Bloomberg 2025 жылы инвесторларға 46 000%-дан астам пайда әкелген акцияны атады
Агенттіктің мәліметінше биыл жылдың басынан бері Nasdaq биржасында тіркелген, дәстүрлі қытай медицинасы препараттарын әзірлеумен айналысатын гонконгтық Regencell Bioscience Holdings компаниясының акциялары 46 000%-дан астам өскен. Бір жыл бұрын небәрі $53 млн тұратын компанияның капитализациясы бүгінде $30 млрд-қа жақындап қалды — бұл шығындар мен табыс болмағанына қарамастан орын алған жағдай.
Егжей-тегжейлі
Regencell Bioscience акциялары 1 қаңтардан бері 46 053%-ға өсіп, $60-қа жетті, ал нарықтық құны $30 млрд шамасына жақындады. Bloomberg атап өткендей, осы уақыт аралығында компания ешқандай маңызды жаңалық жарияламаған. 2024 қаржы жылының (30 маусымда аяқталған) қорытындысы бойынша компания $4,4 млн көлемінде шығын көрсетті.
Bloomberg мұндай негізсіз өсімді нарықта еркін айналыстағы акциялар үлесінің аздығымен (low free float) байланыстыруы мүмкін екенін айтады. Regencell шығарған шамамен 500 млн акцияның тек 6%-ы ғана саудаға қолжетімді. Мысал үшін, Apple акцияларының 98%-ы, ал Tesla акцияларының 87%-ы еркін саудада.
Regencell биыл жариялаған жаңалықтар
2025 жылы Regencell Bioscience инвесторлар үшін екі ғана хабарлама таратқан:
2 маусым күні компания акцияларды бөлуді (stock split) жариялады: әрбір акция иесі қосымша 37 акция алды.
16 маусымда бөліну рәсімі жүзеге асты, бұл жөнінде Regencell екінші ресми хабарламасын жариялады.
Осыдан кейін акциялар 276%-ға бір күнде шарықтады — Bloomberg деректері бойынша бұл бір күн ішіндегі ең ірі өсім. Ал 17 маусымдағы таңғы саудада бағалар тағы 50%-ға жуық көтерілді.
Regencell туралы не белгілі
Regencell Bioscience өздерін нейрокогнитивтік бұзылыстары бар науқастарға арналған дәстүрлі қытай медицинасы препараттарын әзірлеуші ретінде сипаттайды. Бұл ауруларға назар тапшылығы мен гиперактивтілік синдромы (ADHD) және аутизм спектрі бұзылыстары жатады.
Компания өнімдері әзірлену кезеңінде ғана және реттеуші органдар тарапынан мақұлданбаған, сондықтан түсім әкелмейді.
2024 қаржы жылындағы есебінде Regencell қызметін негізінен акционерлік қарыздар мен IPO-дан түскен қаражат арқылы қаржыландырып отырғанын көрсетті. 2021 жылғы IPO нәтижесінде компания $22,7 млн таза табыс (барлық шығындар мен андеррайтерлік опционды есепке ала отырып) алған.
«Біздің стратегиямыздың сәттілік ықтималдығы бизнесті бастапқы кезеңде дамыту мен кеңейтуде жиі кездесетін шығындар, қиындықтар, кедергілер мен кідірістерді, сондай-ақ біздің жұмыс істейтін нормативтік және бәсекелестік ортаны ескере отырып бағалануы тиіс», — делінген Regencell есебінде.
Аналитиктердің бағасы мен нарықтағы орны
Бүгінгі күнге дейін Wall Street-тегі бірде-бір сарапшы Regencell акцияларына рейтинг бермеген. Алайда, 2025 жылғы мамырда қаржылық ақпарат платформасы Nerdwallet бұл компанияны инвесторларға ең жоғары кіріс әкелген акциялар тізіміне енгізді.
