«Экономикаға ауыр соққы»: Уолл-стрит АҚШ-тағы шатдаун қаупі туралы
Инвестбанктер сарапшылары АҚШ-та болуы мүмкін шатдаун (үкімет жұмысының тоқтауы) нарықтағы тұрақсыздықты күшейтіп, инвестор сенімін төмендетуі ықтимал екенін ескертті. Бұған дейін мұндай жағдайлар көбіне экономикаға да, қор нарығына да шектеулі әсер еткен. Бірақ бұл жолы саяси келіспеушіліктер, мемлекеттік қызметкерлерді қысқарту қаупі және маңызды статистика жариялануының кешігуі тәуекелді арттыруы мүмкін.
JPMorgan не дейді?
JPMorgan сарапшысы Мэри Парк Даремнің айтуынша, шатдаун инвестор сенімін әлсіретуі ықтимал. Соңғы жылдары америкалық активтерге салым азайып жатқанын да атап өтті.
«Бұл жолғы шатдаун саясаттағы қарама-қайшылықтар, сыртқы соққыларға экономиканың әлсіздігі және нарықтарды тұрақсыздандырған шаралар аясында фонд нарығына көбірек қысым түсіруі мүмкін», — дейді ол.
Сондай-ақ, мемлекеттік мекемелердің жұмысы тоқтап, инфляция индексі сияқты негізгі көрсеткіштер бойынша статистика жарияланбаса, бұл ФРЖ шешімдеріне кедергі келтіруі мүмкін. Инвесторларға әртараптандыруды күшейтіп, сапалы компаниялар мен баламалы активтерге басымдық беруді ұсынады.
UBS өткен тәжірибені еске салды
UBS сарапшылары АҚШ-та шатдаундар жиі болғанын, бірақ көп жағдайда бір аптадан аспағанын айтады. Қысқа мерзімді үзілістер экономикаға да, нарықтарға да үлкен әсер етпейді.
Олар ұзақ шатдаундардың салдарын зерттеп, үш жағдайды талдады: 1995–1996 (21 күн), 2013 (16 күн) және 2018–2019 (34 күн).
— 1995–1996 жылдары нарыққа әсері аз болды: S&P 500 индексі шамамен өзгермеді, облигация кірістілігі сәл көтерілді.
— 2013 жылы әсері байқалды: индекс 1%-ға төмендеді, ал 10 жылдық облигациялар кірістілігі 3–9% құлады.
— 2018–2019 жылдардағы ең ұзақ шатдаунда S&P 500 екі аптада 8%-дан астам жоғалтты, облигациялар кірістілігі 9%-ға азайды. Бірақ ол кезде тарифтер мен ФРЖ саясаты да қосымша қысым жасаған. Шатдаун аяқталған соң нарықтар тез қалпына келді.
Morgan Stanley болжамы
Morgan Stanley стратегі Майкл Зезастың сөзінше, әр аптадағы шатдаун АҚШ ЖІӨ-ін шамамен 0,1%-ға азайтады. Әдетте мемлекеттік қызметкерлер жұмысқа қайта оралғанда, бұл әсер тез жойылады. Бірақ биылғы жағдайда ерекшелік болуы мүмкін.
«Трамп әкімшілігі шатдаун кезінде қызметкерлерді ұзақ мерзімді жұмыстан шығару мүмкіндігін талқылауда. Бұл экономикаға әлдеқайда ауыр із қалдыруы ықтимал», — деді ол.
Негізгі қауіп — нарықтар әлсіз ЖІӨ өсімін алдын ала бағалауы мүмкін. Бұл облигациялар кірістілігінің төмендеуіне, акциялардың қысымға түсуіне және құбылмалылықтың артуына әкеледі. Ресми статистика болмаған кезде инвесторлар сыбыстарға сүйеніп, тәуекелдерді елемей қалуы мүмкін. Сондықтан тіпті қысқа шатдаун да шамадан тыс реакция туғызуы ықтимал.
Freedom ескерту жасады
Freedom Broker сарапшылары шатдаунның басты қатері — негізгі макродеректердің, соның ішінде еңбек нарығы есебінің кешігуі екенін айтады. Бұл нарықтағы белгісіздікті күшейтеді.
Тарихи тұрғыда мұндай жағдайлар шағын сатылымдарға әкелгенімен, экономикаға зиян аз болған. Алайда бұл жолы жаппай жұмыстан шығару қаупі бар. Freedom Broker мұны сатып алу мүмкіндігі ретінде көреді: қысқа мерзімді төмендеулер циклдік секторларға және шағын компания акцияларына кіруге қолайлы жағдай жасайды.
Контекст
АҚШ үкіметін қаржыландыру 30 қыркүйекте тоқтайды, бұл шатдаун қаупін тудырып отыр. Сенат өкілдер палатасының бюджеттік заң жобасын қабылдамады: демократтар бірқатар субсидиялардың ұзартылмауына қарсы шықты.
Шатдаун Конгресс уақытында бюджет қабылдамаған кезде болады. Бұл дефолт емес: «маңызды емес» қызметкерлер ақысыз демалысқа жіберіледі немесе жалақысыз жұмыс істейді. Мұндай жағдайлар әдетте қысқа мерзімді болады — 1950 жылдан бері АҚШ-та 21 шатдаун болды, көпшілігі бірнеше күнге ғана созылған.
