GTA VI ойынының көптен күткен релизі тағы кейінге қалды. Take-Two акциясы құлдырады
Grand Theft Auto (GTA VI) ойынының шығуы тағы да шегерілді. Америкалық Take-Two Interactive Software компаниясы ойынды бастапқы жоспарланған мерзімнен алты ай кеш — 2026 жылдың қарашасында шығаратынын хабарлады.
Компания GTA әзірлеушілеріне «ойынды ойыншылар күткен әрі лайықты сапа деңгейінде аяқтауы үшін қосымша уақыт беру» туралы шешім қабылдағанын айтты. Ойынның баспагері — Rockstar Games, ол толықтай Take-Two-ға тиесілі.
GTA VI тарихтағы ең табысты видеоойындардың біріне айналады деп күтіліп отыр, деп жазады Bloomberg. Бұған дейінгі Grand Theft Auto V 220 миллионға жуық данамен сатылып, Minecraft-тан кейінгі екінші ең көп сатылған ойын болған. Алайда GTA VI релизі бұған дейін де бірнеше рет шегерілген. Алғашында ол 2025 жылдың күзіне жоспарланған еді, кейін 2026 жылдың көктеміне ауыстырылды.
Бұл релиз Take-Two үшін аса маңызды, себебі GTA франшизасы компания табысының елеулі бөлігін қамтамасыз етеді. Ойынның тағы да кешіктірілгені туралы жаңалық шыққаннан кейін, Take-Two акциялары Нью-Йорктегі кеңейтілген саудада 8%-дан астамға төмендеді.
Соған қарамастан, жыл басынан бері Take-Two акциялары 37%-ға өсіп, Nasdaq 100 индексінен екі есе артық нәтиже көрсетті. Уолл-стрит сарапшыларының орташа болжамы бойынша, келесі 12 айда акциялар тағы 10%-ға өсуі мүмкін. Жалпы алғанда, компанияны 31 аналитик талдайды: олардың 25-і акцияны сатып алуға кеңес береді, ал тек 1-еуі сатуға кеңес беріп отыр.
