Қытайда Apple үлесі iPhone 17 сатылымының арқасында 25%-ға өсті
Қазанда Қытайда сатылған әр төртінші смартфон — iPhone болғаны анықталды, деп жазады Bloomberg Counterpoint Research сараптамалық компаниясының деректеріне сілтеме жасап. Apple-дің Қытай нарығындағы үлесі 2022 жылдан бері алғаш рет 25%-ға көтерілді.
iPhone 17 сериясының іске қосылуы америкалық компанияға Қытайдағы қазан айындағы сатылымды жылдық өлшемде 37%-ға ұлғайтуға мүмкіндік берді. Counterpoint-тың бағалауынша 5999 юаньнан (шамамен $850) басталатын iPhone 17 моделінен бастап, 8999 юань тұратын 17 Pro Max-қа дейінгі барлық жаңа нұсқалар iPhone 16-мен салыстырғанда екі таңбалы өсім көрсеткен. Жалпы алғанда, бүгінде Қытайда сатылған Apple құрылғыларының 80%-дан астамы — дәл осы iPhone 17 желісі.
Apple-дің серпіні Қытайдың баяу қозғалған смартфон нарығын да алға сүйреп, мемлекет субсидияларына қарамастан ұзақ уақыт бойы тұралап тұрған сектор қазанда 8% өсім көрсетті, деп жазады агенттік.
Ал Huawei сатылымы керісінше 19%-ға төмендегеніне қарамастан, компания Қытайда Apple-дің негізгі бәсекелесі болып қала береді. Huawei келесі аптада жаңа флагманын таныстыруға дайындалып жатыр.
«iPhone сатылымдары үшін белгілі бір тәуекелдер бар, әсіресе Huawei Mate 80 сериясының көптен күткен 25 қарашадағы таныстырылымына байланысты. Бірақ Apple қазір өте күшті импульске ие, сұраныстың күрт әлсіреу белгілері байқалмайды», — деді Counterpoint аналитигі Айван Лам.
