«Инвестиция — 5 минуттық трейдинг емес»: Nasdaq орынбасарының кеңесі
Nasdaq биржасының төраға орынбасары Роберт Маккуи жаңадан бастаған инвесторларға жекелеген құнды қағаздарды сатып алуға қарағанда, Nasdaq-100 индексіне назар аударуға кеңес берді. Оның айтуынша, бұл — тәуекелі төмендеу, теңгерімді балама.
«Nasdaq-тың ең жақсы құралдарының бірі — Nasdaq-100 индексі. Егер инвесторға әзірге жекелеген акцияларды сатып алу қолайсыз болса — онда Nasdaq-100 тамаша балама бола алады. Өйткені бір қағаздың бағасы өсуі де, құлдырауы да мүмкін», — деді Маккуи Freedom Broker-ге берген сұхбатында.
Nasdaq-100 — Nasdaq биржасында сауда жасайтын, капитализациясы ең үлкен 100 ірі қаржылық емес компаниялардың қоржыны. Кең тараған пікірге қарсы, индекстің құрамы тек технологиялық сектордан тұрмайды, деп атап өтті Маккуи. «Nasdaq инновациялық технологиялық компаниялар алаңы ретінде танылғанымен, индекс құрамы шын мәнінде өте әртараптандырылған», — деді ол.
Маккуи АҚШ-тың технологиялық алыптарынан бөлек, индекс құрамына Marriott қонақүй желісі, JetBlue Airways әуе компаниясы, Starbucks кофеханалар желісі, сондай-ақ PepsiCo мен Keurig Dr Pepper сусын өндірушілері, өнеркәсіп және медицина секторындағы жетекші кәсіпорындар сияқты америкалық эмитенттердің қағаздары да кіретінін еске салды. Сонымен қатар, индекс құрамында шетелдік компаниялар да бар — мысалы, Латын Америкасының «Amazon» атанған Mercado Libre.
Нарыққа кіру стратегиясы туралы айта келе, Nasdaq төраға орынбасары инвесторларға қарапайым әрі әртараптандырылған құралдарды таңдауға кеңес берді. Оның айтуынша, ондай құралдар «инвестицияға біртіндеп еніп, нарықпен бірге өсуге мүмкіндік береді». Топ-менеджер жаңадан бастаған инвесторларға спекулятивтік саудадан аулақ болып, ұзақ мерзімді нәтижеге бағытталуды ұсынды.
«Инвестиция — 5 минуттық трейдинг емес, бұл жылдарға, тіпті онжылдықтарға созылатын процесс. Үш, бес, он, елу жыл — дәл осындай перспективада ойлау керек», — деп қорытындылады Маккуи.
