Баффет портфеліндегі Sirius XM: «қорқынышты нәтижелер» мен күмәнді болашақ
Уоррен Баффеттің Berkshire Hathaway портфеліндегі ірі позициялардың бірі — Sirius XM Holdings компаниясы соңғы бес жылда «қорқынышты нәтижелер» көрсетті. Мұндай пікірді The Motley Fool басылымында сарапшы Дэвид Ягельски айтты. Оның айтуынша Sirius XM-нің абоненттік базасы азайып, қаржылық көрсеткіштері құлдырап келеді.
Құлдыраған көрсеткіштер
Sirius XM — АҚШ-тағы ірі спутниктік радио ойыншыларының бірі. Соңғы бес жылда оның акциялары 59%-ға арзандады. Компания абоненттерінің саны бір жыл ішінде 1 млн-ға қысқарды, ал екінші тоқсандағы кірісі тағы 2%-ға төмендеп, $2,14 млрд болды.
Акциялар P/E коэффициенті 7 деңгейінде бағаланып отыр. Бұл қағаздардың нарықта арзан көрінетінін білдіреді. Дегенмен Ягельскидің айтуынша Sirius XM-нің жағдайы «құнды мүмкіндіктен» гөрі «құн тұзағына» көбірек ұқсайды.
Баффет пен Sirius
Sirius XM 2024 жылы Liberty Media-пен бірігу нәтижесінде пайда болды. Оның құрамында SiriusXM жазылым сервисі, Pandora музыкалық платформасы мен түрлі подкасттар бар.
Berkshire Hathaway 2016 жылдан бастап Liberty Media-да үлеске ие болып келген. Бірігу аяқталған соң Баффет Sirius XM акционері атанды, кейін позициясын едәуір ұлғайтты. 2025 жылдың тамызында Berkshire шамамен 5 млн акция сатып алып, жалпы үлесін 124,8 млн акцияға (37%) жеткізді. Бұл Баффет портфелінің шамамен 1%-ына тең.
Сарапшылар пікірі
Morningstar-дың жазуынша Sirius XM Баффет үшін дәстүрлі инвестицияға жатпайды: компанияның айқын бәсекелік артықшылығы жоқ және ол стримингтік сервистерге жол беруі мүмкін. Алғашқыда Уолл-стрит Berkshire бұл акциялармен тек қысқа мерзімді ойын ойнады деп ойлаған. Алайда кейінгі ірі сатып алулар Баффеттің жоспарлары бұдан да ауқымды екенін көрсетті.
MarketWatch дерегіне сәйкес, сарапшылардың пікірі екіге бөлінген: алтауы «сату», бесеуі «сатып алу», төртеуі бейтарап ұстанымда.
Орташа мақсатты баға $23,15 деңгейінде, бұл соңғы жабылудан небәрі 2%-ға жоғары.
