Инвесторлар үшін аптаның басты оқиғасы – жұма күні
Аптаның ең маңызды экономикалық оқиғасы жұмаға жоспарланған – бұл күні АҚШ-тағы жеке тұтыну шығындары индексі (PCE) ақпан айына жарияланады. Бұл – Федералды резерв жүйесі (ФРЖ) инфляцияны бағалау үшін басымдық беретін көрсеткіш. Экономистердің болжамынша, базалық PCE индексі (азық-түлік пен энергия бағаларын есептемегенде) жылдық есепте 2,7%-ға өсті, бұл қаңтардағы мәннен 0,1 пайыздық пунктке жоғары, деп жазады Barrons.
Өткен аптада ФРЖ шенеуніктері биылғы жылға арналған базалық инфляция бойынша болжамдарын 0,3 п.п.-ке көтеріп, 2,8%-ға жеткізді. Bloomberg Economics сарапшылары Анна Вонг, Стюарт Пол, Элиза Уингер, Эстель Оу және Крис Коллинз «АҚШ азаматтарының тұрақты шығындары мен инфляцияның баяу төмендеуін ескере отырып, ФРЖ-ның пайыздық мөлшерлемені өзгеріссіз қалдырып, болжамдарды қайта қарауы қисынды қадам болды» деп есептейді.
Экономикалық күнтізбе
Бұл аптада инфляциядан бөлек, бірнеше маңызды макроэкономикалық деректер жарияланады. Атап айтқанда, наурыз айына арналған S&P Global іскерлік белсенділік индексі (PMI), Conference Board-тың тұтынушылық көңіл-күй индексі және АҚШ-тың Халық санағы бюросының ұзақмерзімді тұтыну тауарларына берілген тапсырыстар бойынша есебі.
Компаниялар табысы
Апта барысында GameStop, Lululemon Athletica және құрылыс компаниясы KB Home сияқты бірқатар ритейлер өздерінің қаржылық есебін жариялайды.
24 наурыз, дүйсенбі
S&P Global өндіріс және қызмет көрсету салаларындағы іскерлік белсенділік индексінің алдын ала көрсеткіштерін ұсынады. Консенсус болжамға сәйкес, өнеркәсіп индексі – 51,5, қызметтер – 50,9 (ақпанда тиісінше 52,7 және 51 болған).
Сол күні Dragonfly, KB Home және Oklo кварталдық есептерін ұсынады.
25 наурыз, сейсенбі
Conference Board наурыз айының тұтынушылық сенімділік индексін жариялайды – болжам бойынша, ол 94 тармаққа дейін төмендейді. Сондай-ақ, АҚШ Халық санағы бюросы ақпандағы жаңа үйлердің сатылымы туралы мәлімет ұсынады, ал Тұрғын үйді қаржыландыру федералды агенттігі (FHFA) қаңтардағы тұрғын үй бағасы индексін жариялайды.
Сол күні GameStop, McCormick және Rumble есеп береді.
26 наурыз, сәрсенбі
АҚШ Халық санағы бюросы ұзақмерзімді тұтыну тауарларына тапсырыстар бойынша есепті жариялайды.
Сол күні Chewy, Dollar Tree, BRP, Jefferies және Petco кварталдық нәтижелерін көрсетеді.
27 наурыз, бейсенбі
АҚШ-тың Экономикалық талдау бюросы (BEA) 2023 жылдың IV тоқсанына арналған ЖІӨ-нің соңғы бағасын ұсынады. Сонымен қатар, Риэлторлар ұлттық қауымдастығы (NAR) ақпан айындағы аяқталмаған тұрғын үй сатылымдарының индексін жариялайды.
Қаржылық есептерді Bitfarms, Lululemon және Winnebago ұсынады.
28 наурыз, жұма
Экономикалық талдау бюросы (BEA) ақпан айындағы жеке тұтыну шығындары индексін (PCE) жариялайды.
Бұл күні маңызды компания табыстары жоспарланбаған.
