Coca-Cola нәтижесі күткеннен жақсы, бірақ акциялары неге төмендеп жатыр?
Қантсыз сусындарға сұраныс артқандықтан, Coca-Cola екінші тоқсанда Уолл-стрит күткенінен жақсы нәтиже көрсетті. Алайда, сатылым көлемі Еуропа, Таяу Шығыс және Африкадан басқа барлық өңірлерде қысқарғандықтан, акциялары шамамен 2% төмендеді.
Егжей-тегжейлі
Coca-Cola 2025 жылдың екінші тоқсаны бойынша пайдасы мен табысы жағынан сарапшылардың күткенінен асып түсті. LSEG дерегіне сілтеме жасаған CNBC хабарлауынша, реттелген бір акцияға шаққандағы пайда 87 центті құрап, Уолл-стриттің 83 центтік болжамынан жоғары болды. Сонымен қатар, салыстырмалы табыс жылдық есепте 2,5% өсіп, $12,62 млрд-ты құрады — бұл да күтілген $12,54 млрд-тан жоғары.
Мұндай нәтижелерге қантсыз сусындарға тұрақты сұраныс пен газдалған сусындарға бағаның өсуі себеп болды. Мысалы, Coca-Cola Zero Sugar сатылымы 14% артқаны барлық өңірлерде байқалған, деп хабарлайды Reuters. Компания сондай-ақ АҚШ-та өсірілген құрақ қантын қолданатын жаңа өнім желісін шығару жоспарын жариялады. Бұл шешім Дональд Трамптың компанияға қанттың табиғи түрін қолдану жөніндегі мәлімдемесінен кейін қабылданған. Бұған қоса, АҚШ денсаулық сақтау министрі Роберт Ф. Кеннеди-кіші бастаған “Make America Healthy Again” атты науқан аясында тамақ өндірушілер рецептураларын өзгертіп, денсаулыққа пайдалы ингредиенттерді қолдана бастады, деп түсіндіреді Reuters.
«Сыртқы орта өзгеріп жатқан шақта, біздің команда екінші тоқсанда назарды жоғалтпай, икемділік таныта алды — бұл бізге жылдың бірінші жартысындағы бағыт бойынша жұмыс істеуге көмектеседі», — деді Coca-Cola бас директоры Джеймс Куинси.
Компания жылдық болжамын ішінара нақтылады: енді 2024 жылғы көрсеткішпен салыстырғанда реттелген пайда 3% өседі деп күтуде ($2,88 акцияға). Бұған дейін 2–3% өсім болады деп болжанған еді. Сонымен бірге, компания валюталық бағамның теріс әсері салыстырмалы таза табысты 1–2%-ға төмендетуі мүмкін екенін ескертті. Қосымша қысымды 1% шамасында сату және бірігу мәмілелері, активтерді өткізу мен құрылымдық өзгерістер тудыруы ықтимал. Бұған дейін Coca-Cola валюталық бағам мен өзге факторлар табысқа 2–3% қысым болады, ал басқарушылық шешімдердің әсері шамалы болады деп күткен.
Акциялардың жай-күйі
22 шілдедегі саудада Coca-Cola акциялары шамамен 2% арзандап, $68,6 деңгейіне төмендеді. Бұл — 2025 жылғы 14 мамырдан бергі минимум. Дегенмен, жыл басынан бері компанияның нарықтық құны шамамен 12% өсті. Салыстырмалы түрде алғанда, АҚШ-тың негізгі қор индексі S&P 500 осы кезеңде шамамен 7% қосқан.
Пайда күткеннен жоғары болғанына қарамастан, инвесторлар компания қағаздарын сатты, себебі Coca-Cola сатылымы әлемнің көптеген өңірлерінде қысқарған, деп хабарлайды Barron’s. Жалпы сатылым көлемі (қаптама бойынша есептегенде) алдыңғы тоқсандағы 2%-дық өсімнен кейін шамамен 1% төмендеген. Сол мезетте Азия-Тынық мұхиты аймағында сатылым 3%, Латын Америкасында 2%, Солтүстік Америкада 1% қысқарды. Ал Еуропа, Таяу Шығыс және Африкада сатылым 3% артты. Coca-Cola басшылығы бұған дейін экономикалық белгісіздік пен геосаяси кернеуі тұтынушылардың сеніміне нұқсан келтірді, бұл кейбір нарықтардағы сатылымға кері ықпал етіп отырғанын мәлімдеген.
Контекст
Көптеген басқа компаниялар сияқты Coca-Cola да күрделі тұтынушылық ортада жұмыс істеп жатыр, деп жазады Barron’s. Инфляция мен рецессия қаупіне байланысты тұтынушылар шығындарын азайтуда. Сатылымға қосымша қысым жасаған факторлардың бірі — GLP-1 негізіндегі арықтататын препараттардың танымалдығы, бұл тәтті сусындарға деген қызығушылықты төмендетті. Салаға Трамп әкімшілігінің «Америка дені сау елге айналсын» атты бастамасы да қысым жасап отыр — ол жаңа реттеушілік тәуекелдерге алып келуі мүмкін.
Morgan Stanley сарапшысы Дара Мохсенянның Barron’s-қа берген түсіндірмесінде, тұтынушылар көңіл күйінің нашарлауына және реттеуші органдар қысымының артуына қарамастан, Coca-Cola тамақ өнеркәсібіндегі басқа ойыншылармен салыстырғанда анағұрлым тұрақты көрінеді. Бұл — өнім желісінің кеңдігі мен жаһандық нарықтағы қатысуының арқасында, себебі бұл компанияны АҚШ нарығындағы әлсіздікке тәуелділіктен аздап қорғайды. АҚШ нарығы компанияның жалпы табысының шамамен 40%-ын қамтамасыз етеді.
