Instagram мен WhatsApp сатып алу ісі: Meta ірі антимонополиялық дауда жеңіске жетті

АҚШ соты Meta компаниясы Instagram және WhatsApp сервистерін сатып алу кезінде антимонополиялық заңды бұзбағанын анықтады, деп хабарлайды Reuters. Федералдық сауда комиссиясы (FTC) компанияны бұл сервистерді бөлуге немесе сатуға міндеттеуді талап еткен. Олардың пікірінше, бұл әлеуметтік желілер нарығындағы бәсекелестікті қайтаруы тиіс еді. Ал Meta мұндай сатып алулар — бизнес үшін қалыпты тәжірибе екенін, ол жаңа мүмкіндіктерді тезірек дамытуға мүмкіндік беретінін айтты. Компания сонымен қатар реттеушілер TikTok, YouTube және Apple сервисінен болатын нақты бәсекені елемей отырғанын атап өтті — олар да нарыққа үлкен қысым түсіреді.

Reuters атап өткендей, Meta-ға қарсы бұл іс АҚШ билігінің ірі технокорпорацияларға қарсы жүргізіп жатқан кең ауқымды антимонополиялық кампаниясының бір бөлігі. Агенттік мәліметінше, сот шешімі — бигтех үшін алғашқы ірі жеңіс. Сонымен бірге Amazon-ға қатысты тергеу жалғасып жатыр, ал Әділет министрлігі Google мен Apple компанияларына қарсы істерді де қарауда.