Баффет Жапонияға бәс тігуде: Berkshire жергілікті бес компаниядағы үлесін арттырды

Әлемдегі ең табысты инвесторлардың бірі Уоррен Баффет басқаратын Berkshire Hathaway Жапониядағы бес ірі сауда компанияларындағы үлесін ұлғайтты. Енді корпорация олардың әрқайсысында шамамен 10%-ға иелік етеді. Бұл АҚШ қор нарығындағы құлдырау мен сауда баждары қаупіне байланысты инвесторлардың шетелдік активтерге назар аударуы тиіс екенін білдіруі мүмкін. 17 наурыздағы Токио биржасында бұл бес компанияның акциялары қымбаттады.

Толығырақ

Berkshire Hathaway Жапониядағы бес ірі сауда компаниясындағы үлесін 1–1,7% аралығында арттырды, деп хабарлайды Reuters. Бұл туралы Жапонияның қаржы реттеушісіне Berkshire-тің еншілес компаниясы National Indemnity Company ұсынған құжаттарда жазылған. Bloomberg келесідей нақты көрсеткіштерді жариялады:

Mitsui үлесі 8,09%-дан 9,82%-ға өсті.

Mitsubishi – 8,31%-дан 9,67%-ға.

Sumitomo – 8,23%-дан 9,29%-ға.

Itochu – 7,47%-дан 8,5

Бұл шешім Баффеттің ақпан айының соңында Berkshire акционерлеріне жазған хатымен сәйкес келеді. Ол осы бес компанияны атап, олар Berkshire-тің 10%-дан астам үлеске ие болуын шектейтін талаптарды жеңілдетуге келіскенін жазған. Баффет бұл инвестицияны АҚШ нарығына бағытталған портфельдегі ерекше жағдай ретінде сипаттады.

17 наурыздағы Жапония биржасында Mitsui, Mitsubishi, Sumitomo, Itochu және Marubeni акциялары 1,5–2,5%-ға дейін қымбаттады. Жапонияның Nikkei 225 индексі 1%-ға өсті.

Инвесторлар үшін маңызы

2023 жылдың сәуірінде Баффет жапондық сауда үйлеріндегі үлесін ұлғайтатынын хабарлаған кезде  инвесторлар бес күн ішінде жапондық акцияларды $7,8 млрд-қа сатып алған. Алайда, бұл жолы мұндай әсер болмауы мүмкін, себебі жаһандық қор нарығы сауда баждарының экономикалық өсімге ықтимал әсерін бағалауда, деп жазады Bloomberg.

Daiwa Securities Group бас стратегі Юго Цубои: «Бұл жолы бірнеше жыл бұрынғыдай күшті әсер етпейді» дейді.

Соған қарамастан Barron’s журналының жазуынша инвесторлар бұл қадамды АҚШ-тан тыс инвестиция жасауға қолайлы уақыттың келгенінің белгісі ретінде қарастыруы мүмкін. Соңғы айда АҚШ қор нарығы сауда соғысы қаупі, инфляцияның күрт өсуі және экономикалық өсімнің баяулауы себепті құлдырауда. Дегенмен, түзетулерге қарамастан, америкалық акциялар әлі де қымбат. Barron’s мәліметінше, S&P 500 индексі алдағы 12 айдағы болжалды пайдаға қатысты (P/E) 20 еселік көрсеткішпен, ал Nasdaq Composite 25 еселік көрсеткішпен саудалануда. Салыстырмалы түрде, Nikkei 225 индексі 17 еселік көрсеткішпен саудаланып жатыр, бұл жапондық акциялардың салыстырмалы түрде арзан екенін көрсетеді.

Bloomberg-ке сұхбат берген Pictet Asset Management Japan-ның инвестициялық стратегия бөлімінің басшысы Дзюмпэй Танака: «Berkshire-тің үлесін ұлғайтуы Nikkei индексінің әлсіреген кезінде жапондық акцияларды сатып алу үшін қауіпсіздік сезімін тудыруы мүмкін» дейді. Nikkei 225 жыл басынан бері 6%-дан астам төмендеді, ал кеңірек қамтитын Topix индексі 1%-дан сәл астам жоғалтты. Салыстыру үшін, АҚШ-тың S&P 500 индексі шамамен 4%-ға төмендеді.

Контекст

2024 жылдың соңына қарай Berkshire-тің жапондық компаниялардағы жалпы үлесі $23,5 млрд-қа жетті. Соңғы алты жылда бұл инвестициялардың жалпы көлемі $13,8 млрд-ты құрады. Бұл бес ірі холдинг дәстүрлі түрде Жапонияға минералдар, азық-түлік және энергетикалық ресурстар импорттаумен, сондай-ақ дайын өнімдерді экспорттаумен айналысады. Баффет 2020 жылы жапондық компаниялардағы үлесін алғаш рет жариялаған кезде, олардың ұзақ мерзімді инвестициялары мен тұрақты ақша ағынына басымдық беретін әртараптандырылған портфельдерін Berkshire Hathaway-ге ұқсас деп бағалаған.

АҚШ нарығындағы құлдырау Баффеттің өзіне тиімді болды, деп жазады Barron’s. Berkshire Hathaway акциялары жыл басынан бері 14%-ға қымбаттап, компанияның нарықтық капитализациясы шамамен $1,1 трлн-ға жетті. Сонымен қатар, «Керемет жетілік» компанияларының, әсіресе Nvidia мен Tesla акциялары құлдырап, инвесторлар технологиялық сектордан сенімдірек активтерге көшті. Бұл үрдіс Berkshire акцияларының құнын арттырды.

Bloomberg мәліметінше, 2024 жылдың қазан айында Berkshire жапондық иенадағы облигацияларын 281,8 млрд иенаға ($1,9 млрд) орналастырды. Бұл сол жылы жасалған екінші ірі облигациялық мәміле болды.