Block акциялары 10%-ға өсті: инвесторлар компанияның екі бизнесіне сенім артты
Нью-Йорктегі премаркет саудасында цифрлық төлемдер операторына тиесілі Block акциялары шамамен 10%-ға қымбаттады. Инвесторлар компания тарихындағы ең ірі құлдыраулардың бірінен кейін небәрі үш айдың ішінде қалпына келу белгілеріне оң баға берді. Жылдық болжамның жақсаруы мен Square және Cash App бағыттарындағы оң динамика нарық үшін қайта өрлеу мүмкіндігін көрсетті. Сарапшылардың көпшілігі Block акцияларын сатып алуға әлі де кеңес береді.
Егжей-тегжейі
Twitter-дің тең құрылтайшысы әрі биткоинның белсенді қолдаушысы миллиардер Джек Дорси негізін қалаған финтех-компания Block-тың акциялары 8 тамыз күні премаркетте 9,5%-ға өсті. Бұл өсім екінші тоқсанға арналған есеп жарияланғаннан кейін болды.
CNBC-дің хабарлауынша, Block сарапшылардың күткенінен төмен нәтиже көрсетті. Акцияға шаққандағы түзетілген табыс $0,69 болуы тиіс еді, бірақ $0,62 болды. Түсім де $6,31 млрд орнына $6,05 млрд болды. Алайда MarketWatch деректеріне сүйенсек, акция бағасын 14%-ға өскен валдық пайда қолдады. Ол Уолл-стрит консенсусы — $2,46 млрд-тан жоғары болып, $2,54 млрд-ты құрады. Бұл — нарық үшін негізгі көрсеткіштердің бірі. Компания алғашқы тоқсандағы әлсіз нәтижеден кейін, екінші тоқсанда валдық пайда тек 9%-ға ғана өседі деп болжаған еді.
Block-тың бас қаржы директоры Амрита Ахуджа бәсекелестік жағдайдың күрделілігіне қарамастан, компанияның бизнесі тұрақтылығын сақтап тұрғанын айтты. Ол валдық пайданың өскенін және Square төлем жүйесі мен Cash App аударым қызметінде іскерлік белсенділіктің, клиенттер қатысуының артқанын атап өтті.
Компания жылдық болжамын да жақсартты. Ахуджа бұл өзгеріс тек екінші тоқсан нәтижесімен ғана емес, жылдың екінші жартысына деген үмітпен де байланысты екенін айтты. Енді компания жылдық валдық пайданы $9,96 млрд орнына $10,17 млрд көлемінде күтеді. Ал түзетілген операциялық табыс болжамы $1,9 млрд-тан $2,03 млрд-қа көтерілді.
Block компаниясының екі негізгі бизнесінің дамуы
Square бизнесі сауда орындарына арналған жабдық сатады және бизнеске арналған бағдарламалық қамтамасыз ету ұсынады. Оның валдық пайдасы $1 млрд-тан асып, өткен жылмен салыстырғанда 11%-ға өсті. Бұл сарапшылардың күткен нәтижесіне жақын. Ахуджа Square бизнесінің жаңа өнімдерді жылдамырақ енгізуі мен сатылым стратегияларының тиімділігін атап өтті.
Cash App — қолданушылар арасындағы төлемдер желісін басқаратын және банктік қызметтер ұсынатын сервис. Ол екінші тоқсанда валдық пайданың 16%-ға өсімін көрсетті. Бұл көрсеткіш $1,5 млрд-ты құрады. Уолл-стриттің консенсус-болжамы $1,44 млрд болатын.
Криптовалюта бағыты бойынша жағдай
Block бірнеше жылдан бері биткоин операцияларынан пайда табады. Компания криптовалютаны жеке брокерлерден сатып алады және оны Cash App қолданушыларына аз ғана үстемемен қайта сатады. 2025 жылы компания Square арқылы Lightning Network арқылы биткоин төлемдерін енгізетінін жариялады. Бұл саудагерлерге биткоин қабылдауға және оны нақты уақытта фиат валютаға айырбастауға мүмкіндік береді, деп хабарлайды Cointelegraph.
Алайда Reuters мәліметіне сүйенсек, биткоинмен байланысты кіріс төмендеген. Бір жыл бұрын $2,61 млрд болған бұл көрсеткіш екінші тоқсанда $2,14 млрд-қа дейін азайды.
Cointelegraph Дорсидің криптовалютаға деген сенімін атап өтті. Ол блокчейн технологияларын және биткоинды қаржылық еркіндік пен децентрализацияның негізгі құралы ретінде белсенді түрде насихаттап жүр.
Сарапшылар не дейді?
Block акциялары осы жылы шамамен 10%-ға арзандады. Бұл кең нарықтағы өсімнен әлдеқайда төмен. Мамыр айының басында компания кварталдық қаржылық нәтижелерін жариялаған соң және жылдық болжамды нашарлатқаннан кейін акциялар бір күнде 18,4%-ға құлдырады. Дегенмен бұл шығындар шілде айында Block-тың S&P 500 индексіне енуімен біршама өтелді. Бұл жағдай институционалдық және жеке инвесторлар тарапынан компания акцияларына қызығушылықты арттырды, деп жазады MarketWatch.
Есеп жарияланардан бірнеше күн бұрын Morgan Stanley Block акцияларын сатып алуға берген ұсынысын кері қайтарды. Олар Square және Cash App бағыттарынан инвесторлар тым үлкен үміт күтетінін және бұл бағаларға әлдеқашан енгенін мәлімдеді. Инвестбанк мақсатты бағаны $73 деңгейінде қалдырды. Бұл қазіргі нарықтағы бағаға дейінгі раллиден бұрын да төмен еді.
MarketWatch дерегіне сәйкес, Уолл-стриттегі сарапшылардың басым бөлігі Block акцияларын сатып алуға кеңес береді. 32 адам оған Buy немесе Overweight рейтингін берген. Тағы он адам бұл акцияларды портфельде ұстауды ұсынған. Ал төртеуі оны сатуға кеңес береді.
