«Бағасы әлі қымбат»: сарапшылар мен инвесторлар жаңа Tesla модельдері туралы
Tesla инвесторлары мен жанкүйерлері компаниядан қолжетімді электромобильдерді көптен бері күтіп жүрген еді, алайда жаңа модельдердің таныстырылымы күткендей әсер қалдырмады: жаңалықтан кейін компания акциясының бағасы 4,5% құлдырады. Tesla Model 3 Standard нұсқасын $36 990-ға және Model Y Standard нұсқасын $39 990-ға ұсынды. Екі электромобиль де алдыңғы базалық модельдерінен шамамен $5000 арзан, бірақ мүмкіндіктер жиынтығы азайтылған. Сарапшылар мен инвесторлар Tesla-ның арзандаған модельдерін әртүрлі бағалады: кейбірі осы қадамды қолжетімді көлік идеясын дамыту деп бағаласа, кейбірі жаңа модельдердің болмауын сынға алды.
Сарапшылар пікірі
Business Insider жазғандай, Wedbush компаниясының сарапшысы Дэн Айвз пен оның әріптестері Tesla жаңа модельдерін сынға алды. «Біз бұл іске қосудан жалпы көңіліміз қалды, себебі баға алдыңғы Model 3 және Model Y модельдерінен небәрі $5000 ғана төмен», — деп жазды сарапшылар инвесторларға арналған жазбасында. Wedbush мамандары арзандаған Tesla модельдері АҚШ-та электромобильдерге берілетін салықтық жеңілдіктердің жойылуынан кейін сұранысты ынталандыруы мүмкін екенін мойындайды, бірақ сонымен бірге «баға деңгейі нарықтағы басқа автокөліктермен салыстырғанда әлі жоғары» екенін атап өтті.
Сондай-ақ, сарапшылар инвесторларға Tesla акциясының төмендеуін сатып алу мүмкіндігі ретінде пайдалануға кеңес берді. «Кейбіреулер [спорттық электромобиль] Roadster немесе арзанырақ модельі жарияланады деп күткен болуы мүмкін, бірақ бұл қадамды дұрыс бағыттағы шешім деп санаймыз. Сондықтан нарықтың кез келген күрт реакциясы Tesla акциясын сатып алып, автономды көлік технологиясына қарай ілгерілеуіне қатысу мүмкіндігі ретінде қарастырылуы тиіс», — делінген Wedbush жазбасында.
Tesla-ның ұзақмерзімді инвесторы Росс Гербердің пікірінше, арзандаған электромобильдердің шығуы сол модель қатарына жататын люкс нұсқалардың сатылымына кері әсер етуі мүмкін. «Бұл жай ғана Model Y-дің тағы бір нұсқасы, ал олар тарихтағы ең үздік Model Y үлгісін әлдеқашан шығарған, — деді Гербер. — Мәселе бағаға байланысты: адамдар бағаға өте сезімтал. Егер сізде бір көліктің екі, үш немесе төрт нұсқасы болса, көпшілік қайсысын таңдайды деп ойлайсыз? Әрине, ең арзанына тоқтайды».
Morningstar сарапшысы Сет Голдстиннің пікірінше, қолжетімді модельдер АҚШ-та электромобиль сатып алуға берілетін салықтық жеңілдіктердің жойылуын Tesla-ға өтеп алуға мүмкіндік береді. «Бағасы $40 000-нан төмен деңгей Tesla-ның жеткізілім көлемін арттыруға көмектеседі деп ойлаймын, өйткені бұл Model 3 және Model Y үлгілерін қымбат көлікке ақша төлеуге дайын емес немесе мүмкіндік жоқ тұтынушылар үшін қолжетімді етеді», — деп келтіреді сарапшының сөзін Reuters.
«Tesla-ның бағаны төмендетуі сатылымды қолдауы мүмкін, бірақ сонымен бірге технологиялық тоқырауды да көрсетеді, — деді Reuters агенттігіне Envorso компаниясының деректер, талдау және жасанды интеллект жөніндегі вице-президенті Кен Джонстон. — Компания қазір классикалық авто өндіруші сияқты әрекет етіп отыр: қысқа мерзімде нарық үлесін арттыру үшін баға серпінділігін (бағаның өзгерісіне сұраныстың әсерін) пайдаланады. Бірақ негізгі мәселе — Cybertruck шыққаннан бері Tesla шын мәнінде мүлде жаңа модель ұсынған жоқ. Уәде етілген Roadster мен робот-такси жобалары әлі де тұжырымдамалық деңгейде қалып отыр. Егер компания жобаларды жүзеге асыра алмаса, оның робототехника мен жасанды интеллект саласындағы үлкен амбициялары қолжетімді мақсаттан гөрі арман сияқты көріне бастайды».
«Model Y мен Model 3 үлгілерінің арзандаған нұсқалары расымен сатылымды арттыруға көмектеседі, бірақ мен жеке өзім $30 000-дан төмен баға диапазонында қолжетімді Tesla болады деп үміттенген едім. Бұл жеткілікті екеніне сенімді емеспін, — деді Reuters агенттігіне Camelthorn Investments кеңесшісі Шон Кэмпбелл. — Ұзақ мерзімді перспективада бұл жаңалық жаһандық нарықтағы арзан қытайлық бәсекелестер туындатқан мәселені шеше алмайды».
Deepwater Asset Management сарапшысы Джин Манстердің пікірінше, арзандаған модельдердің шығуы Tesla-ның Уолл-стрит болжамындағы 2026 жылы жеткізілім көлемін 16% арттыру мақсатына жету мүмкіндігін күшейтеді. «Көпшілік Model Y үлгісінің ықшамдалған нұсқасын күтті. Бірақ шын мәнінде біз бұрынғы Model Y үлгісін алдық — тек түс пен дискі таңдау мүмкіндігі шектелген нұсқада», — деп жазады сарапшының пікірін Seeking Alpha.
Goldman Sachs сарапшысы Марк Делани де өз есебінде: «Біз әлі де Model 3 және Model Y модельдерінің жалпы алғанда баға мен сапа арақатынасы жақсы деп санаймыз (жылдамдық пен қауіпсіздік сияқты сипаттамаларды ескерсек), алайда Standard нұсқаларындағы баға, жабдық және құрастыру айырмашылығы күткендей айқын болған жоқ», — деп атап өтті, деп жазады Benzinga.
Делани еске салғандай, бұған дейін Tesla Model 3 және Model Y үлгілерінен 50% арзан мүлде жаңа модель шығаруды жоспарлаған еді. Алайда, компания тұтынушыларға бар көліктердің тек жаңа модификацияларын ғана ұсынды. Сарапшының айтуынша, қолжетімді жаңа модель шығару 2023 жылғы инвесторлар күнінде компанияның негізгі уәделерінің бірі болған. Сонымен қатар Делани Tesla-ның танымал үлгілердің модификацияларына басымдық беруі компанияға шығынды азайтып, жаңа өнімді нарыққа жылдам шығаруға мүмкіндік беріп отырғанын атап өтті.
