ФРЖ шілдеде мөлшерлемені төмендетуге қарсы шықты — Bloomberg
АҚШ Федералды резерв жүйесінің бірнеше өкілі шілде айының соңында пайыздық мөлшерлемені төмендетуге қарсы екенін айтты, деп хабарлайды Bloomberg. Дональд Трамптың қысымына және кейбір инвесторлардың үмітіне қарамастан, ФРЖ инфляцияны біраз уақыт бақылауда ұстағысы келеді. Олар кедендік баж салығының көтерілуі инфляцияның тұрақты өсуіне әкелмейтініне көз жеткізгісі келеді.
Егжей-тегжейлі
Соңғы аптада ФРЖ-ның шамамен он шақты өкілі, соның ішінде төраға Джером Пауэлл, Нью-Йорк ФРБ басшысы Джон Уильямс және Сан-Франциско ФРБ басшысы Мэри Дейли шілдеде мөлшерлемені төмендетуге қарсы шықты, деп жазды Bloomberg. Бұл мәлімдемелер ФРЖ мүшелері Кристофер Уоллер мен Мишель Боумен инфляция төмен деңгейде сақталса, 29–30 шілдедегі отырыста-ақ мөлшерлемені төмендетуді қолдауға дайын екенін айтқаннан кейін жарияланды.
Мысалы, Мэри Дейли 26 маусымда Bloomberg-ке берген сұхбатында импорттық баж салығы инфляцияны күрт немесе тұрақты түрде өсірмеуі мүмкін деген белгілер көбейіп жатқанын айтты. Бірақ бұл оның пікірінше, мөлшерлемені тек күзде төмендетуге дауыс беруге дайын екенін көрсетеді.
«Менің негізгі болжамым – мөлшерлемені күзде төмендетуді бастауға болатыны. Бұл ұстанымым өзгерген жоқ», – деді Сан-Франциско ФРБ басшысы.
Шілдеде мөлшерлемені төмендетуге тағы кім қарсы?
Bloomberg News-ке берген сұхбатында Бостон федералдық резерв банкінің президенті Сьюзан Коллинз шешім қабылдау үшін көбірек мәлімет керек екенін айтты. «Жиналысқа дейін бізде тек бір айлық қосымша дерек болады. Бұл мен үшін жеткіліксіз. Мен көбірек ақпарат болғанын қалаймын», — деді ол. Коллинздің базалық болжамы мөлшерлемені жылдың екінші жартысында ғана төмендетуді көздейді: «Бұл бір ғана төмендету болуы мүмкін немесе бірнешеу. Бірақ шешімді деректерге қарап қабылдаймыз. Әзірге асығатын себеп көріп тұрған жоқпын», — деді ол.
Ричмонд ФРБ басшысы Том Баркин де Нью-Йорк іскерлік экономика қауымдастығына сөйлеген сөзінде баж салықтары инфляциялық қысым тудыруы мүмкін екенін айтып, кез келген әрекетке асықпауға шақырды. «Қай бағытта болмасын асығудың қажеті жоқ. Қазіргі экономиканың күшін ескерсек, бізде жағдайды бақылап, нақтырақ мәлімет күтуге уақыт бар», — деді ол, Коллинздің пікірін қолдап.
Чикаго ФРБ президенті Остин Гулсби де пікір білдіріп, егер инфляция 2% мақсатына қарай тұрақты түрде төмендесе және экономикалық белгісіздік азайса, онда ФРЖ мөлшерлемені төмендетуге қайта оралуы мүмкін екенін айтты. «Мен үміттімін: біз жігерлендіретін деректер алып жатырмыз. Мүмкін, баж салығының әсері шектеулі болады. Бірақ соған көз жеткізгіміз келеді», — деді ол.
ФРЖ төрағасы Пауэллдің позициясы
Сейсенбі күні Конгрессте сөйлеген сөзінде ФРЖ төрағасы Джером Пауэлл инфляция төмендеуін жалғастырса, реттеуші мөлшерлемені төмендетуді қазірдің өзінде бастар еді, деп мәлімдеді. Алайда ол болашақтағы баға өзгерістеріне қатысты белгісіздік, әсіресе баж салығы әсері, ФРЖ-ны сақ болуға мәжбүрлеп отырғанын айтты.
«Баж салықтарының әсері олардың нақты қандай болатынына байланысты болады. Қазір бізде күтуге, экономиканың қай бағытта дамитыны туралы көбірек мәлімет алуға жақсы мүмкіндік бар. Тек содан кейін ғана ақша-несие саясатын өзгерту туралы ойланамыз», — деді Пауэлл.
Ол маусым және шілде айларындағы инфляция көрсеткіштерін көріп барып шешім қабылдаған дұрыс, деп есептейді. Себебі баж салығының нақты экономикаға қалай әсер ететінін алдын ала болжау қиын. Дегенмен, ФРЖ салықтардың тұтыну бағаларына әсері реттеуші ойлағаннан әлдеқайда әлсіз болуы мүмкін екенін де жоққа шығармайды.
Bloomberg жазғандай, Пауэлл шілдеде мөлшерлемені төмендету мүлде мүмкін емес деген жоқ. Бірақ ол да асықпау керек екенін, ФРЖ-ның күтуге және экономика бағыты туралы көбірек білуге уақыты бар екенін атап өтті.
Бағалардың қазіргі жай-күйі
АҚШ-та биыл инфляция күткеннен де тезірек баяулап келеді. Мысалы, сәуір айында ФРЖ негізгі инфляциялық көрсеткіш ретінде қарайтын тұтынушылық шығындар индексі (PCE) жылдық есепте 2,1% өсті. Бұл — ФРЖ мақсатты қойған 2%-дық деңгейге өте жақын. Ал тамақ пен энергия бағаларын есепке алмайтын базалық индекс 2,5%-ды құрады.
27 маусымда жарияланған мәліметтерге сәйкес, жұмыссыздық бойынша жәрдемақы алып жүрген америкалықтар саны 2021 жылдың қарашасынан бері максимумға жеткен. Бұл соңғы алты аптадағы күрт өсімнің жалғасы және адамдардың жұмыс таба алмай, ұзақ уақыт жұмыссыз жүргенін көрсетеді. Алайда 21 маусымда аяқталған аптада жаңадан өтініш бергендер саны азайған. ФРБ Сан-Франциско президенті Мэри Дейлидің айтуынша, еңбек нарығы расымен бәсеңдеп келеді, бірақ қазірше оның қатты әлсірегеніне дәлел жоқ.
