BofA сарапшылары дивидендтік пайда әкелетін төрт small-cap акцияны атады
Bank of America сарапшылары дивиденд пайдасы қазынашылық облигациялардан жоғары төрт шағын капиталды компанияны атады, деп хабарлайды CNBC. Тарифтер мен макроэкономикалық белгісіздікке байланысты small-cap компаниялар жоғары тәуекелге тап болып отырғанымен, олар ірі компаниялармен салыстырғанда әлі де арзан болып саналады, дейді BofA стратегі Джилл Кэри Холл. Шағын компанияларды бақылайтын Russell 2000 индексі әлі де өз максимумынан шамамен 15% төмен тұр. Биылғы жылдың басынан бұл индекс шамамен 4,5% жоғалтты.
«Капиталды акционерлерге қайтару — бұл small-cap акциялар сегментінде нарық құлдыраған кезде де, қалпына келу кезеңінде де тарихи жоғары кіріс әкелген стратегия», — деді Джилл Кэри Холл. Ол Russell 2000 индексінен дивидендтік кірістілігі 10 жылдық қазынашылық облигациялардан (4,39%) жоғары төрт акцияны таңдады. Міне сол компаниялар.
Ryman Hospitality
Ryman Hospitality Properties — ірі конференц-орталықтары мен кантри стиліндегі ойын-сауық нысандары бар қонақүйлер портфеліне иелік ететін жылжымайтын мүлікке инвестиция салатын қор.
Компанияның бірінші тоқсандағы қаржылық нәтижелері нарық күткеннен жоғары болды, деп жазады CNBC, Операциялық қызметтен түзетілген кірісі бір акцияға шаққанда $2,08 болып, сарапшылар болжаған $1,68-ден асып түсті. Компанияның жылдық есеппен есептелген табысы 11,2% өсіп, $587,3 млн-ға жетті және консенсус бағалаудан ($548,4 млн) жоғары болды. Таза пайда 47% өсіп, $63 млн-ды құрады.
Жыл басынан Ryman Hospitality акциялары 8% төмендеді, $95,9 дейін. Олардың жылдық дивидендтік кірістілігі – 4,8%.
Sabra Health Care
Sabra Health – медициналық қызмет көрсету саласындағы жылжымайтын мүлікті басқаратын компания, ол қарттар үйлері мен білікті мейіргерлік күтім көрсететін мекемелерге инвестиция салуға бағытталған. CNBC-нің жазуынша, халықтың қартаюына байланысты бұл сектор алдағы жылдары өседі деп күтілуде. АҚШ Халық санағы бюросының болжамына сәйкес, 65 жастан асқан америкалықтар саны 2022 жылғы 58 млн-нан 2030 жылға қарай 73 млн-ға дейін артады, ал олардың халық ішіндегі үлесі 17%-дан 21%-ға дейін ұлғаяды.
CNBC-нің мәліметінше, компанияның бірінші тоқсандағы табысы жылдық есеппен 10% өсіп, $183,5 млн-ды құрады, бұл сарапшылар күткеннен $5 млн-ға жоғары. Таза пайда $40,3 млн, 53%. Sabra Health — өтімділігі жоғары компания: оның есепшотында $1 млрд-тан астам қаражат бар, оның ішінде $917,3 млн қолжетімді қарыз қаражаты ретінде.
Жыл басынан Sabra Health қағаздары 2,6% өсті, $17,8 дейін. Олардың жылдық дивидендтік кірістілігі – 6,8%. Мамырдығ ортасында Scotiabank сарапшысы компания акцияларының мақсатты бағасын $18-ден $19-ға дейін көтеріп, оларды сатып алуға берген ұсынымын растады.
Northern Oil and Gas
Northern Oil and Gas мұнай саласында ерекше бизнес-модель ұстанады: компания басқа энергетикалық компаниялар басқаратын мұнай ұңғымаларындағы миноритарлық үлестерге инвестиция салады. Мұндай стратегия оларға бұрғылауға байланысты тұрақты шығындар мен операциялық тәуекелдерді көтермей-ақ табыс табуға мүмкіндік береді.
2024 жылдың бірінші тоқсанымен салыстырғанда, компанияның мұнай баламасын өндіру көлемі 13% өскен. Investing.com мәліметінше, бірінші тоқсан қорытындысы бойынша Northern Oil and Gas-тың табысы 8% өсіп, $602,1 млн-ды құрады, бұл күтілген $559,5 млн-нан жоғары.
Қаржылық көрсеткіштері жақсы болғанына қарамастан, жыл басынан компания акцияларының құны 25% төмендеді, $27,8-ге дейін. Олардың жылдық дивидендтік кірістілігі – 6,4%.
NorthWestern Energy
NorthWestern Energy — әртараптандырылған бизнесі бар коммуналдық компания. Ол электр және газбен жабдықтау қызметтерін ұсынып қана қоймай, сонымен қатар электр станциялары, электр жеткізу желілері мен газ құбырлары секілді активтерге иелік етеді және оларды басқарады.
Бірінші тоқсанда компанияның табысы өткен жылмен салыстырғанда 1,9% азайып, $466,6 млн-ды құрады. Соған қарамастан, таза пайдасы 18% өсіп, $76,9 млн немесе бір акцияға шаққанда $1,25 болды.
Жыл басынан NorthWestern Energy қағаздарының құны 1,6% төмендеді, $52,5-ке дейін. Олардың жылдық дивидендтік кірістілігі – 5%.
