозғалтқыштар, трансмиссиялар, электроника) арналған баждар 3 мамырға дейін енгізіледі. Канада мен Мексика экспортерлері «америкалық емес» құрамдас бөліктерді нақтылап, салықты тек сол бөліктерге төлеу арқылы салықты азайта алады.

Трамп ЕО мен Канадаға АҚШ-қа «экономикалық залал келтіретін болса», қосымша баж салығы енгіземін деп ескертті. Сонымен бірге, TikTok-қа бақылау берілсе, Қытай импортына қатысты салықты жеңілдетуге дайын екенін мәлімдеді.