Caris Life Sciences IPO-сы: қатерлі ісікке қарсы ЖИ-жоба нарыққа шықты
Жасанды интеллектті ДНҚ-ны зерттеуге және обыр ауруына арналған жеке емдеу жоспарларын жасауға қолданатын Caris Life Sciences компаниясының акциялары енді Freedom клиенттеріне арналған сауда жүйесінде қолжетімді. Акциялар CAI.US тикерімен орналастырылды. Nasdaq биржасында олар бірнеше сағаттан кейін саудалана бастайды.
Егжей-тегжейлі
Caris Life Sciences IPO кезінде 23,5 млн акцияны бір данасы $21 бағамен сатып, $494 млн қаржы тартты — бұл жаңартылған $19–20 аралығындағы баға дәлізінен жоғары. Бастапқыда компания акцияларды $16–18 диапазонында орналастыруды жоспарлаған еді, бірақ дүйсенбі күні бағасын көтеріп, дәлізді тарылтты. Инсайдерлер $75 млн-ға акция сатып алды — бұл мәміленің жалпы көлемінің 15%-ын құрайды. Жаңа бағаны ескерсек, Caris-тің толық сұйылтылған нарықтық құны $6,1 млрд-қа жетіп, бастапқы жоспардан 17%-ға артық болды деп хабарлайды Renaissance Capital.
Орналастыруды BofA Securities, J.P. Morgan, Goldman Sachs, Citi, TD Cowen, Evercore ISI және Guggenheim Securities ұйымдастырды.
Компания несімен қызықты
Caris жасанды интеллект көмегімен пациенттің генетикалық материалын — ДНҚ, РНҚ және ақуыздарды — талдап, обырды емдеудің жеке схемаларын әзірлейді. Қазіргі уақытта Caris-ке негізгі табыс әкеліп отырған өнім — тін үлгілері негізінде молекулярлық профилирлеу шешімі MI Profile. 2024 жылдың басында компания осыған ұқсас, бірақ қан талдауына негізделген және терапияны таңдауға арналған Caris Assure өнімін іске қосты. Бүгінгі таңда Caris 849 мың жағдай бойынша 6,5 млн-нан астам тест жүргізген және Moderna мен AbbVie сияқты 100-ден астам биофармацевтикалық компаниямен жұмыс істейді.
2008 жылы құрылған сәтінен бастап Caris шамамен 915 мың бірегей патогендік мутацияны анықтаған — оның ішінде тек 17 мыңы ғана бұрын белгілі болған, дейді Caris-тің негізін қалаушы және бас директоры Дэвид Хэлберт. «Біз қазір пациенттің бойындағы айналмалы патогендік мутацияларды анықтап, нақты мутациялар жиынтығына сәйкес жеке ем тағайындай аламыз, — деді Хэлберт. — Бұл тәсіл созылмалы ауруларды клиникаға дейінгі кезеңде алдын алуға жол ашады деп ойлаймыз».
2021 жылы Caris Sixth Street инвестициялық компаниясының жетекшілігімен өткен қаржыландыру раундында компанияны $7,8 млрд-қа бағалап, $830 млн тартты. Компания акционерлерінің қатарында АҚШ-тағы ең көне жекеменшік инвесткомпаниялардың бірі — J.H. Whitney де бар. 2025 жылдың сәуірінде Caris тағы бір қаржыландыру раундын өткізіп, қосымша $168 млн жинады.
Freedom-ның ұстанымы
Freedom Broker талдаушысы Әлем Бектеміров Caris Life Sciences акцияларына Buy (сатып алу) деген ұсыныс беріп, бір акция үшін мақсатты бағаны $26,4 деп белгіледі — бұл орналастыру дәлізінің жоғарғы шегінен 32%-ға жоғары. Оның айтуынша, MI Profile мен Caris Assure диагностикалық платформаларының тез таралуының арқасында компанияның жылдық табысы алдағы 10 жылда $412 млн-нан (2024) $5,4 млрд-қа (2034) дейін, яғни 13 есе өседі.
Басқа аналитиктер не дейді
Caris Life Sciences-тің листингі — бұл жай ғана тағы бір медтех IPO емес, бұл жасанды интеллект, сұйықтық биопсиясының дәлелденген технологиясы мен үздік инвесторлар қолдауының сирек кездесетін үйлесімі деп санайды биржалық талдау мен болжамдарға маманданған AInvest онлайн-платформасы. 2023 жылы АҚШ-тағы Medicare ұлттық медициналық сақтандыру бағдарламасы сұйық биопсия тесттерін қамтуды кеңейтті, ал обырға қарсы дәрілерге жұмсалатын шығындар 2027 жылға қарай $200 млрд-қа жетеді деп күтілуде. Мұның бәрі Caris шешімдеріне тұрақты сұранысты қамтамасыз етеді. Guardant пен Natera секілді бәсекелестер Caris-тің ИИ модельдерін көшіруге тырысуы мүмкін, бірақ компанияның деректер қоры оларға үлкен артықшылық береді, дейді AInvest.
Контекст
Caris — соңғы үш жылдық құлдыраудан кейін қалпына келе бастаған медтех секторында IPO-ға шығатын сирек компаниялардың бірі деп жазады MedTech Dive. Листинг жоспарын медициналық өнім жеткізуші Medline де хабарлады. Әлемдегі ең ірі медициналық құрылғылар өндірушілерінің бірі Medtronic өз диабетті емдеуге арналған бөлімшесін жеке компанияға бөліп шығармақ, әрі қарай оның акцияларын биржаға шығаруы мүмкін.
2025 жылдың алғашқы тоқсанында қант диабетіне арналған шешімдер әзірлеуші Beta Bionics Нью-Йорктегі IPO-да шамамен $212 млн тартты. Жүрекке арналған киілетін құрылғылар өндірушісі Kestra Medical Nasdaq-қа шыққан кезде $202 млн жинады. 17 маусымда Нью-Йорктегі саудада Beta Bionics акциялары орналастыру бағасынан 7%-ға жоғары бағамен жабылды, ал Kestra Medical акциялары IPO бағасынан 11%-ға арзандады.
Freedom клиенттеріне арналған ескерту
Caris акцияларымен негізгі биржалық сессия ашылғанға дейін сауда жасауға болады. Сауда АҚШ биржалары ашылғанға дейін 2–3 сағат бұрын, Астана уақытымен 15:30–16:30 аралығында ерте премаркет форматында басталады. Қатысу үшін CAI.US тикерін басыңыз.
