Қытай енді «инвестицияға жарамсыз» емес. Неге инвесторлар қайта орала бастады?
Бірнеше жылдық сақтықтан кейін шетелдік инвестициялық қорлар Қытайға қайта бет бұруда. Бұған акция бағаларының рекордтық өсуі, экономикалық жағдайдың жақсаруы және елдің жасанды интеллект саласындағы жетістіктері себеп болып отыр. Акциялар, облигациялар және басқа да активтерге салымдар айтарлықтай артқан. Қытай Халық банкінің дерегінше, маусым айына қарай капиталдың таза келуі 2024 жылдың жылдық көрсеткішінен шамамен 60%-ға асып түсті. Мұндай үйлесімді өсім соңғы он жылда небәрі үш рет болған.
Егжей-тегжейі
Goldman Sachs деректері бойынша, тамызда жаһандық хедж-қорлар Қытайдың материктік нарығындағы акциялармен соңғы жылдардағы ең белсенді сауда жүргізген. Бұл 2021 жылмен салыстырғанда үлкен айырмашылық, сол кезде клиенттер Қытайды «инвестицияға жарамсыз» деп атаған еді.
Pacific Investment Management Co. пікірінше, қазір инвесторлар ықтимал тәуекелдерден гөрі табысты жіберіп алудан көбірек қорқады.
Ресми статистикаға сәйкес, биылғы жылдың алғашқы жартысында шетелдік инвесторлар Қытай ішкі нарығындағы акцияларға, облигацияларға, несиелер мен депозиттерге салымдарын ұлғайтқан. Маусымға қарай капиталдың таза ағыны былтырғы жылдық көлемнен 60%-ға артты.
CSI 300 индексі тоқсанда 17%-ға өсіп, соңғы үш жылдағы ең жоғарғы деңгейге жетті. Технологиялық ChiNext индексі осы уақыт ішінде 50%-ға көтеріліп, әлем бойынша үздік нәтижелердің бірін көрсетті. Дегенмен екеуі де 2021 жылғы шегіне жете қойған жоқ.
Бұл нені білдіреді?
Bloomberg жазғандай, Қытай нарығы үшін бұл — бетбұрыс кезең. Бұған дейін қатал реттеу мен жылжымайтын мүлік дағдарысы салдарынан инвесторлар бұл нарықтан теріс айналған еді. Бірақ қазір ішкі нарықтағы $2,7 трлн көлеміндегі өсім назар аудармай кету қиын деңгейге жетті. Дегенмен жаһандық қорлар әлі де Қытайға мүмкіндігінше аз инвестиция салып отыр, бұл болашақта салымдардың айтарлықтай арту мүмкіндігін көрсетеді.
Morgan Stanley мәліметінше, тамыз соңына қарай ұзақмерзімді стратегиясы бар шетелдік қорлардан $1 млрд-қа жуық қаражат тартылған. Бұл өткен жылғы $17 млрд көлеміндегі кетумен салыстырғанда үлкен өзгеріс. Банк дерегінше, жалпы алғанда жаһандық қорлар Қытайға әлі де жеткілікті деңгейде инвестиция салмаған (1,3 пайыздық пунктке төмен). Ал Жапониядан басқа Азия нарықтарына маманданған басқарушылар керісінше үлесін арттырып отыр.
Fidelity International портфель менеджері Джозеф Чжан: «Инвесторлар қазір Қытай активтеріне көбірек қызығушылық танытуда. Бұл жолы активтер қайта бағалануы саясатқа немесе ынталандыру шараларына емес, нақты экономикалық көрсеткіштердің жақсаруына негізделіп отыр. Сенім арта түседі», — деді.
Бұл өзгерістің басты себебі — технология секторы. Инвесторларды Қытайдың жасанды интеллекттегі жетістіктері қызықтырады. Alibaba Group сынды ірі компаниялар өз ЖИ модельдерін ұсынып, Cambricon Technologies сияқты чип өндірушілер жаңа табыстарға жетуде.
Капитал ағыны юань бағамын қолдап, Си Цзиньпиннің ұлттық валютаның әлемдік қаржы жүйесіндегі рөлін күшейту жоспарына ықпал етуі мүмкін.
Бұған сыртқы факторлар да әсер етті: Дональд Трамптың сауда саясаты, ФРЖ-ның пайыздық мөлшерлемені төмендету циклі және АҚШ бюджет тапшылығының өсуі инвесторларды долларлық активтерге балама іздеуге итермелеуде.
Барлығы соншалықты оптимистік пе?
Bloomberg атап өткендей, кейбір инвесторлар үшін Қытай нарығындағы ұзақ құлдыраудың салдары әлі де ауыр, сондықтан олар қайта оралуға асықпайды. 2021 жылы басталған қатаң реттеу толқыны технологиядан білім беру саласына дейінгі секторларға соққы беріп, «инвестицияға жарамсыз» деген пікірді күшейтті.
Қытай билігі қазір де шамадан тыс алыпсатарлықты тежегісі келеді. Сондықтан тым тез өсу реттеушілер назарын аударуы мүмкін. Геосаяси шиеленістер де өз ықпалын тигізуде: АҚШ-тағы ірі зейнетақы және қоғамдық қорлар саяси себептермен Қытайдан әлі де қашық. Өткен жылы Флорида өз зейнетақы қорларын қытайлық активтерден шығаруға шешім қабылдаған штаттардың қатарына қосылды.
