Google Anthropic ЖИ стартапына ондаған миллиард долларға чиптер жеткізеді
Google мен Claude атты ірі тілдік модельдер желісін жасап жатқан Anthropic компаниясы ондаған миллиард доллар тұратын бұлтты серіктестік туралы келісім жасады. Осы келісім аясында Google Anthropic-ке жасанды интеллект пен машинамен оқытуға арналған бір миллион арнайы процессор береді. 23 қазанда кешкі саудада Google-дің бас компаниясы Alphabet акциялары бұл жаңалықтан кейін 1 пайызға өсті.
Егжей-тегжейі
Anthropic пен Google бұлттық серіктестікті кеңейтетін жаңа келісім туралы ресми хабарлады. Жаңа шарт бойынша технология алыбы Anthropic-ке бір миллион тензорлық процессорға (TPU) қол жеткізу мүмкіндігін береді. Бұл чиптер ЖИ модельдерін оқыту кезіндегі есептеу үдерісін жеделдету үшін арнайы жасалған. Компаниялар келісімнің құны ондаған миллиард доллар екенін атап өтті және ол 2026 жылға қарай ЖИ жүйелеріне бір гигаваттан астам есептеу қуатын қамтамасыз ететінін мәлімдеді.
CNBC жазуынша, бұл Anthropic компаниясының TPU сатып алудағы ең ірі келісімі. Сарапшылардың бағалауынша, қуаты бір гигаваттық деректер орталығын салу шамамен 50 миллиард долларға түседі, оның 35 миллиарды чиптердің өзіне жұмсалады.
Маңызы
Bloomberg пікірінше, бұл келісім Google-дің ЖИ саласында ең ірі инвестор және инфрақұрылым жеткізушілердің бірі ретіндегі орнын бекітеді. Ал Anthropic Nvidia өнімдерінен бөлек, ең озық чиптік инфрақұрылымдардың біріне қол жеткізіп отыр. Бұл стартапқа қымбат әрі жетіспейтін графикалық процессорларға (GPU) тәуелділікті азайтуға мүмкіндік береді.
Claude тілдік модельдері қазір Google, Nvidia және Amazon компаниясының Trainium чиптерінде жұмыс істейді. Әр платформа жеке міндеттерге арналған. Мұндай әртараптандырылған тәсіл 20 қазан, дүйсенбі күні Amazon желісінде болған ақау кезінде тиімділігін дәлелдеді — Claude қызметі зардап шеккен жоқ, деп жазады CNBC.
Google Anthropic компаниясына бұған дейін шамамен 3 миллиард доллар инвестиция салған: оның 2 миллиарды 2023 жылы, тағы 1 миллиарды биылдың басында бөлінді. Бірақ стартаптың негізгі инвесторы және бұлтты қызмет жеткізушісі болып Amazon қала берді. Оның инвестициясы 8 миллиард долларға бағаланады. Bloomberg 22 қазанда келіссөздер туралы алғаш хабарлағаннан кейін Amazon акциялары арзандап, ал Alphabet қағаздары керісінше өсті. 23 қазанда ресми хабардан кейін Alphabet акциялары тағы 1 пайызға көтерілді, бірақ сауда соңына қарай өсімнің жартысы жоғалды.
Anthropic — OpenAI секілді жабық компания. Bloomberg мәліметінше, қыркүйекте өткен соңғы қаржыландыру кезеңінде оның нарықтық бағасы 183 миллиард долларға жеткен.
