Кіші энергия компаниясының акциялары ЖИ келісімінен кейін 25%-ға өсті
Энергетика нарығындағы шағын ойыншы Bloom Energy компаниясының акциялары 13 қазандағы премаркет саудасында шамамен 25%-ға қымбаттады, деп хабарлайды CNBC. Себеп — жасанды интеллект жүйелерін қолдайтын дата-орталықтарға арналған отын элементтерін жеткізуші компанияның инвестициялық алпауыт Brookfield-пен келісім жасауы. Сауда барысында Bloom Energy акциялары соңғы жабылу бағасынан 30%-ға жоғары деңгейде сатылды.
Brookfield компаниясы Bloom Energy технологияларын дамытуға 5 млрд долларға дейін инвестиция салуды жоспарлап отыр. Бұл — ірі дата-орталықтарды электр энергиясымен және есептеу инфрақұрылымымен қамтамасыз ету жөніндегі стратегиясының алғашқы қадамы.
Bloom Energy шығаратын отын элементтері орталықтандырылған электр желісіне тәуелсіз, тез орнатыла алатын жергілікті энергия көзін ұсынады. Компанияның мәліметінше ол қазірдің өзінде American Electric Power, Equinix және Oracle секілді дата-орталық операторларымен келісімдер аясында жүздеген мегаватт жүйелерді іске қосқан.
Жыл басынан бері Bloom Energy капитализациясы 291%-дан астам, ал соңғы бір жылда 730%-ға өскен. Дегенмен қыркүйек соңында Jefferies сарапшылары компанияның рейтингін төмендетіп, оның акцияларын сату ұсынысын берді. Себебі — бағалануының шамадан тыс жоғары болуы және дамудың белгісіз келешегі. Сарапшылардың пікірінше Bloom Energy мен Oracle арасындағы ЖЖ-дата-орталықтар салуға арналған келісімге қатысты инвесторлардың эйфориясы нақты қаржылық негізге сүйенбейді және тым агрессивті өсу қарқынын талап етеді.
Ал бұған дейін, қыркүйектің ортасында, Morgan Stanley бұл келісімді Bloom Energy үшін бұрылыс нүктесі деп атаған болатын.
