Биткойн маусымнан бері алғаш рет $100 000 деңгейінен төмен түсті
4 қарашадағы сауда барысында биткойн бағасы 6,5%-ға төмендеп, $99 963 деңгейіне түсті. Бұл — соңғы төрт айдағы алғашқы рет $100 000 межесінен төмен түсуі.
Bloomberg дерегі бойынша, бір ай бұрынғы рекордтық деңгейден бері биткойн 20%-дан астам арзандаған. Мұндай құлдырау көбіне «аю тренді» ретінде сипатталады.
Криптовалюта неге арзандап жатыр?
CNBC жазуынша, инвесторлардың тәуекелге деген құлшынысы азайған. Көптеген инвесторлар криптовалютаны жасанды интеллект компанияларының акцияларымен бірге бір спекулятивті бағыт ретінде қабылдайды. Сондықтан бір актив арзандаса, басқалары да артынан түсіп жатады. Мысалы, ІТ және ЖИ компаниялары шоғырланған Nasdaq Composite индексі 1% төмендеді. Инвесторлар Palantir акцияларын да сатып жатыр. Кварталдық есебі жақсы шыққанына қарамастан, бағасы тым жоғары деп қауіптенуде.
Yahoo Finance мәліметіне сәйкес, АҚШ үкіметінің уақытша тоқтауы және экономикалық өсімнің баяулауы жөніндегі белгілер де криптовалюта нарығына қысым жасап отыр.
Fundstrat компаниясының цифрлық активтер жөніндегі басшысы Шон Фаррел Yahoo Finance-ке берген сұхбатында, соңғы апталарда криптовалютаның ірі иелері — «киттер» сатылым көлемін күрт арттырғанын айтты. «Киттер бағаға қысым жасап жатыр», — дейді ол. Оның сөзінше, соңғы күндері жеке әмияндардан криптобиржаларға миллиардтаған доллардың биткойны жіберілген. Бұл сату мақсатына байланысты болуы мүмкін.
Compass Point сарапшысы Эд Энгелдің айтуынша, маусым айының соңынан бері ұзақ мерзімді иелердің таза сатылымы 1 миллион биткойннан асып кеткен.
«Ұзақ мерзімді иелердің сату жасауы бұқа нарығында қалыпты жағдай. Бірақ қазір жеке инвесторлар бұрынғыдай белсенді емес», — деді ол. Сонымен қатар, соңғы апталарда биткойн ETF-терге инвестиция ағыны да баяулағанын айтты. «$95 000 деңгейінен жоғары бағада белгілі бір қолдау бар, бірақ жақын арада өсімге түрткі болатын нақты факторлар байқалмай тұр», — деп түйіндеді Энгел.
