BofA ЖИ«көпіршігінен» қорғануға ең тиімді активтерді атады
Жасанды интеллектке (ЖИ) байланысты компаниялардың акциялары тым қымбаттап кеткен жағдайда ең сенімді қорғаныс активтері – алтын мен қытай акциялары, деп есептейді Bank of America стратегтері. Олар орталық банктер биылғы рекордтық өсімге қарамастан, экономикалық белгісіздік фонында алтын сатып алуды жалғастырады деп күтеді. Ал қытай компанияларының акциялары АҚШ-тағыларға қарағанда биыл тезірек өсіп келе жатқаны үшін ұсынылады.
Егжей-тегжейі
«ЖИ раллиінің көшбасшылары әзірге берілейін деп тұрған жоқ, бірақ шамадан тыс қызып кету жағдайында алтын мен қытай акцияларын ең жақсы қорғаныс активтері ретінде ұсынамыз», — деп жазды Майкл Хартнетт жетекшілік ететін BofA стратегтері. Олардың инвесторларға арналған ескертпесін Bloomberg келтірді.
BofA сарапшыларының айтуынша, инвесторлар өз портфелдерін 2026 жылы экономикалық өсімнің тұрақтылығына, пайыздық мөлшерлемелердің төмендеуіне және президент Дональд Трамп тарапынан нарықтарға қолдау боларына үмітпен құрып отыр. Бұл жағдайда алтын жұмсақ ақша саясаты мен экономикалық өсім тудырған инфляция тәуекелінен қорғаныс ретінде қызмет етеді.
Қытай акцияларына келсек, MSCI China индексі биыл 33%-ға өсті. Бұл – аймақтың өз ЖИ-модельдерін дамыту әлеуетіне деген сенімнің нәтижесі. Ал салыстыру үшін: S&P 500 индексі 2025 жылы 16%-ға ғана көтерілді. Дегенмен, инвестбанк ескерткендей, Қытайдағы акциялар бес айлық өсімнен кейін баяулай бастауы мүмкін, өйткені нарықта қайтадан сауда тәуекелдері мен құрылымдық экономикалық мәселелер алдыңғы орынға шықты.
Хартнетт тобы бұған дейін де 2016 жылы Трамп жеңгеннен кейін халықаралық нарықтарға дұрыс бәс тігіп, азиялық және еуропалық акцияларды таңдаған. Сол кезде бұл аймақтардағы саясаттың жұмсаруы қор индексінің өсуіне әсер еткен.
Алтынның болашағы
2025 жылдың басынан бері алтын бағасы 54%-дан астам өсті және бірнеше рет тарихи рекорд жаңартты. Соңғы шарықтау 20 қазанда тіркеліп, бір унциясы 4381,21 доллар болды. Бірақ содан бері баға 8%-дан астам төмендеді. Bloomberg мәліметінше, EPFR деректері бойынша, соңғы аптада инвесторлар төрт айлық капитал ағынынан кейін алтын қорларынан 7,5 млрд долларды шығарып алған. Себебі олар АҚШ пен Қытай арасындағы сауда шиеленісінің әлсіреуін күтіп, тәуекелі жоғары активтерге, соның ішінде акцияларға, қызығушылық таныта бастады.
Reuters хабарлауынша, Morgan Stanley алтын бағасы 2026 жылдың ортасына дейін унциясына 4500 долларға дейін көтерілуі мүмкін деп болжайды. Банктің аналитиктері мұны биржалық қорлар (ETF) тарапынан жоғары физикалық сұраныспен және әлемдік экономикалық белгісіздік кезінде орталық банктердің алтын сатып алуын жалғастыруымен түсіндіреді. Сондай-ақ, Morgan Stanley зергерлік саладағы сұраныстың тұрақтануын күтеді.
Олардың талдауында: «Бағаның өсуі алтынды салыстырмалы күш индексі (RSI) бойынша артық сатып алынған аймаққа шығарды, бірақ кейінгі түзету бағаны тұрақты деңгейге қайтарды және нарықтық позицияларды «тазартуға» көмектесті», — делінген.
Дегенмен Morgan Stanley алтын нарығында теріс факторлар да бар екенін ескертеді. Олардың ішінде — бағаның жоғары құбылмалылығы, ол инвесторларды басқа актив түрлеріне көшуге итермелеуі мүмкін. Сондай-ақ орталық банктер алтын қорларын керісінше азайтуы да мүмкін.
Жалпы жағдай
Bloomberg жазғандай, ЖИ-эйфория сәуір айының басынан бері S&P 500 индексінің капитализациясына 17 трлн доллар қосты. Бұл өсімнің басты қозғаушысы — Nvidia компаниясы. Ол 29 қазанда әлемде алғаш болып нарықтық құны 5 трлн долларға жеткен компания атанды.
Қазір S&P 500 индексі болашақ табысқа баға қатынасы (P/E) 23 деңгейінде саудаланып жатыр, яғни инвесторлар индекстегі компаниялардың әр доллар табысына 23 доллар төлеуге дайын. Бұл тарихи орташа мәннен (шамамен 16) әлдеқайда жоғары. Сонымен қатар «Керемет жетілік» деп аталатын технологиялық алыптардың үлесі индекс салмағының үштен бірінен асып түседі, ал олардың P/E көрсеткіші 31-ге жетті.
Жұма күні нарықты Amazon мен Apple компанияларының мықты тоқсандық есептері қолдады. Бұл Meta компаниясы акцияларының төмендеуінен туған әсерді жұмсартуға көмектесті, себебі инвесторлар ЖИ саласындағы миллиардтаған инвестициялардан тез нәтиже күтпейді деген қорқыныш болған еді.
