DeepSeek-тен Duolingo-ға дейін: Forbes тізіміне ІИ арқылы байыған жаңа миллиардерлер
Forbes-тің әлемдік рейтингіндегі технологиялық миллиардерлердің жалпы байлығы басқа секторлардағы қатысушыларға қарағанда көбірек. Олардың жиынтық капиталы $3,2 трлн. Америкалық Forbes журналы әлемнің ең бай адамдары тізіміне жасанды интеллект арқылы байыған 19 жаңа есімді қосты. Олардың қатарында DeepSeek негізін қалаушысы, Alphabet бас директоры, Duolingo жасаушылары және әлемдегі ең жас миллиардер бар. Толық тізім төменде.
Майкл Интрейтор, Брайан Вентуро, Брэннин Макби, Jack Коджен — CoreWeave ИИ-стартапының негізін қалаушылары мен директорлар кеңесінің мүшесі | Капиталы: $3,1 млрд, $2 млрд, $1,5 млрд, $1,2 млрд | Ел: АҚШ
CoreWeave — жасанды интеллектке арналған бұлтты шешімдер провайдері — өткен апта соңында өткен IPO нәтижесінде $1,5 млрд тартып, нарықтық бағасы $20 млрд-тан асты. Бұл — АҚШ-тағы 2021 жылдан бергі ең ірі листинг. CoreWeave басшысы Майкл Интрейтор екі трейдермен бірге бастапқыда криптовалюта майнингіне арналған Nvidia чиптерін сатып алған. 2019 жылы олар есептеу қуатын сату бағытына көшіп, Microsoft сияқты ірі компанияларға қызмет көрсете бастады. 2024 жылдың мамырында CoreWeave жеке инвесторлардан $1,1 млрд инвестиция тартты — бағасы сол кезде $19 млрд-қа жетті.
Александр Уэнг, Scale AI негізін қалаушы | Капиталы: $2 млрд | Ел: АҚШ
Уэнг — әлемдегі ең жас миллиардер, жасы — 28-де. Оның Scale AI компаниясы нейрожелілерді оқыту үшін деректерді белгілейді және OpenAI, Google, Meta секілді техгиганттармен жұмыс істейді. 2024 жылдың мамырында компания $1 млрд инвестиция тартты — бағасы $14 млрд. 17 жасында ол Addepar финтех компаниясына жұмысқа орналасып, кейінірек Quora платформасында еңбек етті. 19 жасында Массачусетс технологиялық институтынан (MIT) шығып, Y Combinator акселераторына түсіп, Scale AI-ді іске қосты.
Джо Лонсдейл, Palantir теңқұрушысы | Капиталы: $2 млрд | Ел: АҚШ
Palantir компаниясының теңқұрушысы Джо Лонсдейл — бұрынғы PayPal тағылымгері, Питер Тильдің шәкірті. АҚШ қорғаныс және мемлекеттік құрылымдарына қызмет көрсететін компания акциялары бір жылда 250%-ға өскен соң, Лонсдейл миллиардер атанды. Сонымен қатар ол мемлекеттік бюджетке арналған OpenGov бағдарламалық жасақтама әзірлеушісінің де теңқұрушысы. 2024 жылдың ақпанында OpenGov-тың бақылау пакетін Cox Enterprises компаниясына $1,8 млрд-қа сатты. Forbes оны АҚШ президенті Дональд Трамптың жақтасы ретінде сипаттайды.
Фил Шоу, TransPerfect негізін қалаушы | Капиталы: $1,8 млрд | Ел: АҚШ
Фил Шоу 1992 жылы Нью-Йорк университетінің жатақханасында өзінің сүйіктісімен бірге TransPerfect аударма қызметі компаниясын ашты. 20 жылдан кейін олар сотқа жүгініп, 2018 жылы Шоу оның үлесін сатып алды. Бүгінде компания клиенттері арасында Microsoft пен АҚШ Әділет министрлігі бар. 2024 жылы TransPerfect табысы 8%-ға артып, $1,3 млрд-қа жетті.
Яо Жунхао, Paper Games негізін қалаушы | Капиталы: $1,3 млрд | Ел: Қытай
Forbes жазуынша, Яо Жунхао — бала кезінен геймер. Қазір Love and Deepspace атты жасанды интеллектпен басқарылатын кейіпкерлермен виртуалды кездесу симуляторына ай сайын 6 млн адам кіреді. 2024 жылдың қаңтарында шыққан бұл ойын Шанхайдағы жеке Paper Games студиясының табысының 80%-дан астамын қамтамасыз етеді. Жалпы табыс — $850 млн.
Дарио Амодеи, Даниэла Амодеи, Том Браун, Джек Кларк, Джаред Каплан, Сэм МакКэндлиш, Кристофер Ола — Anthropic негізін қалаушылар | Капиталы: әрқайсысы $1,2 млрд | Ел: АҚШ; Канада (Ола)
Claude атты ChatGPT бәсекелесін жасаған Anthropic компаниясы 2025 жылдың наурызында $3,5 млрд инвестиция тартып, $61,5 млрд бағаланды. Дарио Амодеи компанияны 2021 жылы қарындасы Даниэла және тағы бес әріптесімен бірге құрды. Барлығы — OpenAI-дің бұрынғы қызметкерлері, енді олардың бәрі миллиардерге айналды. Олардың арасында Bloomberg-тің бұрынғы журналисі Джек Кларк және теориялық физика профессоры Джаред Каплан да бар.
Сундар Пичаи, Alphabet бас директоры | Капиталы: $1,1 млрд | Ел: АҚШ
Сундар Пичаи 2019 жылдан бері Google-дің ана компаниясы Alphabet-ті басқарады, бірақ компанияның небәрі 0,02%-ына ие болғандықтан, бұрын Forbes тізімінде болмаған. Алайда акция бағасының бір жылда 30%-ға өсуі — оның ішінде Gemini 2.0 ИИ-моделінің шығуына байланысты — Пичайдың миллиардерлер тізіміне қосылуына жеткілікті болды.
Луис фон Ан және Северин Хакер, Duolingo негізін қалаушылар | Капиталы: әрқайсысы $1,1 млрд | Ел: АҚШ (фон Ан) және Швейцария (Хакер)
Duolingo қосымшасын ай сайын 100 млн-нан астам адам 40-тан астам тілді — арабшадан идишке дейін — үйрену үшін пайдаланады. Фон Анды жалғызбасты анасы Гватемалада өсірген, өзі АҚШ-та Duke пен Carnegie Mellon университеттерінде оқыған. Кейін ол профессор болып, Captcha тексеру жүйесін ойлап тапты. 2011 жылы ол Duolingo-ны швейцариялық аспирант Северин Хакермен бірге іске қосты — Хакер докторлықты үш жылдан кейін ғана бітірген.
Лян Вэньфэн, DeepSeek стартапының негізін қалаушы | Капиталы: $1 млрд | Ел: Қытай
Лян Вэньфэн негізін қалаған DeepSeek компаниясы жыл басында әлемде үлкен қызығушылық тудырды. Компанияның айтуынша, оның жаңа R1 ИИ-моделі ChatGPT-мен бәсекелесе алады, бірақ әлдеқайда арзан. Кәсіпкер сыртқы инвестиция тартпай, жобаны 2015 жылы екі курстасымен құрған High-Flyer Capital Management хедж-қорының табысынан қаржыландырған.
