JPMorgan мен Coinbase банктік карталарды криптоәмияндармен байланыстырады
JPMorgan мен криптобиржа Coinbase әріптестік орнатып, АҚШ-тағы ең ірі банктің 80 миллионнан астам клиентіне өздерінің банктік шоттары мен карталарын криптоәмияндарға байланыстыруға мүмкіндік бермек. Биылғы күзден бастап олар банктік карталар арқылы криптоәмияндарын толықтыра алады, ал 2026 жылдан бастап шоттарын байлап, тіпті бонус ұпайларын стейблкоиндарға айырбастау мүмкіндігіне ие болады. Бұл қадам ірі банктердің өз клиенттерін криптовалюта әлеміне енгізу тәсіліндегі бетбұрыс болуы мүмкін.
Егжей-тегжейлі
JPMorgan мен Coinbase екі кезеңнен тұратын әріптестік басталғанын хабарлады. 2025 жылдың күзіне қарай, банктің шамамен 80 млн клиенті Chase несиелік карталардың көмегімен криптоәмияндарын толықтыра алады. Ал 2026 жылдан бастап, банктік шотты Coinbase платформасындағы аккаунтпен тікелей байланыстырып, криптовалюта аударуға мүмкіндік туады.
Сондай-ақ, екінші кезеңде Chase картасының иелері бонус ұпайларын АҚШ долларына байланған стейблкоин — USDC-ке айырбастай алады. Benzinga басылымы бұл ынтымақтастықты ірі қаржы институттарының криптоқызметтерге реттелген қолжетімділікке деген сенімі артып келе жатқанының белгісі ретінде бағалайды.
30 шілде күнгі саудада Coinbase акцияларының котировкасы 2,5% өсті. Жыл басынан бері компанияның құны 50%-дан астамға артып, $95 млрд-қа жуықтады. Бұл оған S&P 500 индексіне енуге мүмкіндік берді, ал бұл — сала үшін маңызды межелердің бірі, деп жазады Reuters.
JPMorgan котировкасы сәрсенбіде 0,8% көтерілді.
Бұл әріптестік инвесторларға нені білдіреді?
Криптосервистер мен банктер арасындағы тікелей өзара әрекеттестік финтех-компанияларға Plaid, MX Technologies немесе Akoya сияқты деректер агрегаторларын айналып өтуге мүмкіндік береді, деп жазады Bloomberg. Бұл агрегаторлар әдетте байланыстырушы буын рөлін атқарған. Тікелей қосылу бизнеске комиссияларды үнемдеуге жол ашады. Coinbase өкілі биржа агрегаторлармен бұрыннан бар байланыстарды сақтайтынын, ал JPMorgan шоттарына тікелей қосылу қосымша арна болатынын нақтылады. Әзірге мұндай форматпен жұмыс істеуге барлық компаниялар, әсіресе шағын бизнес ойыншылары, қол жеткізе ала ма — бұл жағы белгісіз, деп жазады Bloomberg.
JPMorgan агенттікке берген түсініктемесінде, банк тікелей қосылуға ашық екенін және осы бағытта белсенді жұмыс істеп жатқан арнайы командасы бар екенін атап өтті. Бұған дейін JPMorgan-ның басшысы Джейми Даймон криптовалюта секторына қатысты сақтық ұстанымда болған.
Шілденің басында америкалық PNC банкі Coinbase-пен бірлесіп өз клиенттеріне криптовалюта саудасына арналған қызметтерді ұсыну бағытында жұмыс істеп жатқанын мәлімдеді.
