Eli Lilly компаниясының Альцгеймер ауруына қарсы препараты ЕО-да мақұлданбады

АҚШ-та мақұлданғанымен, америкалық фармацевтикалық компания Eli Lilly әзірлеген Альцгеймер ауруына қарсы препарат Еуроодақта сатуға рұқсат ала алмады. Бұл – Eli Lilly үшін сәтсіздік, себебі компания бұл нарықта өзінің бәсекелестерімен тартысқа түспек болған. Нью-Йорктегі таңғы сауда кезінде компания акциялары арзандады, бірақ биржа ашылғаннан кейін аздап өсе бастады.

Мәліметтер

Eli Lilly компаниясының Kisunla атты препараты, Альцгеймер ауруының дамуын баяулататын бұл дәрі, Еуропада мақұлданбады деп жазды Bloomberg. Еуропалық дәрі-дәрмек агенттігінің (EMA) Медициналық препараттар комитеті бұл дәрінің артықшылығы оның өлімге әкелуі мүмкін ми ішілік қан кету қаупінен басым емес деген шешімге келді. Олар Kisunla қолданылған үш өлім жағдайын тіркеген. Соңғы шешімді Еуропалық комиссия қабылдайды, деп хабарлайды Bloomberg.

Eli Lilly өз кезегінде препараттың қауіпсіздігі мен тиімділігіне сенімді екенін айтып, еуропалық науқастар үшін қолжетімді болатынына үміт білдірді. Компания бұл шешімге наразы екенін айтып, комитеттің қорытындысын қайта қарауды сұрайтынын жеткізді.

Не білдіреді

Еуроодақ тарапынан рұқсат берілмеуі Lilly үшін кері әсер етті, себебі компания бұл ауруға қарсы дәрілер нарығында Eisai және Biogen секілді бәсекелестерімен жарысқа түспек еді, деп жазады Bloomberg. Bloomberg Intelligence мәліметіне сай, аталған нарықтың көлемі 2030 жылға қарай $250 млн-нан $13 млрд-қа дейін өсуі мүмкін.

Eisai мен Biogen бірлесіп әзірлеген бәсекелес дәрі — Leqembi — ЕО-да сатуға мақұлданған. Алайда ол да бастапқыда рұқсат ала алмаған еді, кейіннен тек шектеулі топқа тағайындалуға рұқсат берілді.

Kisunla мен Leqembi препараттарының екеуі де АҚШ-та Альцгеймер ауруының ерте кезеңіндегі науқастарды емдеуге мақұлданған. Сондай-ақ, Lilly Жапония мен Ұлыбританияда да Kisunla үшін рұқсат алған.

Акциялардың жағдайы не болмақ

28 наурыздағы сауда кезінде Eli Lilly акциялары премаркетте арзандады, алайда Нью-Йорктегі негізгі сауда басталғаннан кейін сәл өсті. Жыл басымен салыстырғанда компания акциялары шамамен 7%-ға қымбаттады.

Аналитиктер компанияға оң көзқарас танытып отыр. WSJ дерегіне сай, Lilly акцияларын бақылайтын 30 сарапшының біреуі ғана сатуға кеңес береді (Underweight). Тағы төртеуі бар акцияны ұстай тұруға кеңес берген (Hold).